ءوزى دە, ورەسى دە بيىك ادامدار بار. تاۋ تۇلعالى. ولار دا زاڭعار كورىنەدى. ولار دا قوعامدى العا دامىتۋشى كۇشتەي كورىنەدى. ىشكى ەنەرگياسى مىقتى مۇنداي ادامنىڭ دا قۇپياعا تولى كۇش-قۋاتىنىڭ گراۆيتاتسيالىق الەۋەتى اۋەلدەن قالىپتاسقانىن بىلەسىڭ. تابيعي جاراتىلىسىنا قوسا يگەرگەن ءبىلىمى مەن تەرەڭ ىزدەنىسى ونىڭ بولمىسىن ودان بەتەر ايشىقتاپ تۇرادى. تەرەڭنەن تولعايتىن ويشىلدىعىن تابانتىرەگىنە اينالدىرىپ العان مۇنداي ادامداردىڭ بيىككە كوتەرىلۋى دە وڭاي كورىنەتىنى دە سوندىقتان.
ادام بالاسى اقىلدى دا كەمەل ادامنان سۇرايدى. پەندە بىتكەن قينالعان كەزىندە اتالى ءسوز ايتا الاتىن كوشەلى كىسىگە جۇگىنەتىنى جانە بار. ەڭ باستىسى, قوعام بايلىعى مەن ۇلتتىق قازىنا وسىنداي وزىق تۋعان, ەرەكشە جاراتىلعان جانداردىڭ ەڭبەگىمەن, سانالى ومىرىمەن تولىعىپ, قالىپتاسادى. مىنە, قازىرگى قازاق قوعامىندا وسى تۇرعىدا الدىڭعى قاتاردا اتالاتىن ەل اعالارىنىڭ ءبىرى ساۋىتبەك ابدراحمانوۆ ەكەنىندە داۋ جوق.
ول – ءوزىنىڭ ازاماتتىق جولىمەن, ءومىر ءسۇرۋ ونەگەسىمەن, قوعامدىق دامۋ وركەنيەتىنە ءبىر تۇلعالى كىسىدەي سىڭىرگەن ەڭبەگىمەن, كوشتى ىلگەرى باستايتىن ىزگىلىك قادىر-قاسيەتىمەن الگى ءبىز ايتىپ وتىرعان بيىكتىككە كوتەرىلگەن زياتكەر.
ءيا, ساۋىتبەك اعا – بيىك ادام.
جاس ۇرپاق بيىككە قاراپ بوي تۇزەيدى. ءبىز دە ۇلكەن ءومىر جولىندا ساۋىتبەك اعامىزعا قاراپ بوي تۇزەدىك. ساۋكەڭنەن جۋرناليستيكانىڭ عانا قىر-سىرىن ۇيرەنۋمەن شەكتەلىپ قالعان جوقپىز, ودان ۇلكەن ازامات بولۋدى دا بويىمىزعا سىڭىردىك.
بەكزات بولمىستى, از سويلەپ, كوپ نارسەنى قاس-قاباعىمەن-اق ۇقتىرىپ, ءوزى جازعان عاجاپ, سۇبەلى جازبالارىمەن, بىلايعى جۇرتتىڭ ءتىسى باتپايتىن ساياسات, مادەنيەت جانە ونەر, جالپى ادامزاتتىق تانىمدىق تۋىندىلارىمەن-اق تاربيەلەپ, سۇرلەۋ سوقپاعىن قازاق جۋرناليستيكاسىندا «ابدراحمانوۆتىڭ قولتاڭباسى», «ساۋىتبەكتىڭ ءستيلى» دەگەن ءپوزيتيۆتى, ساۋاتتىلىق پەن ورەلى بيىكتىگىن تانىتاتىن اينىماس تەڭەۋلەر ءبىزدىڭ تىلدىك قورىمىزعا ەنىپ, قازاق ءباسپاسوزىنىڭ ايماڭداي وكىلدەرىنە ءتان وزگەشە تاريح بەتتەرى بولىپ قالدى.
جاستايىنان جاقسى مەن جايساڭدارمەن ارالاس-قۇرالاس بولعان, باستاۋىندا وزبەكالى جانىبەكوۆتەي تاۋداي ادامداردىڭ تاربيەسىن كورگەن.
