تاۋەلسىزدىك جىلدارىندا شىمكەنت قالاسىنىڭ ەكونوميكاسى ەداۋىر تۇرلەندى. مەگاپوليستە قۇرىلىس يندۋسترياسى, ماشينا جاساۋ, مۇناي-حيميا, جەڭىل ونەركاسىپ, تاماق ءوندىرىسى, تەكستيل ونەركاسىبى, فارماتسەۆتيكا, اۋىل شارۋاشىلىعى ونىمدەرىن تەرەڭ وڭدەۋ جانە باسقا دا وندىرىستىك سالالار قالىپتاستى.
كورمەنىڭ اشىلۋ راسىمىنە قالا اكىمى مۇرات ايتەنوۆ قاتىسىپ, كاسىپورىندار شىعاراتىن ءونىم تۇرلەرىمەن تانىستى.
«مەملەكەت باسشىسىنىڭ بيىلعى جولداۋىندا ەكونوميكانى ءارتاراپتاندىرۋ, وندىرىلەتىن تاۋارلاردىڭ ءتۇرىن كوبەيتىپ, ەكسپورت گەوگرافياسىن كەڭەيتۋ جونىندە ناقتى تاپسىرمالار بەرىلدى. وڭدەۋ ونەركاسىبىنىڭ ەكسپورتىن كوبەيتۋ, ەڭبەك ونىمدىلىگىن ارتتىرۋ باعىتىندا قالامىزدىڭ ونەركاسىپ كولەمى جىل اياعىنا دەيىن 711,5 ملرد تەڭگەگە جەتەدى, وندىرىلگەن ءونىمنىڭ 87%-ىن وڭدەۋ ونەركاسىبى قۇرايدى. قالاداعى 4 وندىرىستىك ايماقتا 118 جوبا جۇزەگە اسىپ, 21 مىڭعا جۋىق جۇمىس ورىندارى اشىلدى. بيىلعى جىلدىڭ وزىندە جاڭادان 5 جوبا جۇزەگە اسىرىلىپ, 203 جۇمىس ورنى اشىلدى», دەپ اتاپ ءوتتى قالا باسشىسى.
قالانىڭ وندىرىستىك الەۋەتىن ارتتىرۋ ماقساتىندا جاڭادان ەكى يندۋستريالدى ايماقتىڭ قۇرىلىسى باستالدى. ونىڭ ىشىندە «جۇلدىز» يدۋستريالدى ايماعىندا قۇرىلىس, مەتاللۋرگيا, فارماتسەۆتيكا, جيھاز ونەركاسىبى شوعىرلاناتىن بولادى. ال «ستاندارت» جەكە يندۋستريالدى ايماعى شاعىن جانە ورتا كاسىپكەرلىك سۋبەكتىلەرىنىڭ وندىرىستىك الاڭى رەتىندە قىزمەت كورسەتپەك. مۇندا زاماناۋي قويمالار, شاعىن وندىرىستىك تسەحتار اشىلاتىن بولادى.
تاماق ءوندىرىسى سالاسىندا اۋىلشارۋاشىلىق ونىمدەرىن تەرەڭ وڭدەۋگە باسىمدىق بەرىلدى. بۇل باعىتتا «بوزارىق» تاماق ونەركاسىبى ايماعىنىڭ ينجەنەرلىك جۇيەلەرى جۇرگىزىلۋدە. مۇندا 23 ملرد تەڭگەنى قۇرايتىن 1 800 جۇمىس ورنى مەن 20-دان استام جوبا ىسكە اسىرىلادى.
سونىمەن قاتار, قوسىمشا 198 گەكتار جەرگە اگرويندۋستريالدى ايماق قۇرۋ جوسپارلاندى. مۇندا زاماناۋي ونەركاسىپتىك جىلىجاي̆ كەشەندەرى سالىنادى.
بيىل اۋىل شارۋاشىلىعى ونىمدەرىنىڭ كولەمى 37 ملرد تەڭگەگە جەتەدى دەپ جوسپارلانعان. بيىلعى جىلى جىلىجاي, قارقىندى باۋ, مال بورداقىلاۋ, ەت وڭدەۋ بويىنشا 15 ينۆەستيتسيالىق جوبا جۇزەگە استى. جىل سوڭىنا دەيىن وسى ساناتتاعى تاعى 10 جوبا ىسكە قوسىلماق.
شىمكەنتتىڭ وندىرىستىك قۋاتىن قۇرايتىن بۇل جوبالار ىشكى نارىقتى وتاندىق ءونىم تۇرلەرىمەن تولىقتىرىپ, ەلىمىزدىڭ ەكسپورتتىق الەۋەتىن ارتتىرۋعا قىزمەت ەتەدى.
شىمكەنتتە شىعاتىن ونىمدەر كورمەسى الداعى ۋاقىتتا تۇراقتى تۇردە وتەتىن تانىستىرىلىمدىق سيپاتتاعى الاڭ رەتىندە قىزمەتىن جالعاستىرادى. ونىڭ اياسىندا دايىن ونىمدەردى وتكىزۋ نارىعىن قاراستىرۋ, ەكسپورتقا بەيىمدەلگەن تاۋار تۇرلەرىن ىلگەرىلەتۋگە مۇمكىندىكتەر اشۋ, شىعارىلعان ونىمدەردىڭ ست-KZ وتاندىق ساپا ستاندارتى تالاپتارىنا ساي بولۋىن ۇيىمداستىرۋ, ىسكەرلىك بايلانىستاردى ارتتىرۋ مىندەتتەرى بويىنشا جۇمىستار جۇرگىزىلەدى.
