Pfizer-ءدى اقى تولەپ سالدىرۋعا بولادى
دەنساۋلىق ساقتاۋ ءمينيسترى الەكسەي تسويدىڭ مالىمەتىنشە, قازاقستاندا سوڭعى ەكى اپتادا كۆي-مەن سىرقاتتانۋ دەڭگەيى 23 پايىزعا تومەندەگەن. الەمدىك رەيتينگكە سايكەس, قازاقستان سىرقاتتانۋ كورسەتكىشى بويىنشا 105-ورىندا, ال ءولىم-ءجىتىم كورسەتكىشى بويىنشا 101-ورىندا تۇر. بۇگىنگى تاڭدا «قىزىل ايماقتا» ەكى ءوڭىر قالىپ وتىر – پاۆلودار جانە سولتۇستىك قازاقستان وبلىستارى. 5 ءوڭىر «سارى ايماقتا» – قاراعاندى, قوستاناي, اقمولا, اتىراۋ وبلىستارى جانە نۇر-سۇلتان قالاسى. جالپى, رەسپۋبليكا مەن قالعان 10 ءوڭىر «جاسىل ايماقتا» ورنالاسقان.
قازاقستاندا سوڭعى ەكى ايدا سىرقاتتانۋشىلىق 3,8 ەسە, ال ءولىم-ءجىتىم 2,4 ەسە تومەندەگەن. رەسپۋبليكا بويىنشا بيىل 1 تامىزدان باستاپ ينفەكتسيالىق توسەكتەردىڭ جۇكتەمەسى 56 پايىزدان 30 پايىزعا دەيىن, رەانيماتسيالىق توسەكتەر جۇكتەمەسى 45 پايىزدان 27 پايىزعا دەيىن ازايعان. ەم الۋشىلار سانى دا تومەندەپ وتىر. سوڭعى ءۇش ايدا ناۋقاستار سانى 2,6 ەسە ازايعان.
حالىقتى COVID-19-عا قارسى ۆاكتسينالاۋ شارالارى جالعاسىپ جاتىر. بۇگىنگە دەيىن 8,5 ملن-نان استام ادام ۆاكتسينانىڭ 1-ءشى كومپونەنتىن العان. بۇل جالپى حالىق سانىنىڭ 45,3 پايىزىنا تەڭ. 2-ءشى كومپونەنتتى 7,8 ملن-عا جۋىق ادام الىپتى. بۇل جالپى حالىق سانىنىڭ 41,5 پايىزىن قۇرايدى. الەمدىك رەيتينگكە سايكەس, قازاقستان حالىقتى ەكى دوزامەن ۆاكتسينالاۋ بويىنشا 104-ورىندا تۇر. تمد ەلدەرىنىڭ ىشىندە قازاقستان, رەسەي جانە ازەربايجان حالىقتى ۆاكتسينالاۋ كورسەتكىشىن 40 پايىزدان اسىرا ورىنداعان.
– قازاقستانعا 379 مىڭ دوزا مولشەرىندە Pfizer ۆاكتسيناسىنىڭ ءبىرىنشى پارتياسى جەتكىزىلدى. ەكىنشى پارتيانى جەتكىزۋ 20 قاراشاعا دەيىن جوسپارلانعان. ۆاكتسينالاۋ رەسپۋبليكانىڭ 7 وڭىرىندە باستالدى. ولار جامبىل, قاراعاندى, قىزىلوردا, تۇركىستان وبلىستارى جانە الماتى, نۇر-سۇلتان, شىمكەنت قالالارى. بۇگىنگى تاڭدا 1 313 بالا مەن 247 جۇكتى جانە بالا ەمىزەتىن ايەل ۆاكتسينا الدى, – دەدى ا.تسوي.
