اتالمىش سايىس ءۇش كۇندىك تاكتيكالىق وقۋ-جاتتىعۋ تۇرىندە وتكىزىلىپ, التى ءتۇرلى جارىستى قامتىدى. جارىستار بارىنشا ۇرىس جاعدايىندا كەلتىرىلگەن تۇردە ءوتتى. ەلىمىزدىڭ بارلىق وڭىرىنەن 80-نەن استام سەرجانت قاتىستى.
ءبىرىنشى كەزەڭدە قورىتىندى تەكسەرۋ ناتيجەلەرى بويىنشا وڭىرلىك قولباسشىلىقتار, اسكەر تەكتەرى مەن قارۋلى كۇشتەردىڭ قۇرىلىمدىق بولىمشەلەرى اۋقىمىندا باعىنىستى جەكە قۇرامنىڭ جاۋىنگەرلىك دايارلىعى مەن اسكەري ءتارتىبىنىڭ دەڭگەيى باعالاندى. ەكىنشى كەزەڭدە جاۋىنگەرلىك ازىرلىك بايقاۋى وتكىزىلدى. سايىسقا قاتىسۋشى سەرجانتتار كەدەرگىلەر جولاعىنان ءوتۋ, جەرگىلىكتى جەردى باعدارلاۋ, مارش جاساۋ جانە قويان-قولتىق ۇرىستا باقتارىن سىنادى.
– بۇل سايىسقا تۇسكەن ءار سەرجانت – اسكەر تەكتەرى مەن وڭىرلىك قولباسشىلىقتاردان لاۋازىمدىق ساناتىنا قاراي ىرىكتەلگەن, ۇجىمدا ۇزدىك جانە كوشباسشى. بايقاۋ بارىسىندا ءار ءوڭىردىڭ ۇزدىك سەرجانتتارى وزدەرىنىڭ كاسىبي شەبەرلىكتەرىن كورسەتتى, – دەپ اتاپ ءوتتى قر قك سەرجانتتار قۇرامىمەن جۇمىس باسقارماسىنىڭ باستىعى شەبەر-سەرجانت تەمىربەك حالىقوۆ.
جارىس بارىسىندا قاتىسۋشىلار كاسىبي سەرجانت پەن كىشى كومانديرلەرگە ءتان بارلىق قابىلەتتەرىن كورسەتتى: ونىڭ ىشىندە دەنە شىنىقتىرۋداعى توزىمدىلىك, وق اتۋداعى دالدىك, قويان-قولتىق ۇرىستىڭ ۇزدىك داعدىلارى, جەرگىلىكتى جەردى باعدارلاي ءبىلۋ, حيميالىق قورعاۋ قۇرالدارىن قولدانۋ, العاشقى مەديتسينالىق كومەك كورسەتۋ. جەڭىمپازدار التى اتالىم بويىنشا انىقتالدى. اتاپ وتسەك, بريگادانىڭ, باتالوننىڭ, روتانىڭ, ۆزۆودتىڭ, بولىمشەنىڭ ۇزدىك سەرجانتى, مامان سەرجانت جانە شتاب سەرجانتى.
«استانا» وڭىرلىك قولباسشىلىعىنىڭ اسكەري بولىمىنەن ۇزدىك بولىمشە كومانديرى كىشى سەرجانت سابدەن دۇيسەمبەك سايىستىڭ ءابسوليۋتتى جەڭىمپازى بولىپ تانىلدى. اسكەري قىزمەتشى بيىل جەلتوقسان ايىندا «اسكەر تارلانى» اسكەري-پاتريوتتىق بايقاۋى اياسىندا ماراپاتتالماق. ونىڭ ماقساتى – بارلىق ساناتتاعى اسكەري قىزمەتشىلەردىڭ كاسىبي دەڭگەيىن ارتتىرۋعا ىنتالاندىرۋ.
سەرجانتتار كورپۋسى – كاسىبي ارميانىڭ نەگىزى. اسكەري دايىندىق, بولىمشەلەردەگى اسكەري ءتارتىپتىڭ جاعدايى جانە جەكە قۇرامنىڭ مورالدىق-جاۋىنگەرلىك رۋحى كوبىنەسە سەرجانتتاردىڭ كاسىبي شەبەرلىگىنە بايلانىستى. وسىنداي سايىستى وتكىزۋ سەرجانتتار قۇرامىنىڭ كاسىبي شەبەرلىگىن ارتتىرۋعا ىقپال ەتىپ, بۇل ۇردىستەگى جارىس رۋحىن نىعايتادى. وڭىرلىك قولباسشىلىقتار مەن اسكەر تەكتەرىندە كىشى كومانديرلەردىڭ دايارلىق دەڭگەيىن باعالاۋعا مۇمكىندىك بەرەدى.
