ول اتالعان كومىر كەنىشىندەگى بارلىق جۇمىستار توقتاتىلعانىن جانە قازىر ول جەردە مەملەكەتتىك كوميسسيا بار ەكەنىن اتاپ ءوتتى.
«شاحتادان ءبىر ۋاقىتتا 8 مىڭ تەكشە مەتردەن استام مەتان شىعارىلعانى انىقتالدى. ءبىز ءدال وسى كەنجاردا مەتان كونتسەنتراتسياسىنىڭ 41%-دان استام كۇرت ءوسۋىن بايقادىق. 100 تونناعا جۋىق تاۋ-كەن ءۇيىندىسى بولدى. بۇگىنگى كۇنى ۇيىندىلەردى جيناۋ جۇمىستارى جالعاسۋدا. مەنىڭ ويىمشا, كۇننىڭ سوڭىنا دەيىن شىعارۋ جۇمىستارى اياقتالادى», دەدى يۋري يلين سەناتتاعى ۇكىمەت ساعاتىندا.
مينيستر ۇكىمەت ساعاتىنان كەيىن اپاتتىڭ سەبەپتەرىن انىقتاۋ ءۇشىن قاراعاندى وبلىسىنا اتتاناتىنىن حابارلادى.
«بىرنەشە رەت ءبىز «ارسەلورميتتال تەمىرتاۋ» وبەكتىلەرىندەگى ونەركاسىپتىك قاۋىپسىزدىكتىڭ قاناعاتتانعىسىز جاي-كۇيىنە نازار اۋداردىق. ينسپەكتورلار تۇراقتى نەگىزدە تاۋ-كەن جۇمىستارىن جۇرگىزۋگە, كومىر قاباتتارىن الدىن الا گازسىزداندىرۋعا, كەيبىر ۋچاسكەلەردە مەتان كونتسەنتراتسياسىن اۆتوماتتى تۇردە انىقتاۋ جۇيەسىنىڭ بولماۋىنا بايلانىستى قاۋىپسىزدىك تالاپتارىن جۇيەلى تۇردە بۇزۋشىلىقتاردى انىقتادى», دەدى يلين.
ونىڭ ايتۋىنشا, سوت ورگاندارىنا كومىر شاحتالارىنىڭ قاۋىپتى ۋچاسكەلەرىندە تاۋ-كەن جۇمىستارىن جۇرگىزۋدى توقتاتا تۇرۋعا تالاپ ارىزدار جىبەرىلگەن. بىراق سوت قاۋىپتى ۋچاسكەلەردى توقتاتا تۇرۋ تۋرالى شەشىمدى قولدامايدى جانە تەك اكىمشىلىك ايىپپۇل سالادى.
«سانكتسيالار مەن سالىناتىن اكىمشىلىك ايىپپۇلداردىڭ سوماسى تەكسەرىلەتىن سۋبەكتىلەرگە قاتىستى شامالى, بۇل ولاردى بۇزعانى ءۇشىن جاۋاپكەرشىلىكتى نيۆەليرلەۋگە اكەپ سوعادى. ءىس جۇزىندە اكىمشىلىك ايىپپۇل تولەۋ تيىمدىرەك بولدى», دەدى تجم باسشىسى.
ەسكە سالا كەتسەك, 7 قاراشادا «ارسەلورميتتال تەمىرتاۋ» اق «اباي» شاحتاسىندا مەتان لاقتىرىلىپ, كەنەتتەن جارىلىس بولدى. اپات سالدارىنان ەكى ادام زارداپ شەگىپ, التى شاحتەر قازا تاپتى. ءىس بويىنشا تەرگەۋ جۇمىستارى باستالدى.
