قازىرگى كەزدە ءتۇرلى بۇقارالىق اقپارات قۇرالدارىنان نەمەسە الەۋمەتتىك جەلىلەردەن ينتەرنەت الاياقتىقتىڭ قۇربانى بولعاندار تۋرالى ءجيى بايقايتىن بولدىق. ولاردىڭ جاريالاعان شاعىمدارى دا جۇرت نازارىن وزىنە اۋدارۋدا. شىنىندا دا, قازىر وڭاي ولجاعا كەنەلگىسى كەلەتىن, قينالماي-اق قاراجات تابۋدى ماقسات ەتكەن الاياقتاردىڭ قاپتاپ كەتكەنى راس. ال ولاردىڭ قۇرعان قاقپانىنا ءتۇسىپ قالىپ, ارتىنان اھ ۇرىپ جاتقان قاراپايىم حالىق تا از ەمەس. بۇل رەتتە پوليتسيا قىزمەتكەرلەرى الاياقتاردىڭ قۇربانى بولماس ءۇشىن تۇرعىندارعا قاۋىپسىزدىك شارالارىن ساقتاۋدى ءجيى ايتادى.
ماسەلەن, بۇگىندە جامبىل وبلىسىندا ينتەرنەت الاياقتىق ءورشىپ تۇر دەۋگە بولادى. جەرگىلىكتى پوليتسيا قىزمەتكەرلەرى اتالعان كۇردەلى ماسەلەنى توقتاتۋعا قانشا كۇش سالىپ, جۇمىس اتقارىپ جاتقانىمەن, مۇنىڭ ءالى دە اۋىزدىقتالاتىن ءتۇرى جوق. ءبىر جاعىنان بۇل بەس تەڭگەسىن وڭاي جولمەن ون تەڭگە قىلعىسى كەلەتىن كەيبىر ادامداردىڭ دا كىناسى. ءسويتىپ, ارتىنان بارماق تىستەپ, سان سوعىپ قالادى. قوعامداعى وسى ءبىر كۇردەلى ماسەلە ءبىر كۇندە شەشىلە سالمايتىنى انىق. وسى ورايدا, قاراپايىم حالىققا قۇزىرلى ورگان وكىلدەرىنىڭ دە كومەگى قاجەت. «بۇگىنگى تاڭدا تارالۋ اۋقىمى كريمينوگەندىك ستاتيستيكاعا ايتارلىقتاي اسەرىن تيگىزىپ وتىرعان IT-قىلمىستارعا قارسى كۇرەسكە ەرەكشە نازار اۋدارىلۋدا. جىل باسىنان بەرى ەلىمىزدىڭ ىشكى ىستەر ءمينيسترىنىڭ بۇيرىعىمەن بەكىتىلگەن اقپاراتتاندىرۋ جانە بايلانىس سالاسىنداعى قىلمىستارعا, سونداي-اق اقپاراتتىق تەحنولوگيالاردى پايدالانا وتىرىپ جاسالاتىن قىلمىستارعا قارسى ءىس-قيمىل بويىنشا 2021-2022 جىلدارعا ارنالعان باعدارلاما ىسكە اسىرىلۋدا», دەيدى وبلىستىق پوليتسيا دەپارتامەنتىنىڭ باستىعى, گەنەرال-مايور جانات سۇلەيمەنوۆ. اتاپ ايتساق, وڭىردە بيىلعى 10 ايدا ينتەرنەت-الاياقتىقتىڭ 301 دەرەگى تىركەلگەن. وكىنىشكە قاراي, بۇل كورسەتكىش وتكەن جىلدىڭ وسى كەزەڭىمەن سالىستىرعاندا 72 پايىزعا جوعارى بولىپ وتىر. پوليتسيا قىزمەتكەرلەرىنىڭ ارالاسۋىمەن 44 الاياق ۇستالعان. ال ونىڭ ىشىندە 14 الاياق ەلىمىزدىڭ وزگە وڭىرلەرىنىڭ تۇرعىندارى بولىپ شىقتى.
سونداي-اق جامبىل وبلىستىق پوليتسيا دەپارتامەنتىنىڭ مالىمەتىنشە, تمد اۋماعىندا ەل ازاماتتارىنا قاتىستى ينتەرنەت جەلىسى ارقىلى دا 82 الاياقتىق دەرەگى تىركەلىپتى. كوبىنەسە مۇنداي دەرەكتەر بانك كارتالارى مەن ەسەپشوتتاردان قاراجات ۇرلاۋمەن, ازاماتتاردىڭ جەكە دەرەكتەرىن الاياقتىق جولمەن پايدالانۋمەن, تاۋارلاردى ساتۋ نەمەسە ءتيىستى قىزمەتتەردى كورسەتۋ تۋرالى حابارلاندىرۋلار بەرۋمەن, سونداي-اق اقشانى پايدالى بيزنەسكە سالۋ تۋرالى جارنامالارمەن بايلانىستى دا ورىن الادى ەكەن. دەسە دە, وبلىستىق پوليتسيا دەپارتامەنتى قوعامدىق ورىنداردا, الەۋمەتتىك جەلىلەردە جانە بۇقارالىق اقپارات قۇرالدارىندا پروفيلاكتيكالىق بەينەروليكتەردى كورسەتۋ ارقىلى الاياقتاردىڭ ايلا-امالدارىنان قورعانۋعا قاتىستى الدىن الۋ جۇمىستارىن ۇدايى جۇرگىزىپ كەلەدى. ناتيجەسىندە, ءبىراز قىلمىسكەر ۇستالعان. بيىلدىڭ وزىندە الاياقتىق سيپاتتاعى 50-گە جۋىق حابارلاندىرۋ مەن 115 ينتەرنەت-رەسۋرس كوزدەرى انىقتالىپ, بۇعاتتالعان. سونىمەن قاتار قازىرگى تاڭدا وڭىردە ەكىنشى دەڭگەيدەگى بانكتەردىڭ وكىلدەرىمەن كيبەرالاياقتىقتىڭ الدىن الۋ بويىنشا دا بىرلەسكەن جۇمىس اتقارىلۋدا.
نەگىزىنەن الاياقتاردىڭ بارلىق ۆەب-رەسۋرستاردى قولدانا الاتىنى جانە جالعان پاراقشالار جۇرگىزەتىنى بەلگىلى. ءبىر سوزبەن ايتقاندا, ينتەرنەتتىڭ قىر-سىرىن وتە جاقسى بىلەدى. ال تالاي جىل ماڭداي تەرىمەن تاپقان تابىسىن وڭاي ولجاعا كەنەلگىسى كەلەتىندەردىڭ قولىنا ۇستاتا سالۋدى ەشكىم دە قۇپتامايدى. قازىرگى زامانداعى وزىق تەحنولوگيانىڭ ءبىرى دەلىنەتىن ينتەرنەتتىڭ شاراپاتى ۋاقىتتى ۇنەمدەۋ, قاجەتتى مۇمكىندىكتىڭ بارىنە قول جەتكىزۋ بولسا, زالالى وسى الاياقتاردىڭ قاپتاپ, ولاردىڭ قۇرباندارىنىڭ سانى كوبەيگەنىندە بولىپ وتىر.
جامبىل وبلىسى
