پالاتا توراعاسىنىڭ ورىنباسارى اسقار شاكىروۆ شارانى اشىپ, مەملەكەت باسشىسىنىڭ ەلىمىزدىڭ جاڭا ەكونوميكالىق باعىتى, ونىڭ ىشىندە قازاقستاننىڭ ونەركاسىپتىك الەۋەتىن اشۋعا نەگىزدەلۋى ءتيىس جەتى نەگىزگى قاعيداتى بەلگىلەگەنىن اتادى.
سوڭعى 5 جىلدا قاداعالاناتىن سۋبەكتىلەر سانى از عانا وسسە دە ونەركاسىپ كاسىپورىندارىنداعى اپاتتار 30%-عا ارتا تۇسكەنى جانە جاعدايعا تالداۋ جاساعاندا وندىرىستەردە تەحنوگەندىك اۆاريالاردىڭ تۋىنداۋ قاۋپى بۇرىنعىسىنشا جوعارى دەڭگەيدە قالىپ وتىرعانى ايتىلدى.
«مەملەكەت باسشىسى قاسىم-جومارت توقاەۆ حالىققا جولداۋىندا ەلىمىزدىڭ ونەركاسىپتىك الەۋەتىن اشۋ, ونىڭ ىشىندە ستراتەگيالىق ماڭىزدى وندىرىستەردى, نەگىزگى ەكسپورتتىق باسىمدىقتاردى ايقىنداۋ, سونداي-اق ونەركاسىپتى قولداۋ شارالارىن شىنايى ىستەرمەن تولىقتىرۋ جونىندە ناقتى تاپسىرمالار بەردى. وسىعان بايلانىستى ۇيىمدىق مادەنيەتتىڭ ءبىر بولىگى بولىپ تابىلاتىن وندىرىستەگى قاۋىپسىزدىكتىڭ جوعارى مادەنيەتىن قالىپتاستىرۋ, قولداۋ جانە دامىتۋ قاجەت دەپ سانايمىز. ويتكەنى ول وندىرىستىك جانە ەكونوميكالىق ماقساتتاردان باسىم بولىپ, بارلىق قىزمەت تۇرلەرىنىڭ جالپىعا بىردەي جانە اجىراماس بولىگى بولۋى ءتيىس», دەدى اسقار شاكىروۆ.
جاقىندا قاراعاندى وبلىسىنىڭ «اباي» شاحتاسىندا بولعان توتەنشە جاعداي سەكىلدى قايعىلى وقيعالاردىڭ قايتالانباۋى ءۇشىن ونەركاسىپ قاۋىپسىزدىگى سالاسىنداعى پروبلەمالاردى شەشۋ اسا ماڭىزدى. وسى ايماقتان سايلانعان سەناتور سەرگەي ەرشوۆ قازىر ونەركاسىپ قاۋىپسىزدىگى سالاسىنداعى جاعدايدى جاقسارتۋعا باعىتتالعان زاڭنامالىق باستامالاردى قاراۋ ەڭ وتكىر ماسەلە دەپ سانايدى.
«ۋاكىلەتتى ورگانعا قاۋىپتى ءوندىرىس وبەكتىلەرىن جاڭارتۋ مەن تەحنيكالىق قايتا جاراقتاندىرۋدىڭ بىرلەسكەن جوسپارىن جاساۋ مەن بەكىتۋ جونىندە ءتيىستى مىندەتتەردى بەرە وتىرىپ, قاۋىپتى ءوندىرىس وبەكتىلەرىن پايدالاناتىن ۇيىمدارعا تەحنيكالىق قايتا جاراقتاندىرۋدىڭ بىرلەسكەن جوسپارىن ورىنداۋ جانە ءبىرىنشى باسشىعا تىكەلەي باعىناتىن وندىرىستىك جەكە باقىلاۋ قىزمەتىن قۇرۋعا قاجەتتى شارالار قابىلداۋ مىندەتتەرىن بەكىتۋ قاجەت», دەپ اتاپ ءوتتى سەناتور.
پارلامەنتشىلەر سونىمەن قاتار ونەركاسىپ قاۋىپسىزدىگى سالاسىنداعى كادرلاردىڭ وتكىر تاپشىلىعىن, ينسپەكتورلار قۇرامىنىڭ قىسقارۋىن, سونداي-اق وسى سالادا عىلىمي-زەرتتەۋ قىزمەتىنىڭ ءتيىستى دارەجەدە جۇرگىزىلمەي كەلە جاتقانىن اتاپ ءوتتى.
توتەنشە جاعدايلار ءمينيسترى يۋري يلين ونەركاسىپ قاۋىپسىزدىگى سالاسىنداعى اعىمداعى جاعداي تۋرالى ۇكىمەت ساعاتىنا قاتىسۋشىلارعا بايانداپ بەردى. ونىڭ ايتۋىنشا, جىل باسىنان بەرى ءبىر جارىم مىڭنان استام تەكسەرۋ جۇرگىزىلدى. ناتيجەسىندە زاڭ بۇزىلعانى تۋرالى 27 مىڭ دەرەك انىقتالدى, ادام ءومىرى مەن دەنساۋلىعىنا زيان كەلتىرۋ قاۋىپى ءۇشىن 1 184 ادام 150 ميلليون تەڭگەدەن استام سوماعا جاۋاپكەرشىلىككە تارتىلدى, سونداي-اق 432 وبەكتىنىڭ جۇمىسى توقتاتىلدى.
مينيستر اعىمداعى جىلدىڭ ءساۋىر ايىندا قابىلدانعان «ونەركاسىپتىك قاۋىپسىزدىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ ارقاسىندا ونەركاسىپ قاۋىپسىزدىگى سالاسىنداعى زاڭناما ەرەجەلەرىن جەتىلدىرۋگە جانە مەملەكەتتىك قاداعالاۋدى جۇزەگە اسىرۋدىڭ تيىمدىلىگىن ارتتىرۋعا قول جەتكەنىن اتاپ ءوتتى. سونداي-اق قاۋىپتى وبەكتىلەردەگى جۇمىسشىلاردىڭ ەڭبەك ءتارتىبىن جاقسارتۋ, ازاماتتاردى قاۋىپتى وندىرىستىك فاكتورلاردان قورعاۋ دەڭگەيىن ارتتىرۋ جانە اپات سالدارىنان وزگە ادامدارعا زيان كەلتىرۋ ىقتيمالدىعىن ازايتۋ ماقساتىندا 40 نورماتيۆتىك قۇقىقتىق اكت بەكىتىلدى.
ۇكىمەت ساعاتى وتىرىسىنا توراعالىق ەتكەن مۇحتار قۇل-مۇحاممەد كەزدەسۋ بارىسىندا كوتەرىلگەن بارلىق ماسەلەلەر مەن ايتىلعان ۇسىنىستار ورتاق تىزبەگە ەنگىزىلىپ, جاۋاپتى مەملەكەتتىك ورگاندار مەن مەكەمەلەرگە جىبەرىلەتىنىن اتاپ ءوتتى.
