ۇكىمەت باسشىسىنا قازاقستانداعى ەكونوميكالىق احۋال, سونداي-اق پاندەميا سالدارىن تومەندەتۋ جانە حالىق پەن بيزنەستى قولداۋ بويىنشا قر-دا جۇرگىزىلىپ جاتقان ساياسات بويىنشا حۆق-نىڭ ساراپتامالىق باعالاۋلارى مەن بولجامدارى تانىستىرىلدى. ميسسيا بيىلعى جىلدىڭ 10 ايىنىڭ قورىتىندىسى بويىنشا 3,5% دەڭگەيىندە قر ناقتى ءجىو ءوسىمىنىڭ وڭ ديناميكاسىن جانە ءوندىرىس كولەمىنىڭ پاندەمياعا دەيىنگى دەڭگەيگە قايتارىلۋىن ايقىندادى.
«رەسمي ورگانداردىڭ ارەكەت ەتۋ شارالارى حالىقتىڭ تابىسى مەن ەكونوميكالىق بەلسەندىلىككە تيگەن سوققى اسەرىن جۇمسارتۋدا ماڭىزدى ءرول اتقاردى. ەكونوميكالىق ساياسات شارالارى الەۋمەتتىك ماڭىزى بار تاۋارلاردىڭ باعاسىن رەتتەۋدى, ءالجۋاز ءۇي شارۋاشىلىقتارىنا اقشالاي تولەم بەرۋدى جانە اسا زارداپ شەككەن سەكتورلار مەن شاعىن جانە ورتا بيزنەس كاسىپورىندارىنا اتاۋلى كومەك, ونىڭ ىشىندە جەڭىلدەتىلگەن نەسيە مەن سالىقتىق جەڭىلدىكتەر بەرۋدى قامتىدى. «جۇمىسپەن قامتۋدىڭ جول كارتاسى» باعدارلاماسى اياسىنداعى جوبالار جۇمىسپەن قامتۋدى قولداۋعا ىقپال ەتتى», دەلىنگەن حۆق ميسسياسىنىڭ مالىمدەمەسىندە.
حالىقارالىق ۆاليۋتا قورى ساراپشىلارىنىڭ بولجامدارىنا سايكەس, 2021 جىلدىڭ قورىتىندىسى بويىنشا قالپىنا كەلۋ سەرپىنىن ودان ءارى ساقتاي وتىرىپ, قر ەكونوميكاسىنىڭ ءوسۋ قارقىنى 3,7%-عا جەتەدى. حۆق ميسسياسى قازاقستاننىڭ قارجىلىق قاداعالاۋدى كۇشەيتۋ, ينفلياتسيالىق تارگەتتەۋ, سالىقتىق جانە بيۋدجەتتىك اكىمشىلەندىرۋدى تسيفرلاندىرۋ جونىندەگى شارالارىنا, سونداي-اق 2060 جىلعا قاراي كومىرتەگى بەيتاراپتىعىنا قول جەتكىزۋ جونىندەگى مىندەتتەمەلەرىنە جوعارى باعا بەردى.
پرەمەر-مينيستر قازاقستان پاندەميادان كەيىنگى جاڭا شىنايىلىق جاعدايىندا ساپالى جانە ورنىقتى دامۋدى قامتاماسىز ەتۋ ماقساتىندا مەملەكەتتىك جوسپارلاۋدىڭ جاڭا جۇيەسىنە كوشكەنىن اتاپ ءوتتى. ونى جۇزەگە اسىرۋ اياسىندا ۇكىمەت وڭىرلىك دامۋ, كاسىپكەرلىك, اوك, ەكولوگيا, تسيفرلاندىرۋ, ءبىلىم جانە عىلىم, دەنساۋلىق ساقتاۋ جانە قوعامدىق دامۋ سالالارىندا ۇلتتىق جوبالار ازىرلەدى.
بۇل رەتتە ينۆەستيتسيا تارتۋدىڭ جاڭا تاسىلدەرى ازىرلەنىپ, «جاسىل» ەكونوميكانى قالىپتاستىرۋ باعىتى ايقىندالدى. تاراپتار اقشا-نەسيە, ۆاليۋتا, سالىق-بيۋدجەت ساياساتى, بانك سالاسىنداعى احۋال, جەكە سەكتوردى دامىتۋ جانە قازاقستاندا جۇرگىزىلىپ جاتقان ەكونوميكانىڭ قۇرىلىمدىق رەفورمالارى ماسەلەلەرىن تالقىلادى.
كەلىسسوزگە پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ, ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى قايرات كەلىمبەتوۆ, قارجى ءمينيسترى ەرۇلان جاماۋباەۆ, ۇلتتىق ەكونوميكا ءمينيسترى اسەت ەرعاليەۆ, ۇلتتىق بانك توراعاسىنىڭ ورىنباسارى ءاليا مولدابەكوۆا قاتىستى.
ايتا كەتەيىك, حۆق ميسسياسى قازاقستانعا حۆق كەلىسىمىنىڭ IV بابىنا سايكەس جىل سايىنعى كونسۋلتاتسيالاردى وتكىزۋ ءۇشىن جىلىنا ەكى رەت كەلەدى.
