وعان قازاقستان رەسپۋبليكاسى پارلامەنتىنىڭ دەپۋتاتتارى, قازاقستان, پولشا, رەسەي, تۇركيا جوعارى وقۋ ورىندارىنىڭ جەتەكشى عالىمدارى, سونداي-اق ەلىمىزدىڭ زاڭ قاۋىمداستىعىنىڭ وكىلدەرى قاتىستى.
عىلىمي فورۋم اياسىندا قازاقستاننىڭ ەڭبەك سىڭىرگەن قايراتكەرى يسيدور بورچاشۆيلي دايىنداعان ءارى مەملەكەتتىك جانە ورىس تىلدەرىندە العاش رەت باسىلىپ شىققان «قازاقستان رەسپۋبليكاسىنىڭ قىلمىستىق كودەكسىنە تۇسىنىكتەمە» اتتى ءۇش تومدىق كىتاپتىڭ تۇساۋكەسەرى ءوتتى.
باسىلىمدى دايىنداۋ بارىسىندا اۆتور قازاقستان كونستيتۋتسياسىنىڭ, قر راتيفيكاتسيالاعان حالىقارالىق ماڭىزدى اكتىلەردىڭ, قر كونستيتۋتسيالىق كەڭەسى مەن قر جوعارعى سوتىنىڭ نورماتيۆتىك قاۋلىلارىنىڭ, ۇلتتىق زاڭنامانىڭ ەرەجەلەرىن, سونداي-اق سوت-تەرگەۋ تاجىريبەسىنەن الىنعان مىسالداردى بارىنشا تولىق پايدالانعان.
ءۇش تومدىق كىتاپ ساراپشىلار قاۋىمداستىعىنان وڭ باعا الدى. باسىلىمعا قىلمىستىق قۇقىق سالاسىنداعى قازاقستاندىق قانا ەمەس, شەتەلدىك كورنەكتى عالىمدار دا رەتسەنزيالارىن بەرگەن بولاتىن. باسىلىمدى قازاقستان رەسپۋبليكاسى ءبىلىم جانە عىلىم مينيسترلىگى ەلىمىزدىڭ جوعارى وقۋ ورىندارىنا ارناپ ۇسىنىپ وتىر.
قازاقستان رەسپۋبليكاسى پارلامەنتى سەناتى توراعاسىنىڭ ورىنباسارى نۇرلان ءابدىروۆ تۇساۋكەسەر بارىسىندا ءسوز الىپ, ەلىمىزدىڭ زاڭ قوعامداستىعىنا مۇنداي ارناۋلى ءارى ساپالى ادەبيەتتى باسىپ شىعارۋدىڭ زور ماڭىزى بار ەكەنىن اتاپ ءوتتى:
«يسيدور بورچاشۆيلي ازىرلەگەن ءۇش تومدىق – ونىڭ وراسان زور شىعارماشىلىق جۇمىسىنىڭ جەمىسى. ول كونستيتۋتسيالىق قۇندىلىقتاردى – ادامدى, ونىڭ ءومىرىن, قۇقىقتارى مەن بوستاندىقتارىن قورعايتىن وسى ماڭىزدى كوديفيكاتسيالانعان اكتىنىڭ بارلىق نورمالارىنا مازمۇندى دا سالماقتى عىلىمي تۇسىندىرمە بەرە الدى. ەلىمىز پرەزيدەنتى قاسىم-جومارت توقاەۆ جۇرگىزىپ وتىرعان قۇقىق قورعاۋ جانە سوت سالالارىن جۇيەلى جاڭعىرتۋ اياسىندا قىلمىستىق زاڭناماعا ەنگىزىلگەن جاڭالىقتاردىڭ قامتىلۋى – اتقارىلعان جۇمىستىڭ ماڭىزدىلىعىن كورسەتەدى. سونداي-اق, قىلمىستىق كودەكسكە تۇسىنىكتەمە قازاق تىلىندە شىعارىلۋىنىڭ دا ماڭىزى زور. تاۋەلسىزدىكتىڭ 30 جىلدىعى قارساڭىندا اۆتوردىڭ ءوز ەلىنە وسىناۋ قوماقتى سىيى قۇقىق قورعاۋ ورگاندارىنىڭ قىزمەتكەرلەرى, عالىمدار, وقىتۋشىلار, زاڭگەر-ستۋدەنتتەر تاراپىنان جوعارى سۇرانىسقا يە بولاتىنى داۋسىز ءارى قازاقستاننىڭ قۇقىقتىق جۇيەسىنىڭ ودان ءارى تۇراقتى دامۋىنا ءوز ۇلەسىن قوساتىن بولادى».
سونىمەن قاتار, حالىقارالىق عىلىمي-پراكتيكالىق كونفەرەنتسيا اياسىندا استانا حالىقارالىق ۋنيۆەرسيتەتى مەن پياتيگورسك مەملەكەتتىك ۋنيۆەرسيتەتى (رەسەي فەدەراتسياسى) اراسىندا ارىپتەستىك جانە ىنتىماقتاستىق تۋرالى كەلىسىمگە قول قويىلدى.
