رەسپۋبليكالىق فورۋمنىڭ اشىلۋ سالتاناتىنا جامبىل وبلىسىنىڭ اكىمى بەردىبەك ساپارباەۆ قاتىسىپ, ەلىمىزدىڭ مەملەكەتتىك حاتشىسى قىرىمبەك كوشەرباەۆتىڭ قۇتتىقتاۋ حاتىن وقىپ بەردى. سونداي-اق اكىم جۋىردا عانا تاراز قالاسىندا بوي كوتەرگەن «اناعا تاعزىم» ورتالىعىنىڭ جۇمىسى ءاربىر ايەلدىڭ وتباسىنداعى ءرولىن كۇشەيتۋگە, سالت-ءداستۇرىمىزدى دارىپتەۋگە جانە بولاشاق انالاردى تاربيەلەۋگە باعىتتالاتىنىن جەتكىزدى. «بۇگىنگى «اناعا تاعزىم» فورۋمى سۇلۋلىق پەن ىزگىلىكتىڭ بەينەسى سانالىپ, سونداي-اق تۇتاس ەلىمىزدىڭ دامۋىنا ۇيىتقى بولار قازاقتىڭ اناسى دەگەن اتقا لايىق, XXI عاسىر ايەلىنىڭ قالىپتاسۋىنا ءوز ۇلەسىن تيگىزەدى دەپ ويلايمىن. قازاقتا «اكە ۇلدى تاربيەلەيدى, انا تۇتاس ۇلتتى تاربيەلەيدى» دەگەن قاناتتى ءسوز بار. راسىندا, انا بالاسىنا بەرگەن تاربيەسى ارقىلى بولاشاقتىڭ قالىپتاسۋىنا دا ىقپال ەتەدى. سىزدەر ەلىمىزدىڭ دامۋى مەن وركەندەۋىنە, قوعامدىق-ساياسي جانە رۋحاني الەۋەتىن ىسكە اسىرۋعا بەلسەندى اتسالىسىپ كەلەسىزدەر. قازىرگى كەزدە ءبىزدىڭ وبلىسىمىزدا 36 مىڭ 629-دان اسا كوپبالالى انا بار بولسا, ونىڭ 19 مىڭ 212-ءسى «التىن القا» جانە «كۇمىس القا» يەگەرلەرى. «اتامەكەن» كاسىپكەرلەر پالاتاسى جانىنان قۇرىلعان «ىسكەر ايەلدەر» كەڭەسىنە 25-تەن استام كاسىپكەر ايەلدەر مۇشە. وبلىستىڭ دەپۋتاتتىق كورپۋسىنىڭ 33 پايىزىن ايەل-ازاماتشالار قۇرايدى. قازاقتىڭ وسىنداي مىقتى ارۋلارى باردا ەلدىڭ ەرتەڭىنە دەگەن سەنىمىمىز ارتا تۇسەتىنى ءسوزسىز» دەدى ب.ساپارباەۆ.
ءوز سوزىندە قازاقستان حالقى اسسامبلەياسى رەسپۋبليكالىق انالار كەڭەسىنىڭ ءتورايىمى, ەلىمىزدىڭ پرەمەر-ءمينيسترىنىڭ كەڭەسشىسى ءنازيپا شاناي ءىس-شارانىڭ ماڭىزدىلىعىنا توقتالىپ, انا مەن بالانى قولداۋ, وتباسىلىق قۇندىلىقتاردى نىعايتۋ جانە دامىتۋ – مەملەكەتتىڭ الەۋمەتتىك ساياساتىنىڭ باستى باعىتتارىنىڭ ءبىرى ەكەندىگىن ايتتى. «ايەلدىڭ باستى ميسسياسى – دۇنيەگە ۇرپاق اكەلۋ. ۇيادا بالا نە كورسە, ۇلكەن ومىرگە قانات قاعىپ ۇشقاندا سونى ىستەيدى. بالا تاربيەسىندە انانىڭ ءرولىن ايتىپ جەتكىزۋ مۇمكىن ەمەس», دەدى ول.
