«2020 جىلدىڭ قورىتىندىسى بويىنشا ەلىمىزدە سۋمەن جابدىقتاۋ قىزمەتتەرىنە قولجەتىمدىلىك 94,1%-دى قۇرادى, ونىڭ ىشىندە: اۋىلداردا - 90,1%, قالالاردا - 97,5%. وسى جىلدىڭ جوسپارلى كورسەتكىشتەرى اۋىلداردا – 91,8%, قالالاردا - 98%», دەدى قايىربەك وسكەنباەۆ ماجىلىستەگى دوڭگەلەك ۇستەل بارىسىندا.
ءبىرىنشى ۆيتسە-ءمينيستردىڭ ايتۋىنشا, ەلىمىزدىڭ جەكەلەگەن وڭىرلەرىندە ارتتا قالۋشىلىق بايقالادى.
«اۋىل تۇرعىندارىن اۋىزسۋمەن قامتۋدىڭ ەڭ تومەنگى دەڭگەيى قوستاناي وبلىسىندا - 64,7%, شىعىس قازاقستان وبلىسىندا - 81,4%, سولتۇستىك قازاقستان وبلىسىندا - 82,1% جانە جامبىل وبلىسىندا - 82,2% بايقالادى», دەپ حابارلادى قايىربەك وسكەنباەۆ.
ونىڭ ايتۋىنشا, ەلىمىزدىڭ ءتۇرلى وڭىرلەرىنىڭ تۇرعىندارى تازا اۋىز سۋعا, تابيعي گازعا, كولىك ينفراقۇرىلىمىنا قولجەتىمدىلىكتىڭ ءارتۇرلى دەڭگەيىنە يە.
«وسى تەڭسىزدىكتى جويۋ بويىنشا جۇمىستاردى جانداندىرۋ قاجەت. وسىعان بايلانىستى, قامتاماسىز ەتىلۋ كورسەتكىشتەرى تومەن وڭىرلەرگە باسىم نەگىزدە قاراجات بولىنەدى, بۇل ارتتا قالعان وڭىرلەر كورسەتكىشتەرىنىڭ دەڭگەيىن ارتتىرۋعا مۇمكىندىك بەرەدى», ۆيتسە-مينيستر.
سپيكەردىڭ ايتۋىنشا, «اۋىل – ەل بەسىگى» ارنايى جوباسىنا ەنگىزىلگەن اۋىلدارعا جانە وڭىرلەردى دامىتۋدىڭ كەشەندى جوسپارلارىنا ەنگىزىلگەن جوبالارعا باسىمدىق بەرىلەدى. ەل بويىنشا بارلىعى 6 316 اۋىل, ونىڭ ىشىندە 3 991 اۋىل ورتالىقتاندىرىلعان سۋمەن قامتاماسىز ەتىلگەن, 403 اۋىلدا كەشەندى بلوك-مودۋلدەر ورناتىلعان. قامتاماسىز ەتىلمەگەن 1 922 اۋىلدىڭ 793-ىندە ورتالىقتاندىرىلعان سۋمەن جابدىقتاۋ قۇرىلىسىن جالعاستىرۋ جوسپارلانۋدا, ال 1 129 اۋىلدا سۋدى تازارتۋدىڭ جەرگىلىكتى جۇيەسى ورناتىلادى.
«بيىل تاعى 148 اۋىلدى ورتالىق سۋمەن قامتاماسىز ەتۋ جانە حالقى از 220 اۋىلعا كبم ورناتۋ جوسپارلانۋدا», دەپ اتاپ ءوتتى قر يدم ءبىرىنشى ۆيتسە-ءمينيسترى.
