وتىرىستا ەل پرەزيدەنتىنىڭ 2021 جىلعى 21 قازاندا قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسىندا ەتنومەدياتسيانى دامىتۋعا قاتىستى بەرگەن تاپسىرمالارىن ىسكە اسىرۋ ماسەلەلەرى قارالدى.
كەڭەس وتىرىسىنا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى مارات ءازىلحانوۆ, قر پارلامەنتى ءماجىلىسىنىڭ دەپۋتاتتارى, مەملەكەتتىك ورگانداردىڭ, قوعامدىق ۇيىمداردىڭ, قحا قوعامدىق قۇرىلىمدارىنىڭ, مەدياتسيا ورتالىقتارىنىڭ وكىلدەرى, قحا كاسىبي جانە كاسىبي ەمەس مەدياتورلار, وڭىرلىك مەدياتسيا كابينەتتەرىنىڭ باسشىلارى, باق جانە ت.ب. قاتىستى.
وتىرىستى قحا توراعاسىنىڭ ورىنباسارى مارات ءازىلحانوۆ اشتى. ءوز سوزىندە, قازاقستان حالقى اسسامبلەياسى 2010 جىلدان باستاپ مەدياتسيا ينستيتۋتىن داۋلار مەن جانجالداردى شەشۋدىڭ قوعامدىق-قۇقىقتىق قۇرالى رەتىندە دامىتۋ بويىنشا اۋقىمدى جۇمىس جۇرگىزىپ كەلە جاتقانىن اتاپ ءوتتى. مەدياتسيا ينستيتۋتىنىڭ قىزمەتى ازاماتتاردىڭ داۋلى جانە جانجالدى جاعدايلاردى شەشۋ بارىسىندا ىمىراعا كەلۋگە دايىندىعىن كورسەتەتىن, قوعامدىق سانانى جاڭعىرتۋدىڭ ماڭىزدى ماركەرلەرىنىڭ ءبىرى بولىپ تابىلادى.
مارات ءازىلحانوۆ داۋلار مەن جانجالداردى شەشۋ, ازاماتتارعا كەڭەس بەرۋ بويىنشا مەدياتورلارمەن ۇلكەن جۇمىس جۇرگىزىلىپ جاتقانىن جەتكىزدى.
«ەل پرەزيدەنتى ءبىزدىڭ جاعدايدا ەتنومەدياتسيا ءۇشىن كاسىبي كەلىسسوز جۇرگىزۋشىلەردىڭ فورماتى نەعۇرلىم ءتيىمدى بولىپ تابىلاتىنىن جانە اسسامبلەيا وسى باعىتتاعى نەگىزگى ورگان بولۋى ءتيىس ەكەنىن اتاپ ءوتتى», - دەدى قحا توراعاسىنىڭ ورىنباسارى.
ءىس-شارا بارىسىندا كەلىسسوز جۇرگىزۋشى-ەتنومەدياتورلاردى دايارلاۋ جۇيەسىن قالىپتاستىرۋ تاسىلدەرى, ءتيىستى وقۋ باعدارلاماسىن ازىرلەۋ ەرەكشەلىكتەرى, ەتنومەدياتورلارعا قويىلاتىن تالاپتار, سونداي-اق قازاقستان حالقى اسسامبلەياسى شەڭبەرىندە قوعامدىق مەدياتسيا ينستيتۋتىن ودان ءارى دامىتۋ پەرسپەكتيۆالارى تالقىلاندى.
قويىلعان مىندەتتەردى جوسپارلى جانە دايەكتى ىسكە اسىرۋعا مۇمكىندىك بەرەتىن جۇمىس پىكىرالماسۋلار وتكىزىلىپ, ولاردىڭ قورىتىندىلارى تالقىلاندى.
بۇگىندە ەلىمىزدە قحا اياسىندا 2 مىڭعا جۋىق قوعامدىق مەدياتور, 100-دەن استام كاسىبي مەدياتور جۇمىس ىستەيدى. وڭىرلەردە 17 مەدياتسيا كابينەتى اشىلدى جانە 300-دەن استام مەدياتسيا الاڭى جۇمىس ىستەيدى (سوتتاردا, «نۇر وتان» پارتياسىنىڭ فيليالدارىندا تاتۋلاسۋ كابينەتتەرى). كاسىبي ەمەس مەدياتورلاردى وقىتۋعا جانە ولاردىڭ بىلىكتىلىگىن ارتتىرۋعا كوپ كوڭىل بولىنەدى. جىل باسىنان بەرى 5 مىڭنان استام مەدياتور مەن قىزىعۋشىلىق تانىتقان ەتنومادەني بىرلەستىكتەر وكىلدەرى ءتۇرلى كۋرستار مەن سەمينارلاردا تەگىن وقىتىلدى.
داۋلار مەن جانجالداردى شەشۋ, ازاماتتارعا كەڭەس بەرۋ بويىنشا مەدياتورلار ۇلكەن جۇمىس جۇرگىزۋدە. ماسەلەن, 2016 جىلدان باستاپ 130 000-عا جۋىق ءوتىنىم كەلىپ ءتۇستى, ولاردىڭ 39%-ى كەڭەس بەرۋ بارىسىندا شەشىلسە, 61%-مەن مەدياتيۆتىك كەلىسىمدەر جاسالدى. بۇل جۇمىسپەن 310 مىڭنان استام ادام قامتىلدى.
