بۇعان دەيىن بەلگىسىز بولىپ كەلگەن الماتى قالاسىنىڭ جاسى 1979 جىلى بۇرىنعى شەكاراشىلار ۋچيليششەسى اۋماعىنداعى كونە قالاشىقتىڭ ورنىنان تابىلعان تەڭگەلەر ناتيجەسىندە انىقتالدى. ناقتىراق ايتساق, بۇل مونەتالار 1271-1217 جىلدارى قازىرگى قالا ورنالاسقان جەردە, ياعني جەرگىلىكتى اقشا سارايىندا سوعىلعان بولىپ شىقتى.
وسى ورايدا ايتپاعىمىز, وتاندىق نۋميزماتيكالىق جادىگەرلەردىڭ ەڭ كوپ ساقتالعان ورنى تۇركىستان قالاسىنداعى «ازىرەت سۇلتان» مەملەكەتتىك تاريحي مادەني قورىق مۋزەيى. «اتالعان مەكەمە قورىندا 13583 دانا نۋميزماتيكالىق جادىگەر بولسا, ولاردىڭ 7695-ءى نەگىزگى قور ەسەبىنە, 5888-ءى كومەكشى قور ەسەبىنە الىنعان», دەيدى قورىق-مۋزەيىنىڭ ءباسپاسوز حاتشىسى مادينا سابىر.
جوعارىداعى جادىگەرلەر اراسىندا تەك قازاق تاريحىنا قاتىستى نۋميزماتيكالىق ماتەريالدار دا بار ەكەن. اتاپ ايتقاندا, XIV عاسىردىڭ ەكىنشى جارتىسىندا سىعاناق, حورەزم اقشا سارايلارىندا سوعىلعان ءتۇرلى ستيلدەگى تەڭگە-تيىن ۇلگىلەرى. وسى تەڭگەلەر اراسىندا قاس بەتىنە اراب گرافيكاسىمەن «جهان...ر خان» دەپ جازىلعان مىس اقشا دا بار كورىنەدى.
«بۇل تەڭگەگە جۇرگىزىلگەن العاشقى زەرتتەۋ ناتيجەسىنە توقتالساق, جادىگەر قازاق حانى جاڭگىردىڭ اتىمەن سوعىلعان بولۋى مۇمكىن», دەيدى ماماندار.
بۇل جادىگەردى مۋزەي قورىنا 2016 جىلى جەكە تۇلعا اكەلىپ تاپسىرىپتى. جالپى, بۇعان دەيىن قازاق حاندارى اراسىنان تەك تۇرسىن مۇحاممەدتىڭ اتىمەن سوعىلعان تەڭگە بولعانىن بىلەمىز. ەگەر جوعارىداعى مىس تەڭگە راسىندا جاڭگىر حان اتىنان سوعىلعان بولسا, بۇل قازاقستان نۋميزماتيكاسى تاريحىندا ۇلكەن جاڭالىق بولارى انىق.
