قر ساۋدا جانە ينتەگراتسيا ءمينيسترى باقىت سۇلتانوۆ پالاتانىڭ جالپى وتىرىسىندا «زاتتار مەن ماتەريالداردىڭ قۇرامى مەن قاسيەتتەرىنىڭ ستاندارتتى ۇلگىلەرىن جاساۋ جانە قولدانۋ جونىندەگى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوباسىن ۇسىنا وتىرىپ, وسى كەلىسىمدى راتيفيكاتسيالاۋ كەلىسىمگە قاتىسۋشى ەلدەردە سىناقتار بويىنشا قوسىمشا راسىمدەردى وتكىزبەي, قازاقستاندا ازىرلەنگەن ستاندارتتى ۇلگىلەردى تانۋعا مۇمكىندىك بەرەتىنىن اتاپ ءوتتى.
«مىسالى, قازاقستان رەسپۋبليكاسى ستاندارتتى ۇلگى شىعارادى, سىناقتار جۇرگىزەدى جانە ءتيپىن بەكىتەدى, ال كەلىسىمگە قاتىسۋشى قالعان ەلدەر تەحنيكالىق قۇجاتتامانى ساراپتاۋ ناتيجەلەرىن قوسىمشا سىناقتار جۇرگىزبەستەن تانيدى», دەپ ءتۇسىندىردى باقىت سۇلتانوۆ.
ۆەدومستۆونىڭ مالىمەتىنشە, قر-دا ستاندارتتى ۇلگىلەردى ءوندىرۋ بويىنشا بارلىعى 16 ۇيىم بار, ولار «قازستاندارت» رمك, «ۆنيتسۆەتمەت» ەمك, «ۇلتتىق يادرولىق ورتالىق» رمك, «تسەنترگەواناليت» جشس, ء«ۇلبى مەتاللۋرگيا زاۋىتى» اق.
وسىلايشا, مەملەكەتارالىق مارتەبەسى بار وسى كەلىسىمدى راتيفيكاتسيالاۋ مەترولوگيا سالاسىنداعى ولشەۋ ناتيجەلەرىنە دەگەن سەنىمدى ارتتىرادى جانە ءونىمنىڭ ساپاسى مەن قاۋىپسىزدىگىن قامتاماسىز ەتەدى. مەملەكەتارالىق ستاندارتتى ۇلگىلەر سۇرانىسقا يە جانە ەكونوميكانىڭ ءارتۇرلى سالالارىندا كەڭىنەن قولدانىلادى. ۇلتتىق تىزىلىمدە 634 ستاندارتتى ۇلگى تىركەلگەن. ونىڭ ىشىندە 337 ستاندارتتى ۇلگى مەملەكەتارالىق ستاندارتتى ۇلگىلەر تىزىلىمىنە ەنگىزىلدى.
«بيىل ءبىزدىڭ ستاندارتتاۋ جانە مەترولوگيا ينستيتۋتى مەملەكەتارالىق ستاندارتتى ۇلگىلەر تىزىلىمىنە ەنگىزىلگەن 163 ستاندارتتى ۇلگى ازىرلەگەنىن اتاپ وتكىم كەلەدى», دەپ تولىقتىردى باقىت سۇلتانوۆ.
