بيىلعى جىلدىڭ 9 قاراشاسىندا ساعات 21.30 شاماسىندا «102» ارناسىنا دوستىق كوشەسى بويىنداعى «كەرۋەن» ساۋدا ويىن-ساۋىق ورتالىعىندا بەلگىسىز بىرەۋلەر توبەلەسىپ جاتقانى تۋرالى حابارلاما كەلىپ تۇسكەن.
پوليتسيا 17 جاستاعى ەكى قىزعا جىگىتتەردىڭ كەلىپ, تانىسقىسى كەلگەنىن, وعان كامەلەتكە تولماعانداردىڭ ءبىرى جاقىن جەردە 19 جاستاعى اعاسىن شاقىرعانىن انىقتادى. كەلگەن بويدا جاستار اراسىندا جانجال تۋىپ, ارتى توبەلەسكە ۇلاسقان. كريمينالدىق پوليتسيا قىزمەتكەرلەرى جۇرگىزگەن جەدەل-ىزدەستىرۋ ءىس-شارالارىنىڭ بارىسىندا كۇدىكتى ۇستالدى. ول 31 جاستاعى ەلوردا تۇرعىنى بولىپ شىقتى. وقيعاعا بايلانىستى «بۇزاقىلىق» بابى بويىنشا سوتقا دەيىنگى تەرگەۋ امالدارى جۇرگىزىلۋدە.
پوليتسيا دەپارتامەنتى ەلوردا تۇرعىندارى مەن قوناقتارىنىڭ قاۋىپسىزدىگى ءۇشىن بارلىق قاجەتتى شارالاردى اتقارادى. ساۋدا ورتالىعىنىڭ جانىنان پوليتسيانى جەدەل شاقىرۋ تەرمينالى ورناتىلىپ, تاۋلىك بويى پاترۋل جۇرگىزىلۋدە. سونداي-اق, زاڭسىز ارەكەتتەر بولعان جاعدايدا دەرەۋ پوليتسياعا نەمەسە 102 نومىرىنە حابارلاسۋ كەرەكتىگىن ەسكە سالادى.