ەل اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ تاپسىرماسىنا سايكەس, Pfizer ۆاكتسيناسىن كوممەرتسيالىق نارىقتا حالىقتىڭ قالاۋى بويىنشا اقىلى نەگىزدە ۆاكتسينالاۋ ءۇشىن ساتۋ مۇمكىندىگىن قاراستىرۋ تۋرالى ۇكىمەت قاۋلىسىنىڭ جوباسى ازىرلەندى.
– اۋرۋدى تالداۋ جۇمىستارى جاعدايى اۋىر ناۋقاستار مەن جالپى سىرقاتتانۋشىلاردىڭ نەگىزگى ۇلەسى ۆاكتسينا الماعان حالىققا تيەسىلى ەكەنىن كورسەتتى. وسىعان ۇقساس جاعداي وكپەنى جاساندى جەلدەتۋدە جاتقان ناۋقاستاردىڭ سانىنا بايلانىستى دا قالىپتاسىپ وتىر. ۆاكتسينالاۋدىڭ تيىمدىلىگى ايقىن بايقالىپ وتىر. سوندىقتان وسى ۋاقىتقا دەيىن ەكپە الماعان ازاماتتاردى دۇرىس شەشىم قابىلداۋعا شاقىرامىن, – دەدى مينيستر.
كوتەرىلگەن ماسەلەنى تۇيىندەگەن ۇكىمەت باسشىسى سانيتارلىق تالاپتاردى قامتاماسىز ەتۋ جانە مونيتورينگتىك توپتاردىڭ ولاردى ساقتاۋىن باقىلاۋ بويىنشا شارالار قابىلداۋدى ودان ءارى جالعاستىرۋدى تاپسىردى. سونداي-اق حالىقتى ۆاكتسينالاۋمەن جانە رەۆاكتسينالاۋمەن قاجەتتى كولەمدە قامتاماسىز ەتۋدىڭ ماڭىزدىلىعىن اتاپ ءوتتى.
– ءبىز قازىر دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسى بويىنشا ۆاكتسينالاۋعا جاتاتىن ادامدار ساناتىن كەڭەيتىپ جاتىرمىز. جاسوسپىرىمدەردى, جۇكتى جانە بالا ەمىزەتىن انالاردى ۆاكتسينالاۋ باستالدى. ادامداردىڭ وزدەرىنىڭ تاڭداۋى بويىنشا قاجەت ۆاكتسينانى اقىلى تۇردە الۋ مۇمكىندىگى بولۋى ءۇشىن ۆاكتسينانى كوممەرتسيالىق نارىق سەگمەنتىنە جەتكىزۋ تۋرالى ۇسىنىستى قولدايمىن, – دەدى اسقار مامين.
ەسكە سالا كەتەيىك, قازاقستاندا رەۆاكتسيناتسيانى وسى جىلدىڭ 22 قاراشاسىندا باستاۋ جوسپارلانعان. بۇعان دەيىن سالىنعان ۆاكتسينانىڭ تۇرىنە قاراي, ەكىنشى كومپونەنتتى العان ساتىنەن باستاپ 6-9 اي وتكەن ازاماتتار ەگىلەتىن بولادى.
ءتورت ءوڭىردىڭ كورسەتكىشى تومەن
يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆتىڭ بايانداۋىنشا, 2025 جىلعا دەيىن قازاقستان حالقى 100 پايىز ساپالى اۋىز سۋمەن قامتاماسىز ەتىلۋى ءتيىس. بۇل مىندەت «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى شەڭبەرىندە جۇزەگە اسىرىلماق.
– 2020 جىلدىڭ قورىتىندىسى بويىنشا ەلدەگى سۋمەن جابدىقتاۋ قىزمەتتەرىنە قولجەتىمدىلىك دەڭگەيى 94,1 پايىزدى قۇرادى. ونىڭ ىشىندە اۋىلداردا 90,1 پايىز, قالالاردا – 97,5 پايىز. وسى جىلدىڭ سوڭىنا دەيىن ءتيىستى كورسەتكىش اۋىلداردا 91,8 پايىزعا, قالالاردا 98 پايىزعا جەتۋى ءتيىس, – دەدى ول.
