بۇل تۋرالى ەكولوگيا دەپارتامەنتىنىڭ باسشىسى ءۋاليحان قاينازاروۆ تۇركىستان وڭىرلىك كوممۋنيكاتسيالار قىزمەتىندە وتكەن بريفينگ كەزىندە مالىمدەدى. كەنتاۋ قالاسىنىڭ اكىمى داۋرەن ماقاجانوۆقا 100 ايلىق ەسەپتىك كورسەتكىش كولەمىندە ايىپپۇل سالىنعانى بەلگىلى بولدى.
كەنتاۋ قالاسىنىڭ اكىمى ەكولوگتار سالعان بۇل ايىپپ ۇلىمەن كەلىسپەي, سوتقا جۇگىنىپتى. اكىمدىكتىڭ ءباسپاسوز حاتشىسى جاننا ءالىمباي بۇگىن سوت وتىرىسى وتەتىنىن العا تارتىپ, رەسمي پىكىردى كەيىنىرەك بەرۋگە ۋادە ەتتى.
«وكىنىشكە قاراي, قازىر كوپ جەر لاستانىپ بارا جاتقانىن بايقايسىزدار ما؟ اسىرەسە كەنتاۋ قالاسى لاس بوپ كەتكەن. كەزىندە ەڭ تازا قالا بولاتىن. كونتەينەر الاڭشالاردىڭ ءبارىن كوشەگە شىعارىپ تاستاعان. ول بەلگىلەنگەن تارتىپكە جاتپايدى. سوندىقتان ءبىز جاۋاپتى ازاماتتارعا ايىپپۇل سالىپ جاتىرمىز. سەبەبى ولار سول جۇمىستاردى اتقارۋعا مىندەتتى. قالا اكىمىنە 300 مىڭ تەڭگە كولەمىندە ايىپپۇل سالدىق, قازىر بىزبەن سوتتاسىپ جاتىر», دەدى ءۋاليحان قاينازاروۆ.
ەكولوگيا دەپارتامەنتىنىڭ باسشىسى جاقىندا تۇركىستان قالاسى اكىمىنىڭ ورىنباسارىنا دا ايىپپۇل سالىنۋى مۇمكىن ەكەنىن ايتتى. ايتۋىنشا, شەنەۋنىككە ولقىلىقتى رەتتەۋ ءۇشىن ۋاقىت بەرىلگەن. ەگەر ورىندالماسا, ول دا 100 ايلىق ەسەپتىك كورسەتكىش كولەمىندە ايىپپۇل تولەۋگە مىندەتتەلەدى.
