«2020 جىلى «جەتىسۋ» فۋتبول كلۋبىنىڭ بيۋدجەتى - 3,4 ملرد تەڭگە, ال ۆولەيبول كلۋبىنىڭ بىلتىرعى بيۋدجەتى - 800 ملن تەڭگە بولعان. 2021 جىلى «جەتىسۋ» فۋتبول جانە ۆولەيبول كلۋبتارىن ۇستاۋعا جۇمسالاتىن شىعىندى قىسقارتۋعا قاتىستى 2,9 ملرد تەڭگە ۇنەمدەلىپ, ول قاراجات قايتا باعىتتالدى», دەدى الماتى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى نۇرباقىت تەڭىزباەۆ وبلىس ءماسليحاتىنىڭ بىرلەسكەن وتىرىسىنداعى بايانداماسىندا.
باسقارما باسشىسىنىڭ ايتۋىنشا, ۇنەمدەلگەن قارجى ەسەبىنەن 127 Street workوaut سپورت الاڭى ورناتىلادى.
«ماسەلەن, بۇقارالىق سپورتتى دامىتۋ ماقساتىندا وبلىستا 127 street workوut الاڭىن ورناتۋعا 361 ملن 500 000 تەڭگە, شاعىن فۋتبول الاڭدارىن جانە 35 سپورت الاڭىن اشۋعا 374,9 ملن تەڭگە, الاكول اۋدانىنىڭ لەپسى اۋىلىندا دەنە شىنىقتىرۋ-ساۋىقتىرۋ كەشەنىنىڭ قۇرىلىسىن باستاۋعا 388,2 ملن تەڭگە ءبولىندى», دەدى نۇرباقىت تەڭىزباەۆ.
باسقارمانىڭ اقپاراتىنا سايكەس, جالپى وبلىستىڭ اۋداندارى مەن قالالارىنىڭ 45 سپورت مەكتەبىندە 74 سپورت تۇرىمەن 44 038 سپورتشى شۇعىلدانادى.
«بارلىق قولدانىستاعى سپورتتىق نىساندار دەنە شىنىقتىرۋ جانە سپورتپەن شۇعىلدانۋ ءۇشىن قول جەتىمدى جانە تەگىن تۇردە قىزمەت جاسايدى. وبلىستا دەنە شىنىقتىرۋمەن جانە سپورتپەن جۇيەلى تۇردە اينالىساتىنداردىڭ سانى - 667 428 ادام. بۇل - وبلىس حالقىنىڭ 32%», دەپ قوستى باسقاراما باسشىسى.
ايتا كەتسەك, بۇگىن الماتى وبلىستىق ءماسليحاتىنىڭ ەكى كوميسسياسىنىڭ بىرلەسكەن وتىرىسى ءوتتى. باسقوسۋدا باسقارما باسشىلارى 10 ايدا اتقارىلعان جۇمىستى بايانداپ, الداعى جوسپارىن ءبولىستى.
