ول گولدىڭ ءوزىن تاجىكستان قۇراماسىنىڭ بىزگە جاساعان «سىيلىعى» دەپ تە قابىلداۋعا بولاتىن شىعار. ويتكەنى ماتچتىڭ 12-مينۋتىندا قوناقتاردىڭ قاقپاشىسى شوحرۋح كيرگيزبوەۆ ارىپتەسىنە پاس بەرۋ كەزىندە قاتەلەسىپ, بايقاۋسىزدا دوپتى باقتيەر ءزاينۋتدينوۆتىڭ اياعىنا سالىپ بەردى. رەسەي بىرىنشىلىگىندە ونەر كورسەتەتىن جارتىلاي قورعاۋشىمىز بوس قاقپانى ءدال كوزدەپ, ويىنداعى جالعىز ءارى جەڭىس گولىن سوقتى. بۇدان كەيىن زاينۋتدينوۆتە گول سوعاتىن تاعى ءبىر-ەكى مۇمكىندىك بولدى. الايدا ونىڭ تەپكەن دوپتارى قاقپا تورىنان تابىلمادى. بىردە قاقپا باعانى ىسكە كىرىسسە, كەيىنگىسىندە ويىنعا تورەشى ارالاستى. ياعني 60-مينۋتتا تاجىكستان قاقپاسىنىڭ ماڭىندا زاينۋتدينوۆكە قارسى ويىن ءتارتىبى بۇزىلعانىمەن, بەلارۋستەن كەلگەن باس تورەشى امين كۋرگحەلي 11 مەترلىك ايىپ دوبىن بەلگىلەمەدى. قالعان ۋاقىتتا قازاقستان قۇراماسىنىڭ فۋتبولشىلارى بىردە-ءبىر قاۋىپتى شابۋىلمەن كوزگە تۇسە المادى. جەرلەستەرىمىز ەسەپتە الدا بولعانىمەن, ويىن بەلگىلى ءبىر ولشەممەن قاراعاندا تاجىكستان قۇراماسىنىڭ باسىمدىعىمەن وتكەندەي اسەر قالدىردى.
ءبىرىنشى تايمنىڭ ستاتيستيكاسىنا سۇيەنسەك, دوپقا يەلىك ەتۋ بويىنشا تاجىكستان فۋتبولشىلارى الدا بولدى – 52 پايىز. سونىمەن قاتار ءبىزدىڭ قاقپامىزعا جەتى مارتە سوققى جاسادى. ال تالعات بايسۋفينوۆ شاكىرتتەرى العاشقى 45 مينۋتتا دوپتى وزدەرىندە 48 پايىز ۇستاپ, قارسىلاستارىنىڭ قاقپاسىنا نەبارى بەس سوققى جاساعان.
ەكىنشى تايمدا دا تاجىكستان قۇراماسى بەلسەندىلىك بويىنشا ءبىزدىڭ فۋتبولشىلاردىڭ الدىن وراپ كەتتى. بۇل جولى ولار دوپقا 58 پايىز يەلىك ەتتى. ءۇش مارتە يگور شاتسكي قورعاعان قاقپاعا گول سوعۋعا تىرىسىپ كورگەنىمەن, بۇل ويىندا ولارعا گول سوعۋ باقىتى بۇيىرمادى. وسىلايشا, بۇل ويىن قازاقستان قۇراماسى ءۇشىن وتە قيىنعا سوقتى.
قىسقاسى, جەڭىس جانكۇيەرلەرگە اسا ءبىر قۋانىش سىيلاي قويعان جوق. «فرانتسيامەن بولعان ويىندا نەگىزگى قۇرامنىڭ 8 فۋتبولشىسى ءتۇرلى سەبەپپەن پاريجگە بارا المادى. سوندىقتان قوسالقى قۇرام ويىنشىلارىمەن ويناپ, ءىرى ەسەپپەن جەڭىلۋگە ءماجبۇر بولدىق», دەگەندى العا تارتقان باس باپكەر دە, فەدەراتسيا باسشىلىعى دا ەندى نە دەپ اقتالار ەكەن؟ ويتكەنى الەم بىرىنشىلىگىنىڭ ىرىكتەۋ كەزەڭىندەگى سوڭعى ويىنعا قاتىسا الماعان سەگىز فۋتبولشىنىڭ ءبىرازى كەشەگى ويىندا ءبىرىنشى مينۋتتان باستاپ الاڭعا شىقتى. ايتكەنمەن ەشقايسىسى جارىتىپ ويناي المادى. فرانتسياداعى ماسقارادان كەيىن نامىسى بار جىگىتتەر ءوز قاتەلىكتەرىن جۋىپ-شايىپ, جانكۇيەرلەردىڭ بەتىن بەرى قاراتۋ ءۇشىن الاڭدا جان بەرىپ, جان الىسۋى كەرەك ەدى. جوق, ءبىزدىڭ جىگىتتەر قۇددى 10:0 ەسەبىمەن جەڭىپ جاتقان سياقتى, مەيلىنشە قاقپاعا گول وتكىزىپ الماۋدىڭ بار امالىن قاراستىردى.
قازاقستان مەن تاجىكستان قۇرامالارى بۇگىنگە دەيىن جاسىل الاڭدا بەس رەت جولىعىپ, ءتورت كەزدەسۋدە جەرلەستەرىمىزدىڭ مەرەيى ۇستەم بولدى. ءبىر ويىندا ەكى ەلدىڭ كۇشتەرى تەڭ ءتۇستى. قازاقستان ازيا قۇرلىعىندا جۇرگەندە تاجىكستانمەن ءبىر ويىن وتكىزسە, ۋەفا-عا مۇشە بولعاننان كەيىن ءتورت مارتە كەزدەستى. ەكى ەلدىڭ ەڭ العاشقى ويىنى 1994 جىلى وزبەكستاننىڭ تاۋەلسىز كۋبوگى تۋرنيرىندە ءوتىپ, قازاقستان 1:0 ناتيجەسىمەن جەڭىسكە جەتتى. 2006 جىلعى الماتىداعى جولداستىق ماتچتا جەرلەستەرىمىز 4:1 ەسەبىمەن باسىم تۇسسە, 2007 جىلى 1:1 ناتيجەسىمەن تەڭ وينادى. ال 2014 جىلى – 2:1, 2021 جىلى 1:0 ەسەبىمەن ۇتتى. بارلىق ماتچتى ءوز الاڭىمىزدا وتكىزە تۇرا, تاجىكتەردى كەيىنگى ەكى ويىندا تەك ءبىر دوپ ايىرماشىلىعىمەن عانا جەڭىپپىز. وسىدان-اق قاي ەلدىڭ فۋتبولى قاي دەڭگەيدە ەكەنىن اڭعارۋعا بولادى. سوڭعى ماتچ نۇر-سۇلتاندا ەمەس, دۋشانبەدە وتكەندە تابلوداعى كورسەتكىش مۇلدە باسقاشا بولار ما ەدى, كىم ءبىلسىن؟!