قالىڭ قازاقتىڭ قادىرلىسى بولعان ءابىش كەكىلباي ۇلى, مىرزاتاي جولداسبەكوۆتەر باستاپ, اقسەلەۋ سەيدىمبەك, فاريزا وڭعارسىنوۆا, تولەن ابدىك, سەيىت قاسقاباسوۆ, گەرولد بەلگەر, مارحابات بايعۇت ءتارىزدى اقيقات ءسوزدىڭ اقبەرەندەرىنىڭ ساۋكەڭنىڭ قالامگەرلىك ەرەن قادىر-قاسيەتى, وزگەشە جەتىستىكتەرى جايىندا جازعان تالايعى دۇنيەلەرىن قىزىعا وقىپ شىققان سوڭ ءبىر كەرەمەت ءبىلىم مۇحيتىنا جەلكەن كەرگەن ءبىلىمپاز ادامنىڭ جان دۇنيەسىنە ۇڭىلەسىڭ, سۇيسىنە وي بولىسۋگە ۇمتىلىس جاسايسىڭ.
قازاق جۋرناليستيكاسىنىڭ تاۋەلسىزدىك جىلدارىنداعى ەڭ ايتۋلى, ەرەكشە بەدەلدى تۇلعاسى بولعان اعانىڭ ءبۇتىن ابىرويى مەن حاس شەبەرلىگى, عالىمدىق-اعارتۋشىلىق تالانتى بۇعان دەيىن دە بەلگىلى بولىپ, ايتىلىپ جۇرگەنىمەن ءدال «ەگەمەن قازاقستان» گازەتىنە باسشى بولىپ كەلگەن كۇنىنەن كەڭ تىنىستى جولى اشىلدى جانە ۇلت رۋحانياتىنا جاڭا لەپ پەن سەرپىندى سيپات الا كەلدى.
ساۋىتبەك اعانىڭ سوناۋ 1970 جىلى 1-كۋرستا وقىپ جۇرگەنىندە-اق العاشقى ماقالاسى جارىق كورىپ, ال 1975 جىلى ءوزى ەڭبەك جولىن باستاعان قازىرگى «ەگەمەن قازاقستان» گازەتىنىڭ باي تاريحىن پاراقتاپ كورسەڭىز, بۇل اتا گازەت رەداكتسياسى ۇجىمىنا كەز كەلگەن ادام ءبىرىنشى باسشى بولا المايدى.
تاڭداۋ مەن ىرىكتەۋ, سەنىم ءبىلدىرۋدىڭ ءوزى قاتال سۇرىپتاۋدان ءوتىپ, سىن-سوقپاق باسپالداقتارىنان ءمىنسىز بولسا عانا تورگە شىعاتىن زاماندار قالپى الەۋمەت جادىندا ساقتالعان-دى.
ءار ءداۋىردىڭ اۋىر جاۋاپكەرشىلىگىن كوتەرگەندەر ەڭبەگى ەش ۇمىتىلمايدى, سونىمەن بىرگە قيىن-قىستاۋ جىلدار تاعىلىمى دا كوپ ايتىلىپ, كوپ جازىلادى. دەگەنمەن, ۇرپاقتان-ۇرپاققا جالعاسقان كىرشىكسىز اقىل, ءمىنسىز ءسوز, ادال ەڭبەك تۇتاس باسىلىم داستۇرىندە ساباقتاسىپ, تەرەڭ تامىر جايعان ۇجىمدىق سالت ۇلىقتالىپ, جۇرت كوز تىككەن باس گازەتتىڭ ءىشى مەن سىرتى, تىنىسى مەن ءدۇرسىلى, بار بولسا, كەم-كەتىكتەرى دە وزىنە بەسەنەدەن ايان. اتاق-داڭقى دا, كەرەكتى تارالىم جاعدايىنىڭ قوزعالىسى دا, ءبارى-ءبارى ءمالىم بولاتىن.
