ءۇش ءتۇن بويى نيدەرلاندىدا كوروناۆيرۋستىق شەكتەۋ شارالارىنا قارسى نارازىلىقتار تولاستاعان جوق. تۇرعىنداردىڭ بەلسەندىلىگى دۇيسەنبىنىڭ تاڭىنا دەيىن جالعاسىپ جاتتى. پوليتسيا قىزمەتكەرلەرى ۆانداليزم, ورتەۋ جانە وتشاشۋ ۇيىمداستىرعانى ءۇشىن بۇكىل ەل بويىنشا 30-عا جۋىق ادامدى ۇستادى. بىرقاتار قالالاردا توتەنشە جاعداي رەجيمى ەنگىزىلدى.
روزەندالدا بۇزاقىلار باستاۋىش مەكتەپتى ورتەپ جىبەردى. سونداي-اق وتشاشۋلار ۇيىمداستىرىپ, ناتيجەسىندە اۆتوموبيل ورتەندى. قوعامدىق ءتارتىپتى بۇزعانى ءۇشىن قۇقىق قورعاۋ ورگاندارى 15 ازاماتتى قۇرىقتادى.
توتەنشە جاعداي رەجيمى 20:30-دان 7:00-گە دەيىن ەنگىزىلگەن ەنسحەدتە پوليتسيا ۆانداليزم جانە وتشاشۋ ۇيىمداستىرعانى ءۇشىن بەس تۇرعىندى جازاعا تارتپاق.
گرونينگەن قالاسىندا اكتسيا الدىمەن بەيبىت تۇردە ءوتتى. بىراق سودان كەيىن بىرقاتار وقيعالار تىركەلدى. سونىمەن نارازىلىق اكتسياسىنىڭ قاتىسۋشىلارى دۇكەنگە باسىپ كىرىپ, سول جەردەن ۆەلوسيپەدتەر الىپ, ايالداماعا زاقىم كەلتىردى. تيلبۋرگتە جينالعان ونداعان ادام بىرنەشە قوقىس جاشىگىن زاقىمداپ, وتشاشۋ ۇيىمداستىردى.
سەنبى كۇنى تارتىپسىزدىكتەر بىردەن بىرنەشە قالادا بولدى. نارازىلىق اكتسياسىنا قاتىسۋشىلار ءتارتىپ ساقشىلارى تاراپىنا قاراي وتشاشۋلار جاساپ, كوشەلەردىڭ ورتاسىندا وت جاقتى. پوليتسيا بۇكىل ەل بويىنشا 28 ادامدى ۇستادى.
ودان بۇرىن روتتەردامداعى شەكتەۋ شارالارىنا قارسى نارازىلىقتاردا تارتىپسىزدىكتەر ورىن الىپ, پوليتسيامەن قاقتىعىستار بولدى. تارتىپسىزدىكتى ۇيىمداستىرۋشىلاردىڭ كوشباسشىسى ءتارتىپ ساقشىلارىنا تاس لاقتىردى. پوليتسيا جينالعانداردى تاراتۋ ءۇشىن بىرنەشە ەسكەرتۋ جاسادى. بىرنەشە ادام جاراقات الدى, ءۇش تۇرعىن اۋرۋحانادا جاتىر دەپ حابارلاندى. پوليتسيا 50-دەن استام بەلسەندىنى ۇستادى.
وتكەن اپتادا نيدەرلاندى پرەمەر-ءمينيسترىنىڭ مىندەتىن اتقارۋشى مارك ريۋتتە ەل بيلىگى كوروناۆيرۋستىڭ تارالۋىنا قارسى بىرقاتار شەكتەۋ شارالارىن ەنگىزۋ تۋرالى شەشىم قابىلداعانىن, ول 4 جەلتوقسانعا دەيىن ارەكەت ەتەتىنىن ايتقان بولاتىن.
ەلدە قاجەتتى تاۋارلاردى ساتاتىن دۇكەندەر مەن سۋپەرماركەتتەر, ءدارىحانالار, مەيرامحانالار, كافەلەر مەن بارلار ەندى 20.00-دە جابىلادى. قالعان دۇكەندەر, شاشتارازدار مەن سۇلۋلىق سالوندارى 18.00-گە دەيىن جۇمىس ىستەيدى. سپورتتىق ءىس-شارالار كورەرمەندەرسىز وتكىزىلەدى. سونىمەن قاتار, 1,5 مەترلىك الەۋمەتتىك قاشىقتىق ەرەجەسى, سونداي-اق مۇمكىندىگىنشە ۇيدەن جۇمىس ىستەۋ تۋرالى ۇسىنىس قايتادان كۇشىنە ەندى.
