وتكەن سارسەنبىدە 12 ۆاگونى بار شاپشاڭ جۇرەتىن پويىز سىناقتان ءساتتى وتكەنى بەلگىلى بولدى. جۇرگىزۋشىسى پويىزدى اۆتوماتتى رەجىمگە وتكىزگەن سوڭ, تەمىر تۇلپار ءمۇلت كەتكەن جوق. بۇل پويىزدار ە7 نۇسقاسى رەتىندە جاسالعان. ول ديسپەتچەرلىك پۋنكتتەن قاشىقتان باسقارىلادى.
بۇل – جاپونيادا وتە شاپشاڭ جۇرەتىن پويىزدىڭ اۆتونومدىق جۇمىسىنىڭ العاشقى سىناعى. باستى ماقسات – ءماشينيسسىز جۇرەتىن پويىزدى قولدانىسقا ەنگىزۋ. ايتسە دە, سىناق كەزىندە قانداي دا ءبىر توتەنشە جاعدايعا جول بەرمەس ءۇشىن لوكوموتيۆكە بىرنەشە جۇرگىزۋشى مەن قىزمەتكەر ءمىندى.
پويىز نيگاتا ستانساسىنان 5 شاقىرىم الىستاعان سوڭ, جىلدامدىعىن ساعاتىنا 110 شاقىرىمعا دەيىن ۇلعايتىپ, سينكانسەن نيگاتا ۆوكزالىندا توقتادى. ۆاگوندار جوسپارلى ورىنعا 8 سانتيمەترگە جەتپەي قالعان. بىراق كومپانيا وكىلدەرىنىڭ ايتۋىنشا, مۇنى قالپىنا كەلتىرۋ وڭاي. ويتكەنى 50 سانتيمەترگە دەيىنگى ارالىقتا اۋىتقۋلاردىڭ العاشقى سىناقتا بولۋى قالىپتى جاعداي.
East Japan Railway كومپانياسىنىڭ رەسمي وكىلى اۆتونومدى پويىزدىڭ توقتاۋ ءادىسى ماشينيست جۇمىسىنا «تەڭ كەلەتىنىن» ايتىپ, كومپانيا ونى ءالى دە جەتىلدىرۋ جۇمىستارىن جۇرگىزەتىنىن جەتكىزدى. جاپونيادا تەمىر جولدا اۆتوماتتى باسقارۋ جۇيەلەرى جەردەگى جانە وتكەلدەرى جوق كەيبىر مونورەلستى جولدارعا ەنگىزىلگەن.
