مينيستر 2022 جىلى مۇناي باعاسى باررەلىنە 64,5 دوللار, ال 2023 جىلى باررەلىنە 58 دوللار دەڭگەيىندە بولاتىنىن اتاپ ءوتتى. بۇل بولجام پاندەميادان كەيىنگى قالپىنا كەلتىرۋ بويىنشا جاھاندىق ترەندتەر ەسكەرىلە وتىرىپ قالىپتاستىرىلدى.
«2022 جىلى مۇناي ءوندىرۋ 87,9 ملن توننانى قۇرايدى, بۇل 2026 جىلى 107,4 ملن تونناعا دەيىن ارتادى. مۇناي ءوندىرۋدىڭ ءوسۋى 2023 جىلى كاسپي قۇبىر كونسورتسيۋمى مۇناي قۇبىرىنىڭ قازاقستاندىق ۋچاسكە بويىنشا قۋاتىن ارتتىرۋ ءۇشىن ونىڭ تار جەرلەرىن جويۋ جوباسىن ىسكە اسىرۋ ەسەبىنەن كۇتىلۋدە», دەدى اسەت ەرعاليەۆ سەناتتىڭ جالپى وتىرىسىندا.
ەكونوميكا مينيسترلىگى باسشىسىنىڭ ايتۋىنشا, 2022 جىلى الەمدىك ەكونوميكانىڭ 4,9%-عا, ال 2023 جىلى 3,5%-عا ءوسۋى كۇتىلۋدە.
كەلەسى جىلى ءجىو-ءنىڭ ناقتى ءوسىمى 3,9% دەڭگەيىندە بولجانۋدا. ال 2026 جىلى ول 5,2%-عا جەتەدى.