بۇگىنگى تاڭدا وڭىرلەردە تازا اۋىز سۋعا قولجەتىمدىلىك دەڭگەيى ءارتۇرلى. ءۇش وڭىردەگى (اتىراۋ, الماتى جانە قىزىلوردا وبلىستارى) اۋىز سۋمەن قامتۋ دەڭگەيى جوعارى. ال 4 وڭىردە تومەن. ولار – قوستاناي, شىعىس قازاقستان, سولتۇستىك قازاقستان جانە جامبىل وبلىستارى. كورسەتكىشتەرى تومەن وڭىرلەرگە باسىم نەگىزدە قاراجات بولىنەدى. سونداي-اق «اۋىل – ەل بەسىگى» جوباسىنا ەنگەن اۋىلدارعا جانە وڭىرلەردى دامىتۋدىڭ كەشەندى جوسپارلارىندا قامتىلعان جوبالارعا باسىمدىق بەرىلەدى.
ەل بويىنشا بارلىعى 6 316 اۋىل بار. ونىڭ ىشىندە 3 991 اۋىل ورتالىقتاندىرىلعان سۋمەن جابدىقتالعان, 403 اۋىلدا كەشەندى بلوك-مودۋلدەر ورناتىلعان. سۋمەن جابدىقتالماعان 1 922 اۋىلدىڭ ماسەلەسىن شەشۋ ءۇشىن ءتيىستى شارالار قابىلدانۋدا. ياعني 793 اۋىلدا ورتالىقتاندىرىلعان سۋمەن جابدىقتاۋ جۇيەسىن سالۋ جوسپارلانعان. حالىق سانى 200 ادامنان از شاعىن اۋىلداردا كەشەندى بلوك-مودۋلدەر ورناتىلادى. بيىل تاعى 148 اۋىلدى ورتالىقتاندىرىلعان سۋمەن جابدىقتاۋ جانە حالقى از 220 اۋىلعا كەشەندى بلوك-مودۋل ورناتۋ جوسپارلانعان. بۇگىندە ورتالىق سۋمەن جابدىقتاۋ جوسپارلانعان 85 اۋىلدا گيدروگەولوگيالىق جۇمىستار جۇرگىزۋ قاجەت. كەشەندى بلوك-مودۋل ورناتۋ جوسپارلانعان حالقى از 170 اۋىلدا ىزدەستىرۋ-بارلاۋ جۇمىستارى جۇرگىزىلۋى ءتيىس. قالعان 453 اۋىل بويىنشا 2023 جىلعا دەيىن جوبالىق-سمەتالىق قۇجاتتامانى ازىرلەۋدى اياقتاۋ قاجەت.
