سەمينار-كەڭەسكە نۇر-سۇلتان قالاسىنداعى پرەزيدەنتتىك كلينيكانىڭ سونداي-اق, الماتى قالالىق ورتالىق كلينيكالىق اۋرۋحاناسىنىڭ باسشىلارى مەن جەتەكشى ماماندارى, قر دەنساۋلىق ساقتاۋ مينيسترلىگى مەن وڭىرلىك دەنساۋلىق ساقتاۋ باسقارمالارىنىڭ وكىلدەرى, ەلىمىزدىڭ جەتەكشى عزي عالىمدارى, گەرمانيا, فرانتسيا, تۇركيا, رەسەي, گرۋزيا, ءازىربايجان, بالتىق ەلدەرىنەن وسىنداي كلينيكالىق باعىتتاعى شەتەلدىك مەديتسينالىق ورتالىقتاردىڭ بەدەلدى ماماندارى قاتىسۋدا.
قازاقستان رەسپۋبليكاسى پرەزيدەنتى ءىس باسقارماسى مەديتسينالىق ورتالىعىنىڭ باسشىسى ساۋلە قيسىقوۆا قازاقستاندىقتاردىڭ زاماناۋي مەديتسينالىق قىزمەتتەرگە تەڭ قول جەتكىزۋى ءۇشىن دەنساۋلىق ساقتاۋ جۇيەسىن دامىتۋدىڭ ماڭىزدىلىعىن اتاپ ءوتتى.
«بىرىڭعاي ۇلتتىق دەنساۋلىق ساقتاۋ جۇيەسىن ەنگىزۋ ءبىزدىڭ ورتالىقتىڭ مەديتسينالىق ۇيىمدارىنا قازاقستان رەسپۋبليكاسىنىڭ حالقىنا مەديتسينالىق قىزمەت كورسەتۋ بويىنشا باسەكەلەس ورتاعا كىرۋگە مۇمكىندىك بەردى. بىرىڭعاي ۇلتتىق دەنساۋلىق ساقتاۋ جۇيەسىنىڭ نەگىزگى قاعيداتى پاتسيەنتتىڭ دارىگەردى جانە مەديتسينالىق ۇيىمدى ەركىن تاڭداۋ قۇقىعى بولىپ تابىلادى. بۇل قۇقىقتى ەلىمىزدىڭ بارلىق وڭىرلەرىنەن 100 مىڭنان استام ازامات پايدالانىپ, ءبىزدىڭ اۋرۋحانالاردا ەم الدى», دەدى ول.
ورتالىقتىڭ نەگىزگى ميسسياسى - دياگنوستيكانىڭ, ەمدەۋ مەن وڭالتۋدىڭ جوعارى تەحنولوگيالىق ادىستەرىن قولدانا وتىرىپ, مەديتسينالىق كومەككە قول جەتكىزۋ ارقىلى قازاقستاندىقتاردىڭ دەنساۋلىعىن ساقتاۋ جانە قولداۋ. ورتالىقتىڭ ۆەدومستۆولىق باعىنىستى ۇيىمدارىندا بار زاماناۋي جوعارى دالدىكتى اپپاراتۋرا, وزىق تەحنولوگيالاردى پايدالانۋ, عىلىمي جەتىستىكتەر مەن كاسىبي كادرلار كارديولوگيالىق, نەۆرولوگيالىق جانە ونكولوگيالىق اۋرۋلاردى ەرتە انىقتاۋعا ىقپال ەتەتىنىنە دە باسا نازار اۋدارىلدى.
شارا بارىسىندا اسا كۇردەلى اۋرۋلاردى ەمدەۋدەگى وتاندىق مەديتسينانىڭ مۇمكىندىكتەرى مەن جەتىستىكتەرى تالداندى. جينالعاندار ورتالىق اۋرۋحانالاردىڭ قىزمەت باعىتتارى بەلگىلەنىپ, بىرەگەي وپەراتسيالار جۇرگىزىلەتىن جاڭا جابدىقتار تانىستىرىلدى.
قازاقستاندىق جانە شەتەلدىك مەديتسينا ماماندارى قازىرگى زامانعى عىلىمنىڭ يننوۆاتسيالىق باعىتتارىنىڭ ءبىرى - يادرولىق مەديتسيناعا كوڭىل بولۋگە شاقىرىپ, كوروناۆيرۋس پاندەمياسى جاعدايىندا دەنساۋلىق ساقتاۋ جۇيەسىنىڭ جۇمىس ىستەۋىن ءتيىمدى ۇيىمداستىرۋ باعىتىندا تاجىريبە الماستى.
سونداي-اق, سەمينار-كەڭەس قاتىسۋشىلارى قازاقستان رەسپۋبليكاسى پرەزيدەنتى ءىس باسقارماسى مەديتسينالىق ورتالىعىنىڭ جوعارى تەحنولوگيالىق مەديتسينالىق كومەك كورسەتۋگە ارنالعان زاماناۋي قۇرال-جابدىقتارىن جوعارى باعالادى.
سونىمەن بىرگە, ورتالىق ماماندارى مەديتسينالىق - يادرولىق تەحنولوگيالار مەن روبوت-حيرۋرگ, گەنومدىق زەرتحانانىڭ جۇمىسىمەن تانىستىردى. ەل اۋماعىندا انالوگى جوق مەديتسينالىق قۇرال-جابدىقتاردىڭ جىل جىلجىعان سايىن مۇمكىندىكتەرى ارتىپ, اۋرۋدى ەرتە ساتىدان انىقتاۋعا مول ۇلەس قوساتىنىن جەتكىزدى.
