جامبىل وبلىسىنداعى داۋىل سالدارىنان 50-گە جۋىق ازامات مەديتسينالىق كومەك الۋعا ءماجبۇر بولعان.
38 مەتر/سەكۋند جىلدامدىقپەن سوققان جەل سالدارىنان تەك شاتىرلار ۇشىپ قانا قويماي, بىرنەشە عيماراتتىڭ قورشاۋى ب ۇلىنگەن.
قالا اكىمدىگى تاراتقان مالىمەتتەرگە زەر سالساق, جيىرماعا جۋىق ەلەكتر باعاناسى جەر قۇشىپ, 1,5 شاقىرىمدىق ەلەكتر جەلىلەرىنە زاقىم كەلگەن. داۋىلدىڭ كەسىرىنەن جىلۋ بەرۋ ۋاقىتشا توقتاعان. شاھار كوشەلەرىندە كوپتەگەن تالدار, 12 ايالداما قۇلاپ قالعان.
ودان بولەك, 32 باعدارشام ىستەن شىعىپ, 34 بيلبورد, 64 جالاۋشا جىرتىلعان. پيلونداردىڭ 2 دانا كونسترۋكتسياسى مەن 4 بيلبوردتىق كونسترۋكتسيالار قۇلاعان.
قىزىل-اباد, كولتوعان تۇرعىنجاي القاپتارىندا, جەلتوقسان-قوناەۆ كوشەلەرىنىڭ قيىلىسىندا, ايتەكە بي كوشەسى №11 ءۇيدىڭ ماڭىنداعى 6 سپورت الاڭشالارىنىڭ قورشاۋلارىنا زاقىم كەلگەن. ءبىلىم الۋشىلار ۇيلەرىنە جىبەرىلىپ, ونلاين وقۋ جۇيەسى قوسىلعان.
شاھاردا قۇلاعان اعاشتاردى كەسۋ جانە تازالاۋ جۇمىستارىنا «جاسىل ەل-تاراز» جشس-ءنىڭ قىزمەتكەرلەرى, 6 بريگادا تارتىلىپ, ءتيىستى جۇمىستار اتقارىلىپ جاتىر. ەلەكتر جۇيەلەرىن قالپىنا كەلتىرۋ جۇمىستارىنا جاۋاپتى مەكەمەلەر جۇمىلدىرىلعان.
جاۋاپتى مەكەمەلەر كۇشەيتىلگەن رەجيمدە ىسكە كىرىسكەن. الداعى تاۋلىكتە جەلدەن كەلگەن زارداپ سالدارى تولىق جويىلماق.