– جىل سايىن ەلدەگى حالىق سانى ارتۋدا. تيىسىنشە سۋ تۇتىنۋ كولەمى دە ۇلعايادى. حالىقتىڭ كوشى-قونىنا بايلانىستى بۇگىندە 50 اۋىلدا سۋ قۇبىرى جەلىلەرىن كەڭەيتۋ قاجەت. مىسالى, اقمولا وبلىسىنىڭ قاراوتكەل اۋىلىندا ناقتى فاكتى بويىنشا 18 مىڭعا جۋىق ادام تۇرادى. ال 2018 جىلى سالىنعان سۋ قۇبىرى 8 مىڭ ادامعا ارنالعان. 50 اۋىلدا سۋ قۇبىرى جەلىلەرىن كەڭەيتۋ ءۇشىن بيۋدجەتتەن 40 ملرد تەڭگە ءبولۋ قاجەت. اكىمدىكتەر بۇل اۋىلدار ءۇشىن جوبالىق-سمەتالىق قۇجاتتامانى تەز ارادا ازىرلەۋى قاجەت. مينيسترلىك اۋىلداردىڭ سۋمەن جابدىقتالۋىنا مونيتورينگ جۇرگىزۋ ءۇشىن ينتەراكتيۆتى كارتا ازىرلەدى. كارتادا ءاربىر اۋىل بويىنشا قاجەتتى اقپارات بار. اتاپ ايتقاندا, سۋمەن جابدىقتاۋ, قارجىلاندىرۋ, قاراجاتقا قاجەتتىلىك, حالىق سانى, جەلىلەردىڭ ۇزىندىعى, توزۋ جانە تاعى باسقا قاجەتتى مالىمەتتەر قولجەتىمدى. كارتا ينتەرنەتتە اشىق تۇردە ورنالاسقان. كەز كەلگەن ازامات كارتاداعى اۋىلدارمەن تانىسا الادى. ينتەراكتيۆتى كارتا قوسىمشا فۋنكتسيالارمەن جاڭارتىلىپ جاتىر. وندا حالىقپەن كەرى بايلانىس ورناتۋ ءۇشىن سۋ بەرۋ تۇراقتىلىعى جانە كورسەتىلەتىن قىزمەتتەردىڭ ساپاسى تۋرالى اقپارات قوسۋ شارالارى قابىلدانۋدا. اكىمدىكتەر ينتەراكتيۆتى كارتاعا دەرەكتەردىڭ ساپالى جانە ۋاقتىلى تولتىرىلۋىن قامتاماسىز ەتۋى قاجەت, – دەدى ب.اتامقۇلوۆ.
سۋ رەسۋرستارىن ۇتىمدى پايدالانۋ ءۇشىن حالىقتىڭ ءوزى سۋدى ۇقىپتى تۇتىنۋعا مۇددەلى بولۋى كەرەك ەكەنى تۇسىنىكتى. بۇل رەتتە قولايلى ءومىر ءسۇرۋ ءۇشىن جەتكىلىكتى وڭتايلى تۇتىنۋ نورماسىن ايقىنداي وتىرىپ, سارالانعان تاريفتەردى ەنگىزۋ ماڭىزدى. ب.اتامقۇلوۆ اتاپ وتكەندەي, بارلىق وڭىردە سۋ تۇتىنۋعا كەشەندى تالداۋ جۇرگىزۋ جانە ونىڭ نەگىزىندە وتباسىنا وڭتايلى تۇتىنۋ نورماسىن ايقىنداۋ كەرەك. بۇل اۋىز سۋمەن جابدىقتاۋ وندىرىسىنە جانە سارقىندى سۋلاردى تازارتۋعا جۇمسالاتىن شىعىنداردى وڭتايلاندىرۋعا مۇمكىندىك بەرەدى.
ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆتىڭ ايتۋىنشا, قازىرگى ۋاقىتتا رەسپۋبليكا بويىنشا بارلىعى ۇزىندىعى 15,5 مىڭ كيلومەتر بولاتىن 76 توپتىق سۋ قۇبىرى بار. ونىڭ ىشىندە ۇزىندىعى 13,4 مىڭ كيلومەتردى قۇرايتىن 39 توپتىق سۋ قۇبىرى رەسپۋبليكالىق مەنشىكتە. ولار 631 اۋىلدىق ەلدى مەكەندى اۋىز سۋمەن قامتاماسىز ەتەدى.
