كوكشەتاۋ قالالىق سوتىندا س. جانە ج-عا قاتىستى ۇكىم شىعارىلدى, ەكەۋى دە بۇرىن اقمولا وبلىسىنىڭ پوليتسيا دەپارتامەنتىندە جۇمىس ىستەگەن.
سوت 2019 جىلعى مامىردان قىركۇيەككە دەيىن كوكشەتاۋ قالاسىندا قارجىلىق قامتاماسىز ەتۋ باسقارماسى باستىعىنىڭ بۇرىنعى ورىنباسارى مەن باستىعى بيۋدجەت اقشاسىن ۇرلاپ, سونداي-اق قىزمەتتىك جالعاندىق جاساعانىن انىقتادى. مەملەكەتكە 17,4 ملن تەڭگەگە زالال كەلتىرىلدى.
ۇكىمدە ج. جانە س. وبلىس ەلدى مەكەندەرىنە قىزمەتكەرلەردىڭ «جالعان» ءىسساپارلارى جانە نەگىزسىز كوتەرمەلەۋلەر تۋرالى بۇيرىقتاردىڭ جوبالارىن دايىنداعاندىعى ايتىلعان. سودان كەيىن ولار قىزمەتكەرلەردەن بۇيرىقتارعا ەنگىزىلگەن اقشانى جينادى.
سوتتالۋشىلارعا قىلمىستىق كودەكستىڭ ءۇش بابى ۇسىنىلدى: يەمدەنۋ جانە ىسىراپ ەتۋ, لاۋازىمدىق وكىلەتتىكتەرىن تەرىس پايدالانۋ جانە قىزمەتتىك جالعاندىق.
ناتيجەسىندە سوت ولاردى كىنالى دەپ تاپتى.
«ولارعا مەملەكەتتىك قىزمەتتە, سۋديا, جەرگىلىكتى ءوزىن-ءوزى باسقارۋ ورگاندارىندا, قر ۇلتتىق بانكىندە جانە ونىڭ ۆەدومستۆولارىندا, مەملەكەتتىك ۇيىمداردا لاۋازىمداردى اتقارۋ قۇقىعىنان ءومىر بويىنا ايىرا وتىرىپ, سەگىز جىل باس بوستاندىعىنان ايىرۋ جازاسى تاعايىندالدى», دەپ حابارلادى اقمولا وبلىسىنىڭ كوكشەتاۋ قالالىق سوتى.
سونداي-اق, س. جانە ج. «پوليتسيا پولكوۆنيگى» ارناۋلى اتاعىنان ايىرىلدى.
اقمولا وبلىسى پوليتسياسىنىڭ ازاماتتىق تالابى ءىشىنارا قاناعاتتاندىرىلدى. سوتتالعانداردان ورتاق تارتىپتە ماتەريالدىق زالالدى وتەۋ ەسەبىنەن 14,9 ملن تەڭگە ءوندىرىلدى.
ۇكىم زاڭدى كۇشىنە ەنگەن جوق.
