ارمەنيا مەن ازەربايجان تاعى قاقتىعىستى

ازەربايجان قورعانىس مينيسترلىگى ءوز كەزەگىندە ارمەنيا قارۋلى كۇشتەرىن ارمەنيا-ازەربايجان شەكاراسىنداعى جاعدايدى ۋشىقتىرۋ ماقساتىندا «تاعى ءبىر ارانداتۋ ارەكەتىن» جاسادى دەپ ايىپتادى.

«ازەربايجاننىڭ قارۋلى كۇشتەرى شۇعىل اسكەري وپەراتسيا جۇرگىزدى», دەپ حابارلادى ازەربايجان قورعانىس مينيسترلىگىنىڭ ءباسپاسوز قىزمەتى.

«بىرىنشىدەن, جاۋدىڭ قوزعالىسى شەكتەلدى, قارسىلاستىڭ كۇشتەرى مەن قۇرالدارىنا زيان كەلتىرىلدى. قابىلدانعان شەشۋشى شارالاردىڭ ناتيجەسىندە ارميان اسكەرلەرى قارۋسىز قالىپ ۇستالدى, ءارتۇرلى قارۋ-جاراقتارى الىندى. 

اۋقىمدى ارانداتۋشىلىق ارقىلى قىسقا مەرزىمدە جەڭىسكە ۇمتىلعان ارميان اسكەري بولىمشەلەرىنىڭ شابۋىلى, جەدەل-تاكتيكالىق تۇرعىدان تولىق ساتسىزدىككە ۇشىرادى, ال رەسمي ەرەۆاننىڭ ارانداتۋشىلىققا بارۋداعى كەزەكتى ارەكەتى ءساتسىز اياقتالدى», دەپ جازادى haqqin.az پورتالى.

رەسەي قورعانىس مينيسترلىگى سوعىس ءمينيسترى سەرگەي شويگۋ مەن ونىڭ ارميان جانە ازەربايجان ارىپتەستەرىنىڭ تەلەفون ارقىلى سويلەسۋىنىڭ ناتيجەسىندە تاراپتار شايقاستى توقتاتقانىن حابارلادى.

ارمەنيا پرەمەر-ءمينيسترى نيكول پاشينيان سەيسەنبى كۇنى كەشكە ارمەنيا-ازەربايجان شەكاراسى قازىر سالىستىرمالى تۇردە تىنىش ەكەنىن, بىراق جاعداي شيەلەنىسىپ تۇرعانىن ايتتى.

رەسەي پرەزيدەنتى ۆلاديمير پۋتينمەن تەلەفون ارقىلى سويلەسكەن پاشينيان شەكاراداعى سوڭعى وقيعالاردى ەگجەي-تەگجەيلى بايانداپ, «ازەربايجان كۇشتەرىنىڭ ارەكەتى ارمەنياعا قارسى اگرەسسيادان باسقا ەشتەڭە ەمەس» دەپ جەتكىزدى.