«ەگەمەن» دەگەندە, بۇل تاريحي باسىلىمدى ۇلتتىڭ ماڭدايىنا بىتكەن نەبىر اقسۇڭقار قايراتكەرلەردىڭ باسقارعانىن, ءاربىرىنىڭ قانداي دەڭگەيدە ەل ەسىندە قالعانىن وي سارابىنا سالۋ وتكەن تاريح قانا بولماس. ارعى-بەرگى تاريحىندا ب.كۇلەەۆ, س.سەيفۋللين, ب.مايلين, س.سادۋاقاسوۆ, ت.رىسقۇلوۆ, و.جاندوسوۆ, م.اۋەزوۆ, ع.مۇسىرەپوۆتەر, بەرىدە ش.مۇرتازا, ءا.كەكىلباي ۇلى سەكىلدى كەمەڭگەر قايراتكەرلەردىڭ قولتاڭباسى بار گازەتكە ەندىگى كەزەكتە ساياسات سوقپاعىندا ۇشتالعان, ەرۋديت عالىم, جۇيرىك قالامگەردىڭ, دەگدار ازاماتتىڭ كەلۋى بەتبۇرىس كەزەڭنەن حابار بەرگەندەي اسەرگە بولەدى.
ساۋكەڭنىڭ ومىرىندە باس گازەتتى ەڭ ۇزاق باسقارعان, ون بەس جارىم جىلدان استام ۋاقىت ءارى «ەگەمەننىڭ», ءارى ءوزىنىڭ الاش ازاماتىنىڭ بيىك مارتەبەسىنە يە بولۋ كەزەڭى دەپ باسا كورسەتسەك, ادىلدىك بولادى. بۇل جىلدار جۇلدىزدى جىلدار بەدەرىندە جازىلىپ قالدى.
قاشاندا وي قۇشاعىندا جۇرەتىن ول جاڭا قازاقستاندى ورنىقتىرۋ, قوعام مەن زامان, ەل قامى, ۇلت مۇراتى, ۇلتتىق مادەنيەت پەن ادامگەرشىلىك تاقىرىپتارىن جاڭعىرتۋعا, شىعارماشىلىق ۇجىمدى ۇيىستىرۋدا وراسان زور ەڭبەك جاسادى. اسىرەسە, اكتسيونەرلىك قوعامنىڭ قازاق باسپاسوزىندەگى ۇتىمدى جاعىن جارقىراتىپ كورسەتە الدى. بۇعان ونىڭ 1987 جىلدان بەرى ورتالىق كوميتەتتە, ۇكىمەتتە, پرەزيدەنت اپپاراتىندا ىستەگەن كەزىندەگى مول تاجىريبەسى مەن جوعارى ىسكەرلىگى, جەكە تانىمالدىلىعى مەن بەدەلى وتە جاقسى كومەك بەردى.
ءبىرىنشى باسشىنىڭ ءوزى قۇت قالامىن قولىنان تاستاماي, گازەت برەندىنە اينالعان اۆتورلىق ايدارى ەلدى اۋزىنا قاراتتى. تانىمدىق-ادەبي, پۋبليتسيستيكالىق جازبالارى قازاق اقپارات كەڭىستىگىندە ەرەكشە قۇبىلىسقا اينالدى.
ساۋكەڭنىڭ جۇيەلى ءسوزى مەن ويلى تالعامى بولەك تۇلعانىڭ تۇرپاتىن اڭعارتاتىن. ۇلتتىق سانا, ۇلتتىق مىنەز, ۇلتتىق تابيعات, ءبىلىم جانە بىلىك كەرەك بىزگە دەگەن باعامداۋدى ايقىنداپ بەرەتىن.
اڭگىمە اۋانى وسىلاي ءوربيتىن.
حالقىمىز قايدا بارادى؟ نە ويلاپ بارادى؟ وقىعانىمىز قايسى, توقىعانىمىز نە؟
قازاق بالاسى قۇبىلمالى زاماندا قانداي بولۋى كەرەك؟
ەل تاۋەلسىزدىگىن باعالاي بىلۋدەن ارتىق نە بار؟
كوتەرگەن كوكەيكەستى ماسەلەلەردى قاراڭىزشى!..
گازەت وقىرماندارى نە دەيدى؟
«ەگەمەن» ەل ىشىندە قالاي وقىلادى؟..
«قازاق ءباسپاسوزىنىڭ قارا شاڭىراعى», «اعا باسىلىمى», «باس باسىلىمى» ءتورت قۇبىلاسى تەرەڭدەلىپ, قوعامداعى بيىك ورنىن ەگەمەن ەلدىڭ مازمۇندىق سيپاتىمەن تولىقتىرا ءتۇستى.
