سالتاناتتى ءىس-شارادا ايدا بالاەۆا مەرەكەنىڭ ايرىقشا ماڭىزىن اتاپ ءوتىپ, مۇنداي ماراپاتتار ايەلدەردىڭ ەرەن ەڭبەگىنە, ولاردىڭ كاسىبي جاۋاپكەرشىلىگى مەن ءوز ىسىنە دەگەن ادالدىعىنا كورسەتىلگەن لايىقتى قۇرمەت ەكەنىن ايتتى.
«پرەزيدەنت قاسىم-جومارت توقاەۆ ەل الدىنداعى ەلەۋلى ەڭبەكتەرىڭىزدى جوعارى باعالاپ, سىزدەردى ماراپاتتاۋ تۋرالى جارلىققا قول قويدى. بۇل مەملەكەت ايەلدەردىڭ قوعامداعى ءرولىن, ولاردىڭ وتباسى قۇندىلىقتارىن نىعايتۋعا, ءتۇرلى سالانىڭ دامۋىنا قوسقان ۇلەسىن ءاردايىم جوعارى باعالايتىنىنىڭ ايعاعى دەپ بىلەمىن. ماراپات سىزدەردىڭ جەكە جەتىستىكتەرىڭىز عانا ەمەس, وتباسىلارىڭىزدىڭ, بالالارىڭىزدىڭ, اتا-انالارىڭىزدىڭ, ارىپتەستەرىڭىز, وزدەرىڭىزبەن بىرگە وسى جولدا كەلە جاتقان ۇجىمدارىڭىزدىڭ ورتاق ەڭبەگىنە كورسەتىلگەن قۇرمەت», دەدى ايدا بالاەۆا.
ۇكىمەت باسشىسىنىڭ ورىنباسارى ايەلدەر قاي كەزدە دە قوعامدا ايرىقشا جاسامپاز ءرول اتقارىپ كەلە جاتقانىن اتاپ ءوتتى. ونىڭ ايتۋىنشا, جاۋاپكەرشىلىگى, ىسكە دەگەن ۇقىپتىلىعى, شىنايى جاناشىرلىعىنىڭ ارقاسىندا ايەلدەر كاسىبي قىزمەتتە جوعارى ناتيجەلەرگە قول جەتكىزىپ, مادەني ءارى رۋحاني قۇندىلىقتاردى ساقتاۋعا, قوعامدىق ينستيتۋتتاردى نىعايتۋعا جانە مەملەكەتتىڭ دامۋىنا ەلەۋلى ۇلەس قوسىپ كەلەدى.
مەرەكەلىك جيىندا «قۇرمەت» وردەنىمەن ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ءبولىم باسشىسى باقىتجامال ايتمۇحامبەتوۆا, ت.شەۆچەنكو اتىنداعى مەموريالدىق مۋزەيدىڭ قور ساقتاۋ جانە بۇقارالىق-ەكسكۋرسيالىق جۇمىس ءبولىمىنىڭ مەڭگەرۋشىسى ايگۇل بالاباەۆا, سونداي-اق سەمەي قالاسىنداعى ف.دوستوەۆسكيدىڭ ادەبي-مەموريالدىق مۋزەيىنىڭ باس قور ساقتاۋشىسى تاتيانا تيتاەۆا ماراپاتتالدى.
«ەرەن ەڭبەگى ءۇشىن» مەدالىمەن ورتالىق مەملەكەتتىك عىلىمي-تەحنيكالىق قۇجاتتاما ءارحيۆىنىڭ ديرەكتورى بايان جۇماتاەۆا, كونفەسسياارالىق جانە دىنارالىق ديالوگتى دامىتۋ جونىندەگى حالىقارالىق ورتالىقتىڭ باس ەكونوميسى راۋشان يمانتاەۆا, باتىس قازاقستان وبلىستىق تاريحي-ولكەتانۋ مۋزەيى جانىنداعى ا.پۋشكين مۋزەي ءۇيىنىڭ مەڭگەرۋشىسى اسىلجان مىرزابولاتوۆا, ۇلتتىق بانك قولما-قول اقشا اينالىسى دەپارتامەنتى بانكنوتتار مەن مونەتالار ديزاينى باسقارماسىنىڭ باس مامانى-ديزاينەرى جاننا نۇگەربەك, سونداي-اق «حابار» تەلەارناسى «7 كۇن» باعدارلاماسى ورىس رەداكتسياسىنىڭ رەداكتور-تالداۋشىسى الما ورازباەۆا ماراپاتتالدى.
