ءىس-شارا ەلباسى كىتاپحاناسىنىڭ «قازاقستان جولى» جوباسى اياسىندا ۇيىمداستىرىلدى. ونىڭ نەگىزگى يدەياسى – بولاشاق قوعامدى قۇرۋدىڭ سەرپىندى پروتسەسى رەتىندە 30 جىل بويى ەلىمىزدىڭ وڭىرلەرى مەن قالالارىنىڭ دامۋىن كەڭ كولەمدە كورسەتۋ.
ءىس-شارا بارىسىندا ءسوز العان ەلباسى كىتاپحاناسىنىڭ ديرەكتورى باقىتجان تەمىربولات: «تاۋەلسىزدىك كۇنى قارساڭىندا ازاتتىقتىڭ التىن بەسىگىنە اينالعان الماتى قالاسىنا ارنالعان كورمەمىزدى اشۋىمىزدىڭ ءمانى زور. وسىدان تۋرا 30 جىل بۇرىن, 1991 جىلعى 1 جەلتوقساندا مۇندا بۇكىلحالىقتىق پرەزيدەنت سايلاۋى, 10 جەلتوقساندا مەملەكەت باسشىسىنىڭ رەسمي ۇلىقتاۋ ءراسىمى جانە 16 جەلتوقساندا قازاقستان تاۋەلسىزدىگىنىڭ جاريالانۋى سىندى تاريحي وقيعالار بولىپ, ەگەمەن مەملەكەتىمىزدىڭ نەگىزى قالاندى», دەدى.
2015 جىلى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ «الماتى كوكتەمى» ءىس-شاراسىندا سويلەگەن سوزىندە: «الماتى – ماڭگىلىك كوكتەم قالاسى, ورتالىق ازيانىڭ ءىنجۋ-مارجانى... بۇل مەگاپوليس قازاقستان تاۋەلسىزدىگىنىڭ «التىن بەسىگى», رەسپۋبليكامىزدىڭ جاڭا تاريحى باستالعان جەر», دەپ اتاپ وتكەن بولاتىن.
«تاۋەلسىزدىگىمىز الماتىدا جاريالاندى. سوندىقتان بۇل شاhاردىڭ تاريحي ءرولى ايرىقشا. قازىر الماتى – ەكونوميكامىزدىڭ باستى قوزعاۋشى كۇشى», دەگەن مەملەكەت باسشىسى ق.توقاەۆتىڭ سوزىندە دە زور ءمان بار.
«الماتى – تاۋەلسىزدىكتىڭ التىن بەسىگى» كورمەسىنىڭ باستى ماقساتى – الماتى قالاسى ارحيۆتەرى مەن مۋزەيلەرىنىڭ, ەلباسى كىتاپحاناسىنىڭ قورلارىنان جيناقتالعان قۇجات, سۋرەت, جادىگەرلەر ارقىلى ەگەمەن ەل تاعدىرىنداعى الماتى قالاسىنىڭ ورنى مەن ءرولىن كورسەتۋ.
الماتى قالاسىنىڭ اكىمى باقىتجان ساعىنتاەۆ ۇسىنىلعان ەكسپوزيتسيالار مەگاپوليستىڭ تاۋەلسىزدىكتىڭ وتىز جىلىنداعى جەتىستىكتەرىنە ارنالعانىن اتاپ ءوتتى.
«تاۋەلسىزدىك جىلدارىندا الماتى ەكونوميكاسى 1993 جىلداعى 2,1 ملرد تەڭگەدەن 2020 جىلى 13,5 ترلن تەڭگەگە دەيىن ءوستى. ال ءجوو جان باسىنا شاققانعا 342,5 اقش دوللاردان 16,7 مىڭ اقش دوللارعا دەيىن ارتتى. حالىق سانى 1991 جىلعى 1 134 مىڭ ادامنان 2021 جىلى 2 ملن ادامعا دەيىن كوبەيدى. تاۋەلسىز قازاقستان دامۋىنداعى جاڭا كەزەڭدە قالا ەلىمىزدىڭ عىلىمي, ءبىلىم بەرۋ, زياتكەرلىك ورتالىعى بولىپ قالا بەرەدى ءارى ۇلتىمىزدىڭ مادەني بىرلىگىنىڭ نىشانى بولىپ سانالادى», دەدى ب. ساعىنتاەۆ.
«الماتى – تاۋەلسىزدىكتىڭ التىن بەسىگى» كورمەسى ءۇش بولىمنەن تۇرادى:
- «تاۋەلسىزدىكتىڭ باستاۋىندا» بولىمىندە 1986 جىلعى جەلتوقسان وقيعالارى, 1991-1997 جىلدارداعى وقيعالار حرونيكاسى, سونداي-اق الماتى قالاسىندا قابىلدانعان ماڭىزدى تاريحي شەشىمدەر تۋرالى ماتەريالدار كەشەنى ۇسىنىلعان.
- «قازاقستان جولى: الماتىنىڭ 30 جىلداعى جەتىستىكتەرى» ءبولىمى مەگاپوليستىڭ تاۋەلسىزدىك جىلدارىنداعى الەۋمەتتىك, ەكونوميكالىق, مادەني سالالارداعى, سونداي-اق سپورتتاعى نەگىزگى جەتىستىكتەرى تۋرالى ماتەريالداردى كورسەتەدى. كورەرمەندەر ينتەراكتيۆتى تۇردە الماتىنىڭ الەمدىك مادەنيەت پەن وركەنيەتكە قوسقان ۇلەسى مەن 1991-2021 جىلدار ارالىعىندا وڭتۇستىك استانادا بولعان 30 ماڭىزدى وقيعامەن تانىسا الادى.
- ء«بىزدىڭ بولاشاعىمىز: الماتى-2050 ستراتەگياسى» بولىمىندە: الماتى – شەتسىز قالا; «اقىلدى» قالا; تەڭ مۇمكىندىكتەر قالاسى; قاۋىپسىز قالا; جاسىل قالا; جاھاندىق ىسكەرلىك ورتالىق; مادەني, كرەاتيۆتى قالا سىندى الماتىنىڭ ۇزاق مەرزىمدى دامۋىنىڭ باستى باعدارلارى مەن ستراتەگيالىق باسىمدىقتارى كورسەتىلگەن.
بەيبىتشىلىك كوشەسى, 11 مەكەنجايىنداعى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ مۋزەيىندەگى كورمە 2022 جىلعى 28 قاڭتارعا دەيىن جالعاساتىن بولادى.