– 2020 جىلى الماتى, باتىس قازاقستان جانە قىزىلوردا وبلىستارىندا 3 توپتىق سۋ قۇبىرى پايدالانۋعا بەرىلدى. سونىڭ ناتيجەسىندە, 343 كيلومەتر جەلى سالىندى, جالپى حالىق سانى 124,5 مىڭ ادامدى قۇرايتىن 13 اۋىلدىق ەلدى مەكەن مەن 1 قالادا سۋمەن جابدىقتاۋ قامتاماسىز ەتىلدى ءارى ايتارلىقتاي جاقساردى. بيىل توپتىق سۋ قۇبىرلارىن سالۋ جانە قايتا جاڭارتۋ بويىنشا 16 نىسان ىسكە اسىرىلۋدا. ونىڭ ىشىندە جىل سوڭىنا دەيىن 8 نىسان اياقتالادى. بۇگىندە 2 نىسان پايدالانۋعا بەرىلدى. بۇل پرەسنوۆ توپتىق سۋ قۇبىرىنىڭ 2-ءشى كەزەگى جانە ەسكۋلينسك ۋچاسكەسىن كوشىرۋ جۇمىستارى. جۇرگىزىلىپ جاتقان جۇمىستىڭ ناتيجەسىندە, 5 اۋىلدىق ەلدى مەكەن ساپالى اۋىز سۋعا قول جەتكىزدى. سونداي-اق اقمولا, اقتوبە, قاراعاندى جانە قىزىلوردا وبلىستارىندا جالپى سانى 203 مىڭ ادام بولاتىن 51 اۋىلدىق ەلدى مەكەن مەن 3 قالادا سۋمەن جابدىقتاۋ جاقسارتىلادى. قالعان 8 نىساندى 2022-2023 جىلدارى پايدالانۋعا بەرۋ جوسپارلانۋدا, – دەدى س. برەكەشەۆ.
ءمينيستردىڭ ايتۋىنشا, «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى شەڭبەرىندە 5 جىل ىشىندە جالپى قۇنى 36 ملرد تەڭگە بولاتىن 11 توپتىق سۋ قۇبىرىن سالۋ جانە قايتا جاڭارتۋ جوسپارلانۋدا. سونىڭ ناتيجەسىندە, 23,3 مىڭ ادامى بار 63 اۋىلدىق ەلدى مەكەن سۋمەن قامتاماسىز ەتىلەدى جانە 37 اۋىلدىق ەلدى مەكەندە سۋمەن جابدىقتاۋ جاقسارتىلادى. جالپى, 5 جىل ىشىندە شامامەن 1,5 مىڭ كيلومەتر توپتىق سۋ قۇبىرى سالىنىپ, ەلدى مەكەندەردى سۋمەن قامتاماسىز ەتۋ كورسەتكىشىن 100 پايىزعا جەتكىزۋ جوسپارلانۋدا.
ۇكىمەت باسشىسى اۋىز سۋمەن قامتاماسىز ەتىلۋ كورسەتكىشى تومەن وڭىرلەرگە كەلەسى جىلى كورسەتكىشتەردى ورتاشا رەسپۋبليكالىق دەڭگەيگە جەتكىزۋدى تاپسىردى. بۇل رەتتە ەلدى مەكەندەردىڭ ىشىندەگى سۋمەن جابدىقتاۋ جوبالارىن ىسكە اسىرۋدىڭ بارلىق ساتىلارى توپتىق سۋ قۇبىرلارىنىڭ ينفراقۇرىلىمىن جۇرگىزۋ جوسپارلارىمەن ۇيلەستىرىلۋى ءتيىس. سونداي-اق اكىمدىكتەرگە اۋىلداردى سۋمەن جابدىقتاۋ بويىنشا جوبالىق-سمەتالىق قۇجاتتامانى ۋاقتىلى ازىرلەۋ جۇمىسىن جانداندىرۋ قاجەت ەكەنى ايتىلدى. پرەمەر-مينيستر اۆتوماتتاندىرۋ دەڭگەيىن ارتتىرۋدىڭ جانە سۋمەن جابدىقتاۋ سالاسىنا يننوۆاتسيالىق تەحنولوگيالاردى ەنگىزۋدىڭ ماڭىزدىلىعىن اتاپ ءوتتى.
