«سىبايلاس جەمقورلىققا قارسى ءىس-قيمىل سالاسىنداعى زاڭناما بويىنشا جول بەرگەن مەكەمەلەرگە قىلمىستىق ىستەر اياسىندا جەمقورلىققا جۇيەدەگى ولقىلىقتى جويۋ تۋرالى ۇسىنىمدار ەنگىزىلەدى. مەملەكەتتىك ورگانداردىڭ نازارىنا وسى ماندەگى 38 ۇسىنىم جولداندى. ونىڭ 34-ءى جاۋاپتى ورگاندار قاراپ ۇلگەردى. ءبىز جولداعان ۇسىنىمداردى قاراۋدىڭ قورىتىندىسىندا 24 لاۋازىمدى تۇلعا تارتىپتىك جاۋاپقا تارتىلىپ, ەكەۋى قىزمەتىنەن بوساتىلدى. سونداي-اق, 4 ادام مەملەكەتتىك قىزمەتتەن قۋىلدى. وسى 24 ادامنىڭ ىشىندە ءتۇرلى دەڭگەيدەگى 9 باسشى, ورتالىق بۋىنداعى جەتەكشىلەر بار», دەدى شىڭعىس قابدۋلا Astana Adaldyq Alańy جوبالىق كەڭسەسىندە وتكەن ونلاين بريفينگىدە.
سونداي-اق ول سىبايلاس جەمقورلىقپەن كۇرەسكە اتسالىسقان تۇرعىنداردى ىنتالاندىرۋ شارالارى تۋرالى دا ءسوز قوزعادى.
«پاراقورلىق تۋرالى تۇسكەن حابار راستالىپ, سوت ۇكىمى كۇشىنە ەنگەننەن كەيىن مالىمەت بەرگەن ادامعا پارا سوماسىنىڭ 10 پايىزى كولەمىندە سىياقى بەرىلەدى. بىراق ونىڭ مولشەرى 3000 اەك-تەن اسپاۋى كەرەك. ياعني, جاسالعان قىلمىستىڭ اۋىرلىعىنا بايلانىستى 7,6 ملن تەڭگەگە دەيىن سىياقى تولەنەدى. بيىلعى 10 ايدىڭ قورىتىندىسى بويىنشا ەلوردا بويىنشا 6 ادام سىياقى الدى. ولارعا تولەنگەن سىياقى مولشەرى ازىرگە 2 ملن تەڭگەدەن استى», دەدى دەپارتامەنت باسشىسى.
