بيزنەسكە قولايلى بولۋ ءۇشىن

ورتالىق كوممۋنيكاتسيالار قىزمەتىندە وڭىرلىك دامۋ ۆيتسە-ءمينيسترى سەرىك جۇمانعارين مەن «دامۋ» كاسىپكەرلىكتى دامىتۋ قورى» اق باسقارما توراعاسىنىڭ ورىنباسارى قانات سۇلتانعازيەۆ ءباسپاسوز ءماسليحاتىن وتكىزدى. وندا ۇكىمەتتىڭ كەڭەي­تىلگەن وتىرىسىندا ەلباسى جۇك­تەگەن تاپسىرمالاردى ورىنداۋعا قاتىستى قابىل­دانعان شارالار جونىندە ايتىلدى. مەملەكەت باس­شى­سىنىڭ تاپسىرمالارىن ورىنداۋدىڭ باسىم باعىتتارىنىڭ ءبىرى بيزنەس­كە قاتىستى بولاتىن. وندا وڭىرلىك دامۋ مينيسترلىگىنە اكىمشىلىك جانە رۇقسات بەرۋ راسىمدەرىن وڭتايلاندىرۋ جۇكتەلگەن. ءسويتىپ, ازاماتتاردى كاسىپكەرلىككە ىنتالاندىرۋ قاجەت. بۇل بويىنشا س.جۇمانعارين بايانداما جاسادى. «مەملەكەت باسشىسىنىڭ تاپسىرمالارىن ورىنداۋ ماقساتىندا بيزنەس قاۋىمداستىقتار وكiلدەرiنەن ارنايى قۇرىلعان ساراپتامالىق توپ بيزنەستiڭ دامۋىنا كەدەرگi كەلتiرەتiن جەكە نورمالاردى الىپ تاس­تاۋ نەمەسە وزگەرتۋ بويىنشا 231 ۇسىنىستى تالدادى. ءار ۇسىنىستى مۇددەلi مەم­لەكەتتiك ورگاندار تالقىلادى. ولاردىڭ iشiندە 96 ۇسىنىستى ورىنداۋ ماقۇلداندى. تاياۋ ارادا 8 كودەكسكە, 55 زاڭعا جانە ءتۇرلi دەڭگەيدەگi 30 زاڭ­عا تاۋەلدi نورماتيۆتiك-قۇقىق­تىق اكتiگە وزگەرiستەر ەنگiزۋدi كوزدەيتiن تيiستi قۇجاتتار ازiرلەنەتiن بولادى», دەدi ۆيتسە-مينيستر. قازىرگى تاڭدا ەلىمىزدىڭ قاي مەكەنىندە دە كاسىپكەرلىكپەن شۇعىلدانۋعا ۇكىمەت تاراپىنان بارلىق جاعداي جاسالىپ جاتقانىن تاپتىشتەگەن بايانداماشى, وسى ۋاقىتتا استانا, الماتى, سەمەي قالالارىندا كاسىپكەرلەرگە قىزمەت كور­سەتۋ ورتالىقتارى جۇمىس ءىس­تەپ تۇرعانىن كولدەنەڭ تارتتى. ول ورتالىقتار بۇگىنگە دەيىن 22 مىڭنان استام قىز­مەت كورسەتىپ ۇلگەرگەن. ناقتى­لاساق, 9 مىڭ شاعىن جانە ورتا بيزنەس سۋبەكتىلەرى مەن الەۋەتتى كاسىپكەرلەر ورتا­لىق قىزمەتىن پايدالانىپتى. بۇيىرتسا, الداعى كۇندە كاسىپكەرلەردى قولداۋ ورتالىقتارى بارلىق وبلىس ورتالىقتارىنا ورىن تەۋىپ, بيزنەسپەن اينالىسام دەگەن ءاربىر ازاماتقا جان-جاقتى قولداۋ كورسەتپەك ەكەن. وسى ماڭىزداردى نىقتاعان س.جۇمانعارين وتكەن جىلدىڭ سوڭىنا تامان مەملەكەت باسشىسىنا ۇسىنىلعان business.gov.kz بىرىڭعاي بيزنەس-پورتالى تانىستىرىلعانىن تىلگە تيەك ەتتى. «پورتالدا ونلاين كونسۋلتانت قىزمەتى ورنالاستىرىلعان. ول بويىنشا بيزنەسمەن 24 ساعات بويى كەپىلدەندىرىلگەن تۇردە كەز كەلگەن سۇراقتارعا جاۋاپ الا الادى. وندا كاسىپكەرلەردىڭ قۇقىقتارى مەن مۇددەلەرىنە قاتىستى نورماتيۆتىك-قۇقىقتىق اكتىلەردى تالقىلاۋ مۇمكىندىگى قاراستىرىلعان. ەندىگىدە كەز كەلگەن كاسىپكەر وسى قىزمەتتى پايدالانىپ, جۇمىس ىستەي الادى», دەدى ۆيتسە-مينيستر. بۇگiنگi كۇنi «بايتەرەك» حولدينگi قايتا وڭدەۋ سەك­تورىنداعى شاعىن جانە ور­تا بيزنەس جوبالارىن نەسيە­لەندiرۋگە «دامۋ» قورى ارقىلى 200 ملرد. تەڭگە ءبولۋدi قاراستىرىپ وتىر, دەپ باستادى ءسوزىن ق.سۇل­تان­عازيەۆ. ونىڭ سوزىنە زەر سالساق, قارجى ەكiنشi دەڭگەيلi بانكتەر ارقىلى بولiنەتiن بولماق. مۇنىمەن بىرگە, بانكتەر تاراپىنان جوبالاردى تەڭ قارجىلاندىرۋ مۇمكiندiگi دە قاراستىرىلىپ جاتىر ەكەن. ياعني قور ارقىلى بەرىلەتىن 200 ملرد. تەڭگەنiڭ ۇستiنەن بانكتەردiڭ تاعى دا 200 ملرد. تەڭگە قوسىمشا قارجىلاندىرۋىن ۇسىنىپ وتىرعان كورىنەدى. مۇنداعى ەسكەرەتىن جاعداي – بانكتەر تاراپىنان قارجى نارىقتىق شارتتارعا سايكەس تارتىلاتىن بولادى. نۇرباي ەلمۇراتوۆ, «ەگەمەن قازاقستان».