ۇكىمەت باسشىسى ورتالىق مەملەكەتتىك جانە جەرگىلىكتى اتقارۋشى ورگاندارعا اۋىلدىق ەلدى مەكەندەردى اۋىز سۋمەن قامتاماسىز ەتۋ جانە وسى جىلدىڭ قورىتىندىسى بويىنشا جوسپارلى كورسەتكىشتەرگە قول جەتكىزۋ بويىنشا بارلىق قاجەتتى شارالاردى قابىلداۋدى تاپسىردى. ۇلتتىق ەكونوميكا مينيسترلىگىنە يندۋستريا, ەكولوگيا مينيسترلىكتەرىمەن جانە وڭىرلىك اكىمدىكتەرمەن بىرلەسىپ, ينۆەستيتسيالىق شىعىندار, ونىڭ ىشىندە سۋدى پايدالانۋدىڭ تسيفرلى تەحنولوگيالارىن ەنگىزۋ قاجەتتىلىگىن ەسكەرە وتىرىپ, سۋدىڭ تاريفتىك ساياساتىن جەتىلدىرۋ ماسەلەلەرىن پىسىقتاۋ جۇكتەلدى. يندۋستريا مينيسترلىگىنە وڭىرلەردىڭ اكىمدەرىمەن بىرلەسىپ, ەلدى مەكەندەردى سۋمەن جابدىقتاۋدىڭ ينتەراكتيۆتى كارتاسىن وزەكتەندىرۋ تاپسىرىلدى.
جوعارى ءبىلىم بەرۋ ساپاسى جاقسارا ءتۇستى
ءبىلىم جانە عىلىم ءمينيسترى اسحات ايماعامبەتوۆ اتاپ وتكەندەي, قازاقستاندا جوعارى ءبىلىم بەرۋ ساپاسىن ارتتىرۋ بويىنشا جۇيەلى جۇمىس جۇرگىزىلۋدە. ول بىرنەشە باعىتتى قامتيدى. اتاپ ايتقاندا, وڭتايلى باسقارۋ جۇيەسى, اكدەميالىق ساياسات, ءبىلىم باعدارلامالارىنىڭ ساپاسى, قولجەتىمدى قارجىلاندىرۋ, كاسىبي وقىتۋشىلار قۇرامى مەن اكادەميالىق ادالدىق پرينتسيپتەرىن ساقتاۋ جانە ساپانى قامتاماسىز ەتۋدىڭ ءتيىمدى جۇيەسى.
ەلىمىزدەگى 122 ۋنيۆەرسيتەتتىڭ جارتىسى – جەكەمەنشىك ۇيىمدار. باكالاۆريات, ماگيستراتۋرا مەن دوكتورانتۋرا دەڭگەيلەرىندە 600 مىڭنان استام ستۋدەنت ءبىلىم الۋدا. قازاقستاننىڭ 14 جوعارى وقۋ ورنى دۇنيەجۇزىلىك ەڭ ۇزدىك ۋنيۆەرسيتەتتەر رەيتينگىنە ەنگەن. سوڭعى جىلدارى گرانتتار سانى 2 ەسەگە جۋىق وسكەن. 2025 جىلعا قاراي كەزەڭ-كەزەڭمەن گرانت سانى 75 مىڭعا دەيىن جەتەدى. ستۋدەنتتەردىڭ شاكىرتاقىسى دا ەكى ەسەگە جۋىق ۇلعايعان. 2025 جىلعا قاراي ولاردىڭ شاكىرتاقىسى تاعى 2 ەسە, ال ماگيسترانتتار مەن دوكتورانتتاردىڭ ستيپەندياسى 1,5 ەسە ارتادى دەپ كۇتىلۋدە.