ەلورداعا كوشىپ كەلگەن 1999 جىلى ەكى قاباتتى ەسكى كەڭسەدە ورىن تەپكەن ەدى.
كەيىن ەلباسىنىڭ تىكەلەي قامقورلىعىمەن سالىنعان سەگىز قابات سۋ جاڭا كەڭسە عيماراتى قۇتتى مەكەن ورداسىنا اينالدى. گازەتتىڭ 90 جىلدىعى تويلانعان ساتتە ەلباسى جاڭا عيماراتتى ءوزى اشتى.
اق باتالى ۇجىمعا الەۋمەتتىك قولايلى جاعداي جاساۋدىڭ وزىق ۇلگىسى وسى ەمەس پە؟
ساۋكەڭ باسشىلىق ەتكەن جىلداردا رەداكتسيا تەك گازەتتى شىعاراتىن مەكەمە ەمەس, ونىڭ ساراپتامالىق ورتالىققا اينالىپ, عىلىمي-زەرتتەۋ ينستيتۋتى دارەجەسىنە جەتتى دەر ەدىك.
ءبىرىنشى, مۇندا ول ءار سالاداعى تۇلعالاردى ىرىكتەپ وتىرىپ, گازەتتە سولاردىڭ ءسوز الۋىنا ەرەكشە نازار اۋدارادى. سول ءۇشىن الماتى مەن استانا عانا ەمەس, ماسكەۋدەگى, تاشكەنتتەگى, ىستانبۇلداعى تۇركى جۇرتىنىڭ زيالىلارىنىڭ ءتىزىمى جاسالدى. ول كىسىنىڭ تالابى بويىنشا «ەگەمەندە» كىم كورىنگەن ەمەس, اۋزى دۋالى, ءسوزى ءۋالى عىلىم يەلەرى, رۋحانيات وكىلدەرى كورىنۋى ءتيىس بولدى. بىزدىڭشە ايتقاندا, اۆتورلار, قازىرگى مودا قۋشىلاردىڭ سوزىنە سالعاندا سپيكەرلەر ءتىزىمىن جاساۋ, جيناۋ, ساراپتاپ بارىپ بارلاۋ باسقا رەداكتسيالاردا جوق نارسە. مىنە, ساراپتاما ورتالىعى دەۋىمىزدىڭ سىرى وسىندا. ەكىنشى, 2000-2016 جىلدارى رەسپۋبليكامىزدا الەمدىك, رەسپۋبليكالىق ءمان-ماڭىزى بار كوپ ءىس-شارالار ءوتتى. ولاردىڭ ارقايسىسى ادەتتە ءوز كورىنىسىن تاپتى. بىراق ولارداعى وي, پىكىر, ۇسىنىس, تاجىريبە گازەت بەتىندە قالىپ قالماۋى كەرەك قوي. ەرتەڭ بۇلاردى ۋنيۆەرسيتەت وقىتۋشىلارى لەكتسيالارىندا نەگە پايدالانباسقا؟! ستۋدەنتتەر نەگە ديپلوم جۇمىسىن جازباسقا؟! وقىرماندار نەگە سولاردى قايتالاپ وقىپ تانىسپاسقا؟! وسىنى سەزىپ, بولجاعان ساۋكەڭ رەداكتسيادان ارنايى جۇمىس توبىن قۇرىپ, گازەت بەتىندە جارىق كورگەن ماتەريالداردان تاقىرىپتىق كىتاپتار شىعارۋدى جۇزەگە اسىردى. ولار «ەگەمەننىڭ» باسپا تسەحىندا دايىندالىپ, ەل قولىنا تيگەن كوپتەگەن ۇجىمدىق جيناقتار. بۇل ەڭبەكتەر «استانا», «تاۋەلسىزدىك», «ەلباسى», «دىنتۇتقا», «سالتانات» (ەقىۇ تۋرالى), «ەتجەڭدى» ەگەمەن» دەپ اتالادى. كەزىندە جەكە-جەكە توم بولىپ شىققان اتالعان جيناقتاردى ءبىر عىلىمي-زەرتتەۋ ينستيتۋتىنا تاتيتىن جۇمىستار ەمەس دەپ كىم ايتادى؟ ەشكىم دە.
