جۇمىسقا تۇرۋدىڭ جوسپارى اسىرا ورىندالدى

باسقا-باسقا, سايرام حال­قى ساۋىق-سايران سالا بەرمەي, ءبىر مەزگىل قولعا كەتپەن-كۇرەك ۇستاماسا, ءومىردىڭ ءمانى, ءسانى بولمايتىنىن جاقسى تۇسىنەدى. ايتەۋىر, سانسىز باپتار ەلىن مەكەندەگەن حالىق وڭتۇستىككە ەڭبەكقور, ىسكەر قاسيەتتەرىمەن تانىمال. سودان بولار بۇل اۋدان تۇرعىندارىنىڭ قولعا العان كاسىپتەرى دە كوپ, سونىڭ ەسەبىنەن اشىلعان جۇمىس ورىندارى دا كوپ. كوپ ەڭبەك ەتكەنگە باقىت تا باسىن يەدى عوي. سايرامدىقتاردىڭ تۇرمىسى باقۋاتتى. بۇگىندە سايرام اۋدان بويىنشا بەلسەندى كاسىپكەرلىك سۋبەكتىلەردىڭ سانى 17253 بىرلىككە جەتىپتى. ال, شاعىن جانە ورتا كاسىپكەرلىك سۋبەكتىلەرى وندىرگەن ءونىم كولەمى 47,9 ملرد. تەڭگەنى قۇراپ, ءوسىم 7,4 پايىزعا جەتىپ وتىر. بۇل سالادا 26,0 مىڭ ادام جۇمىسپەن قامتىلعان. تولەنگەن سالىق تولەمدەرى 2,7 ملرد. تەڭگە. «ماكسيمۋم» ايماقتىق ينۆەستيتسيالىق ورتالىعى» جشس ارقىلى 113 جوبا 1165,7 ملن. تەڭگەگە ناقتى قارجىلاندىرىلىپ, 222 جۇمىس ورنى اشىلعان. سونداي-اق, «بيزنەستىڭ جول كارتاسى-2020» باعدار­لاماسى اياسىندا اۋدان بويىنشا 30 جوبا قارجىلان­دىرىلىپتى. ۇدەمەلى يندۋستريالىق-يننوۆا­تسيالىق دامۋ باعدار­لاماسى اياسىندا قۇنى 1 ملرد. 664 ملن. تەڭگەگە 4 جوبا ىسكە قوسىلىپ, 193 جاڭا جۇمىس ورنى اشىلدى. بۇدان بولەك, يندۋستريالاندىرۋ كارتاسىنا ەنبەگەن باسقا دا جوبالار ىسكە قوسىلىپ, 93 ازامات جۇمىسپەن قامتىلدى. ال ونەركاسىپ سالاسىنا اۋدان ەكونوميكاسىن دامىتۋعا وتكەن جىلى 10 024,0 ملن. تەڭگەگە ينۆەستيتسيا تارتىلىپ, 764 جاڭا جۇمىس ورنى اشىلعان. ونەركاسىپ سالاسىندا 2014 جىلى 5 253,0 ملن. تەڭگەگە 3 ينۆەستيتسيالىق جوبالار ىسكە اسىپ, 220 جاڭا جۇمىس ورنىن اشۋ كوزدەلۋدە. «سىباعا» باعدارلاماسى بويىنشا 382 باس  ءىرى قارا مال الىنعان. 1507 باسقا ارنالعان 4 ءىرى مال بورداقىلاۋ الاڭ­دارى سالىندى. 1 ەت وڭدەيتىن, 1 ءسۇت وڭدەيتىن تسەحتار ءىس­كە قوسىلسا, 106 باسقا ارنال­عان 1 ءسۇت تاۋارلى فەرماسى جۇمىسىن باستادى. جالپى, اۋىل شارۋاشىلىعى سالاسىنا وتكەن جىلى 1 949,8 ملن. تەڭگەگە ينۆەستيتسيا تارتىلىپ, 340 جاڭا جۇمىس ورىندارى اشىلدى. جالپى العاندا, ساي­رام اۋدانى بويىنشا «جۇ­مىسپەن قامتۋ-2020» باعدارلاماسى اياسىندا 2099 ادامدى جۇمىسپەن قامتۋ جوسپارلانسا, 3388 ادام قامتىلىپ, جوسپار 161,4 پايىزعا ورىندالعان. ادال ەڭبەك ەتكەننىڭ قاشاندا كوڭىلى شات. «بەرەكەنى كوكتەن تىلەمە, ەتكەن ەڭبەكتەن تىلە» دەگەن دانا ابايدىڭ ايتقانىن ءىس جۇزىندە دالەلدەپ وتىرعان سايرامدىقتاردىڭ بۇگىنگى تىرلىگى ءاربىر قازاق بالاسىنا ۇلگى-ونەگە بولاتىنى ءسوزسىز. ورالحان ءداۋىت, «ەگەمەن قازاقستان». وڭتۇستىك قازاقستان وبلىسى, سايرام اۋدانى.