مۇندا وسكەمەن, سەمەي, پاۆلوداردىڭ جوو دەباتەرلەرى جينالدى. قر ءبىلىم جانە عىلىم ۆيتسە-ءمينيسترى قۋانىش ەرعاليەۆ پەن د.سەرىكباەۆ اتىنداعى شقتۋ-دىڭ ءبىرىنشى پرورەكتورى ساۋلە راحمەتۋللينا قۇتتىقتاۋ ءسوز سويلەدى.
ەكى كۇن بويى شقتۋ قابىرعاسىندا بۇگىنگى كۇنگى وزەكتى تاقىرىپتار – «tiger parenting», ساپالى ءبىلىم تەگىن بولا المايدى, بەلدەمشەدە گەندەر بار, پاتريوتيزم قازىرگى جاستارعا ءتان ەمەس, ۇلتتىق قوردى ءتيىمدى پايدالانۋ تەتىكتەرى, 1945 جىلعى مامىر, «ماڭگىلىك ەلدىڭ» ۇزدىك باعىتى سىندى سۇراقتار توڭىرەگىندە ءسوز قوزعالدى. فينالعا ءتورت كوماندا شىقتى – سالاۋات (سەمەي), ءدىلمار (وسكەمەن), وراتور (سەمەي) جانە پرەزيدەنت (پاۆلودار).
تۋرنير قورىتىندىسى بويىنشا سەمەيدەن كەلگەن «وراتور» كومانداسى ءۇشىنشى ورىن مەن 100 مىڭ تەڭگە جۇلدەگە يە بولدى. ەكىنشى ورىندى جانە 200 مىڭ تەڭگە كولەمىندەگى سەرتيفيكاتتى پاۆلودار قالاسىنىڭ «پرەزيدەنت» دەباتەرلەرى الدى. ءبىرىنشى ورىن مەن 300 مىڭ تەڭگەنى سەمەيدىڭ «سالاۋات» كومانداسى جەڭىپ الدى.
ال پىكىرسايىس ءتۋرنيرىنىڭ ۇزدىك سپيكەرلەرى مەن تورەشىلەرى ماقتاۋ قاعازدارىمەن جانە باعالى سىيلىقتارمەن ماراپاتتالدى.
تۋرنير كۋبوگى جەڭىمپاز كومانداعا تاپسىرىلدى. «30: OPEN TO NEW» پىكىرسايىس مارافونى ەلىمىزدىڭ بارلىق وڭىرلەرىندە ءوتىپ, ەلورداسى – نۇر-سۇلتان قالاسىندا اياقتالماق.