سونداي-اق قوعام قايراتكەرى اسىلى وسمان ۇرپاق تاربيەسى تاقىرىبىندا ءسوز قوزعاپ, وسى ورايدا ءوتىپ جاتقان فورۋمنىڭ ەرەكشە ءمانى بار ەكەنىن جەتكىزدى. ء«دال وسى قوعامدا قازاقتىڭ بويىنا بىتكەن اسىل قاسيەتتەرى بىزدەن الشاقتاپ بارا جاتىر. سول الشاقتىقتىڭ ورنىن تولتىرۋعا انالار ۇلكەن ۇلەس قوسادى. ءتالىم-تاربيە انانىڭ اق سۇتىمەن, بەسىك جىرىمەن بالانىڭ بويىنا داريدى. ۇلى تۇلعالار دا اق جاۋلىقتى انالاردىڭ ءتالىمىن الادى. مەنىڭ پايىمىمشا, بۇگىنگى قوعامدا ەڭ الدىمەن, تاربيەگە باسىمدىق بەرۋ قاجەت. ول – ۇلتتىق تاربيە بولۋعا ءتيىس. ياعني ءبىلىم – الەمدىك, تاربيە – ۇلتتىق بولعانى ءجون», دەدى ا.وسمان.
ال قوعام قايراتكەرى, ء«ۇش بايلىق» قوعامدىق بىرلەستىگىنىڭ ءتورايىمى ورازكۇل اسانعازىقىزى دا ءوز سوزىندە قوعامداعى تاربيە, ءتىل ماسەلەلەرىنە توقتالدى. «اتادان – وسيەت, انادان – قاسيەت» دەگەن اتالى ءسوز بار. ونە بويى دانالىققا تولى, اقىلى دارياداي اتا-اجەلەرىمىز ءاربىر شاڭىراقتا, ءاربىر وڭىردە بار. قازاقتىڭ سالت-ءداستۇرىن, ادەت-عۇرپىن ساقتاعان وتباسىلار دا جەتەرلىك. ءبىز سونداي وتباسىلاردى, قاريالارىمىزدى قوعامعا, جاستارعا ناسيحاتتاۋىمىز كەرەك», دەدى و.اسانعازىقىزى.
جيىنعا قاتىسقان بەلگىلى اقىن, مەملەكەتتىك سىيلىقتىڭ لاۋرەاتى اقۇشتاپ باقتىگەرەەۆا, قازاقستان ىسكەر ايەلدەرى قاۋىمداستىعىنىڭ پرەزيدەنتى راۋشان سارسەمباەۆا, تۇركيا مەملەكەتىنىڭ بۋرسا ايماعىنداعى اۋىل ايەلدەرى قاۋىمداستىعىنىڭ ءتورايىمى سەرمين چاكالىوگلۋ, تانىمال ەتنوديزاينەر, «التىن وردا» ديزاين ءۇيىنىڭ نەگىزىن قالاۋشى ىرزا تۇرسىنزادا, اتىراۋ وبلىسى اكىمىنىڭ ورىنباسارى باقىتگۇل حامەنوۆا, قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى گۇلميرا قاناي, قوعام بەلسەندىسى, كوپبالالى انا التىن كانيكار ءسوز الىپ, قوعامداعى ايەل-انانىڭ ءرولىنىڭ ماڭىزدى ەكەنىن, قازاق حالقى ارقاشان اناسىن سىيلاپ, قىزىنا قۇرمەت كورسەتەتىنىن ايتىپ, وزدەرىنىڭ ۇسىنىستارىن ءبىلدىردى. بۇل رەتتە وبلىس اكىمى ب.ساپارباەۆ ايتىلعان بارلىق ۇسىنىس نازارعا الىناتىنىن ايتىپ, «اناعا تاعزىم» جوباسى قۇرىلىسىن ءوز ەسەبىنەن جۇزەگە اسىرعان كاسىپكەر-مەتسەنات, «ارايسترويماركەت-2003» كومپانيالار توبىنىڭ باسشىسى ارمان ەدىلباەۆ پەن تەننيس جانە گيمناستيكا ورتالىعىن سالىپ بەرگەن كاسىپكەر, «تارازستروي2004» جشس باسشىسى مەيىربەك ءجۇنىسوۆتى ماراپاتتادى. جيىن سوڭىندا «اناعا تاعزىم» ورتالىعىنىڭ ديرەكتورى ەلميرا مىرزا-عالي فورۋمنىڭ قورىتىندى ۇندەۋىن وقىدى. ودان ءارى فورۋم جۇمىسى ءتورت سەكتسيا بويىنشا جالعاستى. سونىمەن قاتار م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ «ۇستاز» ينستيتۋتىندا اقۇشتاپ باقتىگەرەەۆامەن «سىڭلىگە سىر» اتتى ستۋدەنتتەردىڭ كەزدەسۋ كەشى ءوتتى.
جامبىل وبلىسى
