ىرىكتەۋدەگى ەڭ ءىرى جەڭىلىس

قازاقستان ۇلتتىق قۇراما­سىنىڭ بۇعان دەيىنگى ەڭ ءىرى جە­ڭىلىسى تۇركيا (2006 جىلى الەم چەم­پيوناتىنىڭ ىرىكتەۋ كەزەڭى) جانە رەسەي قۇرامالارىمەن (جول­داستىق ماتچ) بولعان كەزدەسۋلەردە تىركەلگەن ەدى. وسى ەكى ويىن دا 6:0 ەسەبىمەن قارسىلاستاردىڭ پايداسىنا اياقتالعان-دى. ال تالعات بايسۋفينوۆ باسشىلىعىنداعى ۇلتتىق قۇرامامىزدىڭ كەشەگى كۇنگە دەيىنگى ەڭ ناشار ناتيجەسى – 0:5 بولاتىن. 2016 جىلى سىرت الاڭدا چەرنوگوريامەن كەزدەس­كەن جەرلەستەرىمىز الاڭ يلەرىنەن ءدال سونداي ەسەپپەن ۇتىلعانى ءالى ەسىمىزدە. ەندى, مىنە, 2018 جىل­عى الەم چەمپيوندارى بۇل ستاتيس­تي­كاعا «تۇزەتۋ» ەنگىزىپ, قازاق فۋت­بو­لىنداعى «قارالى كۇندى» جا­ڭارتتى.

پاريجدەگى فرانتسيا-قازاق­ستان اراسىنداعى كەزدەسۋ ءبىر مينۋت ۇنسىزدىكپەن باستالدى. سەبەبى, وسىدان التى جىل بۇرىن, ياعني 2015 جىلدىڭ 13 قاراشاسىندا پاريجدە قاتارىنان ءۇش لاڭكەستىك شابۋىل بولدى. سالدارىنان 130 ادام قازا تاۋىپ, 350 ادام جارالانعان. جارىلىستىڭ ءبىرى ءدال وسى «ستاد دە فرانس» ستاديونىنىڭ ماڭىندا بولىپ, بۇل ۋاقىتتا فرانتسيا جانە گەرمانيا قۇرامالارى جولداستىق ماتچ وتكىزىپ جاتقان ەدى.

ماتچتاعى دوپتى ويىنعا ءبىزدىڭ جىگىتتەر قوسقانىمەن, نەبارى 10 سەكۋندتىڭ ىشىندە جەرلەستەرمىز دوپتى دا, ويىنداعى باسىمدىقتى دا الاڭ يەلەرىنە بەرىپ قويدى. فرانتسيامەن بولاتىن ويىن الدىندا نەگىزگى قۇرامنىڭ بىرقاتار ويىنشىسى ۇلتتىق قۇراماعا كو­مەكتەسە المايتىنى بەلگىلى بولعان ەدى. اتاپ ايتقاندا, سارى قاعازدىڭ كوپتىگىنە بايلانىستى باقتيار زاينۋتدينوۆ پەن يان ۆوروگوۆسكي بۇل ويىنعا قاتىسا الماسا, جاراقاتتارىنا بايلانىستى گەورگي جۋكوۆ, سەرگەي مالىي, يۋري لوگۆينەنكو, ازات نۇرعاليەۆ ەلدە قالىپ قويدى.

ال توپتا ءبىرىنشى ورىندا تۇر­سا دا, مەرزىمىنەن بۇرىن الەم بى­رىنشىلىگىنە شىعا قويماعان فران­تسيا ءۇشىن بۇل ويىندا جەڭىسكە جەتۋ وتە ماڭىزدى ەدى. ويتكەنى جول­داما ماسەلەسىن سوڭعى تۋرعا قالدىرماي-اق, ەرتەرەك شەشىپ تاس­تاۋ ماڭىزدى بولاتىن. سوندىق­تان فرانتسيا قۇراماسىنىڭ باس باپكەرى ديدە دەشام ءبىرىنشى مينۋتتان باستاپ الاڭعا نەگىزگى قۇرام ويىنشىلارىن شىعاردى. شابۋىلدا الەمنىڭ ەڭ مىقتى فۋتبولشىلارى – كيليان مباپپە مەن كاريم بەنزەما وينادى. ءدال وسى ەكى فۋتبولشى كەزدەسۋدىڭ تاع­دىرىن شەشىپ كەتتى دەسەك, ارتىق ايتقاندىق بولماس.

ماتچ تىزگىنىن ءبىرىنشى مينۋتتان باستاپ ءوز قولدارىنا العان الاڭ يەلەرى التىنشى مينۋتتا-اق گول سوعىپ, ويىننىڭ ەسەبىن اشتى. گول اۆتورى – كيليان مباپپە. ارادا تاعى التى مينۋت ۋاقىت وتكەندە پسج شابۋىلشىسى تابلوداعى كورسەتكىشتى 2:0-گە جەتكىزسە, ءبىرىن­شى تايمنىڭ ورتا تۇسىنان اۋا بەرگەندە مەرگەندىگىمەن كوزگە ءتۇسىپ, جارتى ساعات ىشىندە حەت-تريك اۆتورى اتاندى. وسىلايشا فرانتسيا ءبىرىنشى تايمدى 3:0 ەسەبىمەن ءوز پايداسىنا اياقتادى.

ەكىنشى تايمدى دا الاڭ يەلەرى قارقىندى باستادى. الدىمەن «رەال» شابۋىلشىسى كاريم بەن­زەما 55 جانە 59-مينۋتتاردا ەكى گول سوعىپ, دۋبل جاساسا, 75-مينۋتتا ادريەن رابو بۇرىشتامادان اسىرىلعان دوپتى قاقپاعا ءدال كوزدەپ, فرانتسيانىڭ التىنشى گولىن سالدى. ماتچ اياقتالعانعا دەيىن انتۋان گريزمانن مەن مباپپە تاعى ءبىر-ءبىر مارتەدەن كوزگە ءتۇستى. قورىتىندى ەسەپ – 8:0.

الەم چەمپيوناتىنىڭ ىرىك­تەۋ كەزەڭىن تاپ-تاماشا باستاپ, ۋكراينا جانە بوسنيا قۇرا­ما­لارىمەن ۇپاي بولىسە باستاعاندا بوركىمىزدى اسپانعا اتىپ, قازاق فۋتبولىندا العا جىلجۋ بار ەكەنىنە قۋانىپ, ءبىزدىڭ فۋتبولشىلار دا دوپتى ءتۇزۋ تەبە الاتىنىنا شاتتانعان ەدىك. وكىنىشكە قاراي, قازاقستان قۇراماسىنىڭ ويىنشىلارى ءبىر-اق ماتچپەن مۇنىڭ ءبارى تەك ساتتىلىك ەكەنىن, قازاق فۋتبولى العا جىلجۋدىڭ ورنىنا كەرى كەتىپ بارا جاتقانىن كورسەتىپ بەردى. 2002 جىلى ۋەفا-عا قوسىلعان ۋاقىتتا دەڭگەيىمىز قانداي بولسا, قازىر دە سول دەڭگەيدەمىز. الەم­دىك تۇ­جىرىمداما بويىنشا تۇراق­تى­لىق دەگەن جاقسى كور­سەت­كىش شى­عار, بىراق فۋتبولعا كەل­گەندە العا جىلجۋ دەگەن بولۋ كەرەك قوي...