شاراعا قاتىسۋعا 900-گە جۋىق ادام ءوتىنىم بىلدىرگەن. قاتىسۋشىلاردىڭ باسىم بولىگى شىمكەنت جانە نۇر-سۇلتان, الماتى, تۇركىستان قالالارىنان بولدى. ولار سايىستىڭ العاشقى كۇنىندە الدىن الا بەرىلگەن «Welcome to Shymkent» تاقىرىبىندا قالا تۋرالى يميدجدىك جانە كرەاتيۆتى جارنامالىق بەينەروليكتەر ءتۇسىردى. دايىن بەينەروليكتەردى ەلىمىزدە موبيلوگرافيا سالاسىن دامىتقان قىران تالاپبەك باستاعان كوميسسيا مۇشەلەرى باعالاپ, جەڭىمپازدار ءتىزىمىن جاريالادى. جەڭىمپازدارعا باعالى سىيلىقتار تابىستالدى.
شارا اياسىندا وتكەن پلەنارلىق كەزدەسۋگە قالا اكىمىنىڭ ورىنباسارى ماقسۇت يساحوۆ, وركەن كەنجەبەك, سىرىمبەك تاۋ, اقبوتا انۋاربەك جانە ادىلەت راحمەتوللا سىندى بىرنەشە ماديا سالاسى مەن ءتۇرلى باعىتتا ءوز باستامالارىن دامىتىپ جۇرگەن الەۋمەتتىك جەلى بەلسەندىلەرى قاتىسىپ, كرەاتيۆتى يندۋستريا مەن موبيلوگرافيانىڭ تۋريزم سالاسىنداعى رولىنە توقتالىپ ءوتتى.
«ۇلتتىق كرەاتيۆتى دامىتۋ - زامان تالابىنا ساي تەندەنتسيا ەكەنىن ەسكەرە كەلە, شىمكەنت قالاسىن ەلىمىزدەگى ءىرى كرەاتيۆتى حابتاردىڭ بىرىنە اينالدىرۋدى قولعا الىپ وتىرمىز. وسى باعىتتاعى جۇمىستىڭ باستاماسى رەتىندە قازاقستاندا العاش رەت رەسپۋبليكامىزدىڭ ءار وڭىرىنەن تالانتتى موبيلوگرافتاردىڭ باسىن قوسىپ, موبيلوگرافيا فەستيۆالىن ۇيىمداستىردىق. بۇل سالا كرەاتيۆتى يندۋستريانىڭ اجىراماس بولىگى بولا وتىرىپ, ءتۋريزمنىڭ مۇمكىندىكتەرىن جارنامالاۋعا تاپتىرماس قۇرال. بۇل باستامانى ارىقاراي جالعاستىرىپ, شىمكەنت قالاسىندا موبيلوگرافتاردى بىرىكتىرەتىن جىل سايىنعى ۇردىسكە اينالدىراتىن بولامىز», دەدى قالا اكىمىنىڭ ورىنباسارى ماقسۇت يساحوۆ.
ەكى كۇنگە سوزىلعان ءىس-شارادا ەلىمىزدىڭ ءۇشىنشى مەگاپوليسى تۋرالى ساپالى بەينەروليكتەر ازىرلەندى. روليكتەر الداعى ۋاقىتتا جارنامانى جانداندىرىپ, تۋريستەردى تارتۋ ماقساتىندا جاريالانىپ وتىرماق. جالپى ەلىمىزدە سوڭعى 3 جىلدا موبيلوگرافيا سالاسى دامىپ كەلەدى. وعان قىزىعۋشى ءارى كاسىپ ەتكەندەر سانى ەلۋ مىڭعا جۋىقتاعان.
