دارىگەرلەر ومىرتقاسى قيسايعان 10 جاسار قىز بالاعا جەتى ساعاتقا جۋىق وتا جاسادى. وپەراتسيا كەزىندە حيرۋرگتار ناۋقاستىڭ ومىرتقاسىن حيرۋرگيالىق جولمەن تۇزەتىپ بەردى. ناقتىراق ايتقاندا, قيسايعان سۇيەگىن تۇزەتىپ, دەنەسىن تىك ۇستاۋ ءۇشىن ارنايى تەمىر قۇرىلعىنى ارقا تۇسىنا ورناتىپ بەرگەن. ون جىلدىق تاجىريبەسى بار ەلوردالىق ماماندار مۇنداي وتانىڭ كۇردەلىلىگىن اتاپ ءوتتى.
«وڭتۇستىك وڭىرىندە حالىق سانى كوپ بولعاندىقتان, سكوليزگە شالدىققان ناۋقاس بالالار سانى دا بۇل ايماقتا كوپ ەكەنىن ايتۋعا بولادى. سوندىقتان مۇنداي جوعارى مامانداندىرىلعان وتانى ايماقتارعا كەلىپ, جەرگىلىكتى ماماندارمەن تاجىريبە بولىسكەنىمىز دۇرىس. بۇل جولى ءبىز قالالىق كلينيكالىق بالالار اۋرۋحاناسىنا كەلىپ, وسىنداي كۇردەلى وتا جاسادىق. وپەراتسيا ءساتتى ءوتتى. وتا جاساۋ بارىسىندا بۇل اۋرۋحانانىڭ جوعارى مامانداندىرىلعان حيرۋرگيالىق ەم جاساۋعا مۇمكىندىگى بار ەكەنىن بايقادىق. بۇل ءۇشىن جەرگىلىكتى مامانداردىڭ بىلىكتىلىگى جەتەدى», دەيدى نۇر-سۇلتان قالاسىنداعى «انا مەن بالا» ۇلتتىق عىلىمي ورتالىعى ورتوپەديا ءبولىمىنىڭ جەتەكشىسى بولات ناعىمانوۆ.
دارىگەردىڭ ايتۋىنشا, وتادان كەيىن ناۋقاستىڭ جاعدايى بۇرىنعىدان جاقسارا تۇسەدى. ياعني, ومىرتقانىڭ قيسايۋىنان پايدا بولعان بۇكىرلىگى جويىلادى جانە بويىنىڭ ۇزىندىعى قالپىنا تۇسەدى.
ايتا كەتسەك, مۇنداي وتا نۇر-سۇلتان قالاسىندا 2010 جىلدان بەرى جاسالىپ كەلەدى. جىلىنا ورتاشا ەسەپپەن سكوليوز اۋرۋىنا شالدىقان 150-گە جۋىق بالاعا كۇردەلى وپەراتسيا جاسالادى.
نۇر-سۇلتاندىق دارىگەرلەردىڭ قاتىسۋىمەن وتكەن وتاعا جەرگىلىكتى دارىگەرلەر قاتىسىپ, ارىپتەستەرىمەن تاجىريبە الماستى. جوسپار بويىنشا قالالىق كلينيكالىق اۋرۋحانا ماماندارى تاعى دا كۇردەلى تراۆماتولوگيالىق وتا جاساۋ بارىسىن جەتىك مەڭگەرىپ, جەرگىلىكتى دەڭگەيدە دامىتۋدى قولعا الماق.