«ەگەمەندە» باسشى بولعان 2000-2016 جىلدارى مۇنداعى ۇجىمعا ناعىز شىعارماشىلىق تاربيە دە بەرە بىلگەن ادام. ول ونىڭ اكىمشىلىك-ۇيىمداستىرۋ جۇمىسىنان باسقا جازۋعا دا بەلسەنە ارالاسۋى. ەگەر ول تەك باسشى عانا بولىپ جۇرسە, وعان جۇرت بىرجاقتى قارار ەدى. جوق, ول بۇلاي ىستەمەدى. گازەتتىڭ مازمۇندى, تارتىمدى بولىپ شىعۋى ءۇشىن ءوزى دە قالام قايراتىن كورسەتە ءبىلدى. وعان ونىڭ ەگەمەندىگىمىزدىڭ العاشقى ون جىلىنىڭ حرونيكاسىن جاساعان «تاۋەلسىزدىك شەجىرەسى», وقىرمانداردىڭ تانىم دەڭگەيىن ارتتىراتىن «الەمگە ايگىلى...» دەگەن ورتاق تاقىرىپپەن بەرىلگەن قالا, ەسكەرتكىش, كىتاپ, ارحەولوگيالىق قازبا, ساۋلەت ونەرى جونىندەگى جازبالارى, ەشكىمنىڭ قولى كوپ جەتە بەرمەيتىن شەتەلدىك ايگىلى ونەر يەلەرى مونسەررات كابالە, سەرگەي ميحالكوۆ, اندرەي كونچالوۆسكي, ميحايل ۋليانوۆ, جازۋشى شىڭعىس ايتماتوۆ, يمام ۆالەريا پوروحوۆا, ءوزىمىزدىڭ اتاقتى ولجاس سۇلەيمەنوۆ, بيبىگۇل تولەگەنوۆا سياقتى اعا-اپالارىمىزبەن جاساعان سۇحباتتارى انىق دالەل.
بۇل كىسى تاڭعالارلىق ءىستىڭ باسى-قاسىندا ءوزىنىڭ ناعىز كوشباسشىلىق-ليدەرلىك قارىم-قابىلەتىن تانىتتى, ال ول ءسوز جوق, ەلىمىزدىڭ ءباسپاسوز سالاسىنداعى وزىق ونەگەلى ءارى ارىپتەستەرى ەرەكشە سۇيسىنەتىن تالانتقا ءتان تاعىلىمدى قۇبىلىستار.
ىرىلەردىڭ جولىن قۋعان ءبىلىمپاز باسشى ساياسات ونەرىندە جۋرناليستەردىڭ دە تىڭ سوقپاعىن سالدى. ونى «جاھاندانۋ ۇلگىسىندەگى جۋرناليستيكا» دەپ اتاۋعا بولادى. ءوزى دە ساياسات نۋىنان سەسكەنبەيتىن سىرالعى ساياساتشى بولسا, جازۋدىڭ تابيعاتىن تەرەڭىنەن ءتۇسىنىپ, ءاربىر ءسوزى قورعاسىن قۇيعانداي سالماقتى, دالەلدى, ويلى, سۇحباتتاسۋشى كەيىپكەرىنىڭ ىشكى جان-دۇنيەسىن اشا بىلەتىن, تىپتەن استارلى ماعىنالى ءادىس-امالى, ايتپاسىنا قويمايتىن تاسىلدەرى, ەڭ باستىسى, ول – ەل پرەزيدەنتى مە, ول – ءىرى ساياساتكەر مە, الدە ماڭىنا ادام جۋىتا بەرمەيتىن «مىنەزدى» ونەر ءدۇلد ۇلى مە, تىپتەن «مارتەبەسى» الەمدىك دارەجەدەگى ءىرى ونەر تۇلعاسى ما, ساۋكەڭنىڭ سارى مايدان قىل سۋىرعانداي سوزدەرى الدىندا قالت تۇرا قالاتىن سياقتى. اسىرەسە, كەيىپكەردىڭ اتاق-داڭقىنان ءوربيتىن, بىلايعى جۇرت جامىراي ايتسا دا, جاريا ەتۋگە جول تاپپايتىن ساتتەردە دە اۆتوردىڭ بۇكپەسىز, اشىق اڭگىمەگە جەتەكتەپ الىپ كەتۋى – جۋرناليستيكا اۋىلىنا كەپ, بوساعاعا اتىن بايلاعان ىزدەنۋشىلەرگە ولجاسى مول ساباق, باعاسى زور ءدارىس دەر ەدىك.
