مازمۇندى ءىس-شارا ەلباسى كىتاپحاناسىنىڭ «قازاقستان جولى» جوباسى اياسىندا ۇيىمداستىرىلعان, ونىڭ ماقساتى – ازاتتىقتىڭ العاشقى ارايلى تاڭىن قارسى العان الاتاۋدىڭ ەتەگىندەگى اسەم شاھاردىڭ ورنى مەن ءرولىن جارقىراتا كورسەتۋ.
ايتۋلى كورمەنىڭ اشىلۋىندا ەلباسى كىتاپحاناسىنىڭ ديرەكتورى باقىتجان تەمىربولات ازاتتىقتىڭ التىن بەسىگىنە اينالعان – الماتىنىڭ كوركەم كەلبەتى مەن ءرولى تۋرالى سالماقتى ءسوز قوزعادى. ء«دال وسىدان 30 جىل بۇرىن الماتىدا 1991 جىلى 1 جەلتوقساندا – پرەزيدەنت سايلاۋى, 10 جەلتوقساندا – مەملەكەت باسشىسىنىڭ رەسمي ۇلىقتاۋ ءراسىمى جانە 16 جەلتوقساندا – قازاقستان تاۋەلسىزدىگىن جاريالاپ, دەربەس ەلىمىزدىڭ نەگىزى قالاندى» دەدى ول.
ودان كەيىن الماتى قالاسىنىڭ اكىمى باقىتجان ساعىنتاەۆ كورمەگە ۇسىنىلعان ەكسپوزيتسيالار مەگاپوليستىڭ تاۋەلسىزدىگىمىزدىڭ وتىز جىلدىعىنداعى جەتىستىكتەرىنە ارنالعانىن اتاپ ءوتتى.
− ارۋ الماتىنىڭ ەلىمىزدەگى ورنى بولەك, ونى ەلباسى نۇرسۇلتان نازارباەۆتىڭ ءوزى بەلگىلەپ بەرگەن. تاۋەلسىزدىگىمىز الدىمەن الماتىدا جاريالاندى. مەملەكەتىمىزدى بۇگىنگە دامۋ دەڭگەيىنە جەتكىزگەن – ەكونوميكالىق-الەۋمەتتىك, ساياسي رەفورمالاردىڭ ءبارى الماتىدان باستالدى. ەلباسىنىڭ شەشىمىمەن ەل استاناسى الماتىدان اقمولاعا كوشىرىلدى. بىراق بۇدان الماتى ۇتىلعان جوق. تۇڭعىش پرەزيدەنتىمىزدىڭ قولداۋىمەن الماتىنىڭ جاڭا مارتەبەسى بويىنشا زاڭ قابىلداندى» دەي كەلىپ, ازاتتىق جىلدارىنداعى تابيعاتى كوركەم قالانىڭ ەكونوميكاسىنا توقتالدى. ماسەلەن, الىپ شاھاردىڭ ەكونوميكاسى 1993 جىلداعى 2,1 ملرد تەڭگەدەن 2020 جىلى 13,5 ترلن تەڭگەگە دەيىن وسسە, جالپى وڭىرلىك ءونىم جان باسىنا شاققاندا 342,5 اقش دوللارىنان 16,7 مىڭ اقش دوللارىنا دەيىن ارتقان. حالىق سانى 1991 جىلعى 1 134 مىڭ ادامنان 2021 جىلى 2 ملن ادامعا دەيىن كوبەيگەن.
ەگەمەن ەلدىڭ ءجۇرىپ وتكەن جولىن بايان ەتكەن كورمە ءۇش بولىمنەن تۇرادى, ءبىرىنشىسى − «تاۋەلسىزدىكتىڭ باستاۋىندا» دەپ اتالادى, وعان 1986 جىلعى جەلتوقسان وقيعاسى مەن 1991-1997 جىلدارداعى وقيعالار حرونيكاسى, سونداي-اق الماتى قالاسىندا قابىلدانعان ماڭىزدى تاريحي شەشىمدەر تۋرالى ماتەريالدار كەشەنى ۇسىنىلعان. ال «قازاقستان جولى: الماتىنىڭ 30 جىلداعى جەتىستىكتەرى» بولىمىندە مەگاپوليستىڭ تاۋەلسىزدىك جىلدارىنداعى الەۋمەتتىك, ەكونوميكالىق, مادەني جانە سپورت جەتىستىكتەرىمەن تانىساسىز. ءۇشىنشى – ء«بىزدىڭ بولاشاعىمىز: الماتى-2050 ستراتەگياسى» بولىمىندە, «الماتى – شەتسىز قالا», «اقىلدى» قالا, تەڭ مۇمكىندىكتەر قالاسى, قاۋىپسىز, جاسىل قالا جانە جاھاندىق ىسكەرلىك ورتالىق سەكىلدى شىرايلى شاھاردىڭ ۇزاق مەرزىمدى دامۋىنىڭ باستى باعدارلارى مەن ستراتەگيالىق باسىمدىقتارى كورسەتىلگەن.
مادەني شاراعا الماتىدان زيالى قاۋىم وكىلدەرى دە ارنايى كەلىپتى, سولاردىڭ ىشىنەن بەلگىلى اقىن, قازاقستان جازۋشىلار وداعىنىڭ توراعاسى ۇلىقبەك ەسداۋلەت اعامىزدى سوزگە تارتتىق.
− ەگەر ءبىز قازاقستان دەيتىن وتانىمىزدى قىرانعا تەڭەسەك, ونىڭ قونىپ-ۇشاتىن تۇعىرى – الماتى. ەگەر ءبىز قازاقستاندى تۇلعالى قايراتكەرگە تەڭەيتىن بولساق, ونىڭ العاشقى دۇنيەگە شىر ەتىپ كەلگەندەگى التىن بەسىگى – الماتى. ەگەر ءبىز قازاقستاندى ارىندى, اساۋ تولقىندى وزەنگە تەڭەيتىن بولساق, ونىڭ تۇنىق باستاۋى, قاينار كوزى تاعى دا الماتى دەپ ايتۋعا بولادى. بۇل ءبىزدىڭ مادەنيەتىمىز بەن ادەبيەتىمىزدىڭ ءوسىپ-ونگەن, دامۋى مەن قالىپتاسۋىنا انالىق قۇشاعىن اشقان يگىلىكتى مەكەن بولدى» دەپ شەجىرەلى شاھار تۋرالى پاراساتتى وي تولعادى.
ايتا كەتەيىك, كورمە الداعى جىلدىڭ 28 قاڭتارىنا دەيىن جالعاسادى.
