پوليتسيا دەپارتامەنتى ءباسپاسوز قىزمەتىنىڭ مالىمەتىنشە, وپەراتسيانىڭ باستى ماقساتى - ەسىرتكى قۇرالدارى مەن پسيحوتروپتىق زاتتاردىڭ زاڭسىز اينالىمى فاكتىلەرىن انىقتاۋ, جابايى قاراسورانى زاڭسىز جەتكىزۋ ارنالارىن جابۋ.
وبلىستىق پوليتسيا قىزمەتكەرلەرى وسى سالاداعى 125 زاڭ بۇزۋشىلىقتى انىقتادى. ونىڭ ىشىندە ەسىرتكىنى وتكىزۋدىڭ 47 فاكتىسى بار.
ماسەلەن, وسىنداي ەسىرتكى ساتۋشىلارىنىڭ ءبىرى پەتروپاۆل قالاسىنىڭ ورتالىعىندا ۇستالدى. جامبىل اۋدانىنىڭ 39 جاستاعى تۇرعىنىن پوليتسەيلەر ماقساتتى تۇردە ىزدەستىردى. ونىڭ «Subaru Legacy» كولىگىنەن بەس كيلوگرامم ماريحۋانا بار پوليمەرلى پاكەت الىندى. ۇستالعان ادام ەكى جىل بويى ەسىرتكى قولدانعانىن جانە ونى باسقالارعا دا ساتقانىن مويىندادى. سوت شەشىمى بويىنشا ول 10 جىلعا باس بوستاندىعىنان ايىرىلدى.
«بەس اي ىشىندە زاڭسىز اينالىمنان 295,5 كگ استام ءتۇرلى ەسىرتكى قۇرالدارى تاركىلەندى. جىل باسىنان بەرى - 409,5 كگ, ونىڭ ىشىندە 4,2 كگ-نان استامى «سينتەتيكا» جانە 4,1 كگ «گاشيش». ەسىرتكى بيزنەسى سالاسىندا 195 ءتۇرلى قىلمىس انىقتالدى. ونىڭ 49-ى ەسىرتكى وتكىزۋ, 15-ءى اسا ءىرى كولەمدە ساقتاۋ فاكتىلەرى», دەدى پوليتسيا دەپارتامەنتى باستىعىنىڭ ورىنباسارى رۋسلان نازاروۆ.