ول وتاندىق ساياسي ادەبيەتتىڭ بۇگىنگى بيىگىن قاي جەردە بولسا دا كوتەرە الاتىن بىرنەشە قۇندى سۇحباتتار جۇرگىزىپ, دۇنيەگە كەلگەن وسى جانرداعى كەسەك تۋىندىلارى – تاريح جولى. اسىرەسە, پۋبليتسيست-قالامگەردىڭ ەلباسى, قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆپەن سىر-سۇحباتتارى ەرەكشە ماعىنالى, ۇزدىك جازبالار بولىپ تابىلادى.
قازاق ادەبيەتى تەورياسىندا اكادەميك زەينوللا قابدولوۆ قانداي عۇلامالىق تانىتسا, ساۋىتبەك ابدراحمانوۆتىڭ شەشەندىگى مەن ءبىلىم-بىلىكتىلىگى, عىلىم دوكتورىنىڭ كۇردەلى تاقىرىپتاردا قازاق تىلىندە زاماندار بيىگىندە سويلەۋى جانە وعان وزىنە ءتان ءماندى مانەرى مەن ءار سوزىنە عىلىمي دايەكتى تىرەك ەتىپ, وسى قازىرگى زامان جۋرناليستيكاسىنىڭ قۇبىلىستارىن كەڭىنەن كوسىلىپ تالداۋى – ۇلاعاتتى ۇستازدىڭ ءوزى ەمەي, نەمەنە دەرسىڭ؟
تالانتتى قالامگەر, زەرەك عالىمنىڭ ۇلان-عايىر ويشىل, ۇلت رۋحانياتىنا ولشەۋسىز ۇلەس قوسقان تاۋ تۇلعا ءابىش كەكىلباەۆتىڭ ۇلى مۇرالارىن تەرەڭىنەن تولعاعان «ابىز ءابىش» اتتى كۇردەلى ەڭبەگىنىڭ قازاقستان رەسپۋبليكاسى پرەزيدەنتى ق.توقاەۆتىڭ جارلىعى بويىنشا مەملەكەتتىك سىيلىقپەن ماراپاتتالۋى دا زور مارتەبە.
بۇل ادەبيەت مايدانىنداعى, عىلىمي الەمدەگى وراسان ەڭبەگىنىڭ باستاۋىندا دا ونىڭ البىرت جاس شاعىنان باستالعان جۋرناليستيكالىق ويشىلدىقتىڭ تابى دا, ءوزى دە بار بولعاننان كەيىن ەرتەرەك اۋىزعا ءتۇسىپ وتىر.
تەگىندە, شىعارماشىلىق ۇجىم – قادىرلى, قاستەرلى ۇعىم. مۇنى تەرەڭ, جان-جاقتى تۇسىنگەن ادامنىڭ قاسىندا وزىمەن سەرىكتەس, سەنىمدى ادامداردىڭ بولۋى جانە ولاردىڭ دا ساناسا الدىراتىن سەسى بولۋى شارت. ءبىرىنشى باسشى – جۇرتقا ەس جانە سەس بولماق. كۇنگەيى مەن كوركى كوزگە تۇسەتىن بۇل جاعىنان ساۋكەڭ شىن مانىندە باقىتتى ادام. سوناۋ ستۋدەنتتىك اۋديتوريا پارتاسىنان يىقتاسىپ, ۇزەڭگىلەس بولعان ەراعا-ەرجۇمان سمايىل, جانبولات اۋپباەۆ ءتارىزدى قازاق ءباسپاسوزىنىڭ قارا نارى, بار سانالى عۇمىرىن گازەت جۇمىسىنا باعىتتاعان تالانتتى تارلانبوزدارى مەن ەركىن قىدىر سياقتى العىر ءىزباسارلارىنىڭ ءوزارا «تاندەمى», وسى «تورتتىكتىڭ» ءبىر-ءبىرىن بايىتىپ, وزەكتەس تەتىكتەر ءتارىزدى شىنايى دوستىق پەن سەنىمدە قىزمەت ەتۋىنىڭ ءوز ءداستۇرلى جولى بار. ولار – «ەگەمەن قازاقستاننىڭ» تۋىن كوتەرگەن ساردارلار! ال جول باستاعان ۇستازداردىڭ ءاربىر ءجۋرناليستىڭ قالامگەرلىك, ادامگەرشىلىك ورنىن ادال باعالاپ, قامقور بولۋ ءداستۇرىن اسا مادەنيەتتى, ىزگىلىكتى ادەپ پەن ەتيكانى ابىرويمەن جوعارى ۇستاعانى دا مەنىڭ ارىپتەستەرىم مەن باتالى ۇجىمنان شىڭدالىپ شىققان جاس جۋرناليستەردىڭ رازى كوڭىلىندە ءجۇر.