– قازاقستان ۋنيۆەرسيتەتتەرىنىڭ بارلىعى جان باسىنا قارجىلاندىرۋ جۇيەسىنە كوشتى. مەملەكەتتىك جانە جەكەمەنشىك ۋنيۆەرسيتەتتەر ولاردى قانشا تالاپكەر تاڭداسا, ءدال سول مولشەردە عانا مەملەكەتتەن گرانت, ياعني, قاراجات الادى. سايكەسىنشە, مەملەكەتتىك جوعارى وقۋ ورىندارى جوندەۋ جۇمىستارىن جۇرگىزۋگە, جالاقى تولەۋگە, ماتەريالدىق بازاسىن جاڭارتۋعا بيۋدجەتتەن تىكەلەي قارجى المايدى. تەك ستۋدەنتتەردىڭ تاڭداۋىنا سايكەس گرانتتارمەن قارجىلاندىرىلادى. ساپانى قامتاماسىز ەتۋ ءۇشىن باسقارۋ جۇيەسىنىڭ ءتيىمدى بولۋى ماڭىزدى. ەڭ ءىرى 28 مەملەكەتتىك جوعارى وقۋ ورنى كوممەرتسيالىق ەمەس اكتسيونەرلىك قوعام رەتىندە قايتا قۇرىلىپ, كورپوراتيۆتى باسقارۋ جۇيەسىنە كوشتى. سايكەسىنشە, بىلتىردان باستاپ باستى شەشىمدەردى ديرەكتورلار كەڭەسى قابىلدايدى, ال رەكتور سول قابىلدانعان شەشىمدەردى ىسكە اسىرۋدى قامتاماسىز ەتەدى, – دەدى مينيستر.
رەكتورلاردى تاعايىنداۋدىڭ جاڭا جۇيەسى ەنگىزىلىپ, اتالعان كونكۋرستىق جۇيە ارقىلى ەكى جىلدا رەكتورلار كورپۋسىنىڭ 50 پايىزىنان استامى جاڭارتىلعان. كونكۋرستىق ءتارتىپتىڭ ناتيجەسىندە ۋنيۆەرسيتەتتەر باسشىلىعىنا حالىقارالىق تاجىريبەسى مەن مول عىلىمي الەۋەتى بار الەمنىڭ ۇزدىك جوعارى وقۋ ورىندارىنىڭ تۇلەكتەرى جانە «بولاشاق» باعدارلاماسىنىڭ ستيپەندياتتارى تاعايىندالعان. بۇعان قوسا, پروۆوست ينستيتۋتى قۇرىلىپ, وقۋ ورىندارىنىڭ كادر رەزەرۆى دە جاساقتالعان. باسقارۋ جۇيەسىندەگى ترانسفورماتسيا ۋنيۆەرسيتەتتەردە يننوۆاتسيالىق مەنەدجمەنتتىڭ دامۋىنا, ونىڭ ساپاسىن كوتەرىپ, تيىمدىلىگىن ارتتىرۋعا اسەر ەتپەك.
ۇكىمەت باسشىسى مامانداردى دايارلاۋ ساپاسىنا بايلانىستى جاڭا كاسىبي ستاندارتتاردى وزەكتەندىرۋ جانە ازىرلەۋ جونىندەگى جۇمىستى جانداندىرۋدى تاپسىردى. تۇلەكتەردى سەرتيفيكاتتاۋدىڭ تاۋەلسىز جۇيەسىن دامىتۋ, ۇلتتىق كاسىپتەر سىنىپتاۋىشىن جاڭارتۋ, قاشىقتان وقىتۋ, ونىڭ ىشىندە جوعارى ءبىلىم بەرۋدە قاشىقتان وقىتۋ فورماتتارىن زاڭنامالىق تۇرعىدان رەگلامەنتتەۋ قاجەتتىگىن اتاپ ءوتتى. ا.مامين 20 مىقتى وڭىرلىك جوعارى وقۋ ورنىن قۇرۋ بويىنشا قارجىلاندىرۋ ماسەلەلەرىن پىسىقتاۋدى جانە پەتروپاۆل مەن شىمكەنتتە «نازارباەۆ ۋنيۆەرسيتەتى» ۇلگىسىندە ەكى جوعارى وقۋ ورنىن اشۋدى تاپسىردى.
