فورۋم قوعامدى دامىتۋ جانە دەموكراتيالىق ۇدەرىستەر, بۇۇ-نىڭ ورنىقتى دامۋ ماقساتتارىن ىسكە اسىرۋ جانە ولارعا قول جەتكىزۋدەگى سوتسيۋمنىڭ, مەملەكەت پەن بيزنەستىڭ نەگىزگى مىندەتتەرىنە ارنالعان.
فورۋم قارساڭىندا جانە اپتا بويى مينيسترلەردىڭ ازاماتتىق قوعام وكىلدەرىمەن كەزدەسۋلەرى, اكىمدەردىڭ وڭىرلەردەگى ۇەۇ وكىلدەرىمەن كەزدەسۋلەرى, شاعىن گرانتتار جوبالارىنىڭ تانىستىرىلىمى, سونداي-اق «ۇەۇ سىيلىعى» مەن «تاڭداۋ» سىيلىعىن سالتاناتتى تۇردە تاپسىرۋ ءراسىمى ۇيىمداستىرىلادى.
«قازاقستان تاۋەلسىزدىگىنىڭ 30 جىلى ىشىندە ازاماتتىق سەكتور قىزىقتى ترانسفورماتسيادان ءوتتى. تاۋەلسىزدىكتىڭ ماڭىزدى جەتىستىكتەرىنىڭ ءبىرى ۇكىمەتتىك ەمەس ۇيىمداردىڭ كاسىبي, بەلسەندى جانە تاۋەلسىز قوعامداستىعى بولىپ تابىلادى. سوندىقتان قازىرگى X ازاماتتىق فورۋم تاۋەلسىزدىگىمىزدىڭ 30 جىلدىعىنا ورايلاستىرىلىپ وتىر. بيىلعى فورۋمدا ەلىمىزدىڭ تۇكپىر-تۇكپىرىنەن وتە جىگەرلى جانە بەلسەندى قاتىسۋشىلار باس قوسادى. قاتىسۋشىلار قوعامدىق باقىلاۋ تەتىكتەرىن جەتىلدىرۋدەن باستاپ, الەۋمەتتىك سالانىڭ, تسيفرلاندىرۋدىڭ, ءبىلىم بەرۋ جانە دەنساۋلىق ساقتاۋ جۇيەلەرىنىڭ وزەكتى ماسەلەلەرىن شەشۋگە دەيىنگى ونداعان كۇردەلى ماسەلەلەردى تالقىلايدى. تاۋەلسىزدىك جىلدارىندا ۇكىمەتتىك ەمەس سەكتورعا ەلىمىزدىڭ الەۋمەتتىك-ەكونوميكالىق ءومىرىنىڭ ماڭىزدى قۇرامداس بولىگىنە اينالۋعا مۇمكىندىك بەرگەن ماڭىزدى ستراتەگيالىق قۇجاتتار, زاڭنامالىق بازا قابىلداندى. زاڭنامانىڭ ۇزدىك الەمدىك تاجىريبەلەرىن تاراتۋ, ستراتەگيالىق قۇجاتتاردىڭ ءساتتى جۇزەگە اسىرىلۋى ۇەۇ-نىڭ ساندىق جانە ساپالىق ءوسۋىن قامتاماسىز ەتتى», دەپ اتاپ ءوتتى قر اقدم ازاماتتىق قوعام ىستەرى كوميتەتىنىڭ توراعاسى ماديار قوجاحمەت.
سوڭعى 30 جىلدا ۇكىمەتتىك ەمەس ۇيىمدار جەلىسى 100 ۇەۇ-دان 22 مىڭعا دەيىن ءوستى. مەملەكەتتىك الەۋمەتتىك ارىپتەستىك تەتىكتەرى ارقىلى مەملەكەتتىك ينۆەستيتسيالار, گرانتتار مەن سىياقىلار كولەمى ۇەۇ جۇمىسىن قولداۋعا جالپى العاندا 140 ملرد تەڭگەدەن استام سومانى قۇرادى.