بىزگە دەيىن تالاي مىقتىلار ايتقان ءبىر وي بار. ءوز ەلىمىزگە ۇلگى بولار وزگە ورەلى ولشەمدەردى كەڭ تانىتقان قالامگەر. ونىڭ, ايتتىق قوي, اپتاسىنا بەس رەت شىعاتىن باس گازەتتىڭ قىم-قۋىت جۇمىسى, قاربالاس جيىن, كەزدەسۋلەرگە ءجيى قاتىساتىنى جانە بار, «الەمگە ايگىلى...» ايدارى مەن تانىمدىق ماقالالار توپتاماسى – كەرەمەت جانە وقىرماندارعا كەرەگى مول تۋىندىلار. بۇل بۇل ما, «جيىرماسىنشى عاسىر جىرلايدى» دەگەن ەكى تومدىق اۆتورلىق انتولوگياسىن ازىرلەۋ جوباسى – قازاق ادەبيەتى مەن مادەنيەتى ءۇشىن باعالى جيناقتار, قازاق پوەزياسىنىڭ ۇزدىك شەجىرەسى قاتارىندا اتالادى.
قاي قالامگەر ادامزاتتىڭ اقىنى ا.س.پۋشكيننىڭ پوەزياسىن س.ابدراحمانوۆتاي شۇقشيا زەرتتەدى؟ ء«تولتۋماسى مەن تەلتۋماسى» عىلىمي ورتانى ءتانتى ەتكەن ەرەكشە زەرتتەۋ, ەرەن ەڭبەك!
اينالىپ كەلگەندە, تانىمدىق دۇنيەلەرى, سۋرەتكەرلىك قابىلەتى, عالامدىق ويلىلىعى بيىك تاۋدان تولقىندى اققان ءمولدىر, ءنارلى بۇلاقتاردىڭ كەڭ ارناسى توعىسىپ, تولىعۋى ءتارىزدى بىرەگەي تۇلعانىڭ مەملەكەت پەن قوعام الدىنداعى قالتقىسىز قىزمەتى, ۇلت رۋحانياتىنا سىڭىرگەن ەڭبەكتەرى, جۋرناليست-پۋبليتسيستىك ەرەكشە ونەگەسى مەن ازاماتتىق ءومىر جولى, ءسوز جوق, پاراساتتى ادامنىڭ بيىك ءارى زياتكەرلىك بولمىسىن انىق تانىتادى.
بۇل كۇندەرى ساۋىتبەك ابدراحمانوۆ قازاقستان پارلامەنتى ءماجىلىسىنىڭ دەپۋتاتى.
قازاقستان قوعامىنىڭ تالاي-تالاي ايماڭداي ۇل-قىزدارى وسى پارلامەنتتە زاڭ شىعارۋ ىسىمەن اينالىسىپ, حالىقتىڭ سەنىمى مەن ءۇمىتىن اقتاۋ جولىندا ابىرويلى قىزمەت اتقارىپ كەلە جاتقانىن جاقسى بىلەمىز.
كورنەكتى قوعام زيالىسى ساۋىتبەك اعانىڭ قازىرگى وردالى ورتادا ءجۇرۋى كەشەگى الاش ارىستارىنىڭ التىن سىنىعىنداي كوزگە قورىنەدى.
مەيرامبەك تولەپبەرگەن,
قازاقستان رەسپۋبليكاسى
پارلامەنتى ءماجىلىسىنىڭ دەپۋتاتى
