ۋكراينانىڭ جوعارعى راداسى زاڭ قابىلدادى. وعان سايكەس ەلدىڭ شەكارا قىزمەتىنىڭ جەكە قۇرامى اسكەري تەحنيكا مەن قارۋ-جاراقتى پايدالانۋ ءتارتىبىن وزگەرتەدى. وزدەرى جاڭاشىلدىق دەپ اتاعان زاڭ جوباسىنا 271 دەپۋتات ماقۇلداپ داۋىس بەردى, ەندى قۇجاتقا پرەزيدەنت قول قويۋى كەرەك.
زاڭ باستاماشىلارىنىڭ ءبىرى, «حالىقتىڭ قىزمەتشىسى» پارتياسىنىڭ دەپۋتاتى يۋري زدەبسكي اتاپ وتكەندەي, بۇگىنگى تاڭدا رەسەي, بەلارۋس جانە مولدوۆامەن شەكاراداعى جەر ۋچاسكەسىنىڭ 70%-ى بەلگىلەنبەگەن.
«تاۋەلسىزدىكتىڭ 30 جىلى ىشىندە ءبىزدىڭ شەكارامىزدىڭ بويىنداعى جەرلەر ءبولىندى. شەكاراشىلار بۇگىندە ەسكەرتۋ بەلگىلەرىن قويۋعا ءماجبۇر بولىپ وتىر. شەكارا ءدال ورمان القاپتارى ارقىلى وتەدى. ولار ءتىپتى ءوز مىندەتتەرىن قالىپتى تۇردە ورىنداي المايدى. شىن مانىندە, شەكارادا ادام وتەتىن قۋىس بار», دەدى زدەبسكي ءوز سوزىندە.
ول بۇعان دەيىن شەكاراشىلار ءىىم بۇيرىقتارىن باسشىلىققا الا وتىرىپ, بارلىق كۇشتەر مەن قۇرالداردى قولدانعانىن, ال قۇجات قابىلدانعان جاعدايدا تەحنيكانى زاڭدى تۇردە «جوعارىدان» قوسىمشا بۇيرىقتارسىز قولدانا الاتىندىعىن اتاپ ءوتتى.
جاڭا زاڭ شەكارا قىزمەتىنىڭ قىزمەتكەرلەرىنە ءوز قالاۋى بويىنشا ادامداردان زاتتاي دالەلدەمەلەر نەمەسە بىرەۋدىڭ ءومىرى مەن دەنساۋلىعىنا زيان كەلتىرۋى مۇمكىن جەكە زاتتارىن الۋعا مۇمكىندىك بەرەدى. سونداي-اق, زاڭ اتىس قارۋىن اسكەري نەمەسە مەملەكەتتىك قىزمەت قىزمەتكەرىنە, ولاردىڭ ومىرىنە نەمەسە دەنساۋلىعىنا قاۋىپ تونگەن جاعدايدا شابۋىلدى تويتارۋ, ادامداردى شابۋىلدان قورعاۋ ءۇشىن پايدالانۋعا مۇمكىندىك بەرەدى.
بۇعان دەيىن ۋكراينانىڭ ەكس-پرەزيدەنتى پەتر پوروشەنكو قازىرگى بيلىكتەن كوشى-قون داعدارىسىنا بايلانىستى بەلارۋس ەلىمەن شەكارادا اسكەر ورنالاستىرۋدى تالاپ ەتكەن بولاتىن. زەلەنسكي كەڭسەسىنىڭ شتاتتان تىس كەڭەسشىسى الەكسەي ارەستوۆيچ پولشا-بەلارۋس شەكاراسىنداعى شيەلەنىستى جاعدايدى رەسەي فەدەراتسياسىنىڭ جوسپارلانعان وپەراتسياسى دەپ اتادى.
بۇعان باق كيەۆ شەكارانى نىعايتۋ ءۇشىن شامامەن 800 مىڭ دوللار بولەتىنىن حابارلاعان بولاتىن.
