باتىس قازاقستان وبلىسىندا اۆتوگاز باعاسى ليترىنە 120 تەڭگەگە دەيىن كوتەرىلدى. كەيبىر اۆتوگاز قۇيۋ ستانتسيالارىندا وتىن تەك تالون بويىنشا بەرىلەدى. سۇيىتىلعان گاز 1 قاراشادان كەيىن قىمباتتاپ كەتكەن. بقو ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى 5 مىڭ توننا اۆتوگاز قاجەت بولعان جاعدايدا وڭىرگە 1 مىڭ تونناعا جۋىق اۆتوگاز جىبەرىلگەنىن حابارلادى. سۇيىتىلعان گازدىڭ قالعان كولەمىن وتكىزۋشىلەر ەلەكترون ساۋدا الاڭدارىندا ساتىپ الۋى ءتيىس. تاپشىلىق جوق.
اۆتوبۋس جۇرگىزۋشىلەرى اۆتوگازدىڭ قىمباتتاۋىنا نارازىلىعىن ءبىلدىردى. جول ءجۇرۋ باعاسىن ورال-اقساي جانە ورال-اتىراۋ باعىتىنداعى تاكسي جۇرگىزۋشىلەرى كوتەرىپ جىبەرگەن.
جىل باسىنان بەرى اۆتوگاز قوستانايدا ەكى ەسە قىمباتتادى. ەگەر قاڭتاردا كوگىلدىر وتىندى ليترىنە 65 تەڭگەدەن قۇيۋعا بولاتىن بولسا, قازىر ونىڭ قۇنى 124,9 تەڭگەگە دەيىن ءوستى. ءوڭىردىڭ وتىن نارىعىنداعى سوڭعى دۇرلىكپە قىركۇيەكتىڭ اياعىندا بولدى, گاز تاپشىلىعىنان قوستانايلىق جۇرگىزۋشىلەرگە اۆتوگاز تەك تالون ارقىلى بەرىلگەن. كەيىن جاعداي تۇراقتالدى, بىراق باعا ءوسىپ جاتىر.
ءبىر ايدان اسا ۋاقىت بويى وسكەمەندە اۆتوگاز باعاسى وزگەرىسسىز قالدى. شىعىس قازاقستان وبلىسىنىڭ ورتالىعىندا گاز ليترىنە 120 تەڭگە تۇرادى.
«گاز باعاسى شامامەن ءبىر اي بۇرىنعى 99 تەڭگەدەن بىردەن 120 تەڭگەگە دەيىن ءوستى. ازىرگە ۇستاپ تۇر. ەگەر تالداۋ جۇرگىزسەك, بيىلعى اقپاننان باستاپ گازدىڭ قۇنى ەكى ەسەگە جۋىق – 67 تەڭگەدەن 120 تەڭگەگە دەيىن ءوستى», دەدى وسكەمەندەگى جانارماي قۇيۋ سانتسياسى قىزمەتكەرى گالينا.
جۇرگىزۋشى سەرىك قۇمارعاجيننىڭ ايتۋىنشا, قالادا گاز تاپشىلىعى جوق. الايدا, ول جانارماي باعاسىنىڭ تۇراقسىزدىعىنا الاڭدايدى.
پاۆلوداردا اۆتوگازدىڭ قۇنى ليترىنە 103 تەڭگەدەن 105 تەڭگەگە دەيىن اۋىتقىپ تۇر. تەك ءبىر ءىرى جقس جەلىسى اۆتوگازدى تالون بويىنشا بەرەدى. ول كەشەگى كۇنگە دەيىن گازدى ليترىنە 92 تەڭگەدەن ساتتى, بىراق 8 قاراشادان باستاپ مۇندا باعا 103 تەڭگەگە دەيىن كوتەرىلدى. ايتا كەتەيىك, ءىرى جانار-جاعارماي قۇيۋ ستانتسيالارىندا ءبىر ليتر گازدىڭ باعاسى 100 تەڭگەدەن 105 تەڭگەگە دەيىن وسكەن.
سولتۇستىك قازاقستان وبلىسىندا ەنەرگەتيكا جانە تكش باسقارماسىنىڭ مالىمەتىنشە, اۆتوكولىكتەرگە جانارماي قۇيۋ ءۇشىن گاز ساتۋمەن 7 گازبەن جابدىقتاۋ ۇيىمى اينالىسادى. ولاردىڭ قورىندا 833 توننا كوگىلدىر وتىن بار, جاقىن كۇندەرى تاعى 809 توننا جەتكىزىلەدى دەپ كۇتىلەدى. قازاننىڭ اياعىندا وڭىردە گاز قۇنى ورتا ەسەپپەن 10 تەڭگەگە وسكەن. اكىمدىك مالىمەتىنشە, ءوسىم ەلەكترون ساۋدا الاڭىنداعى باعانىڭ وسۋىنە بايلانىستى. قازىر جانارماي قۇيۋ بەكەتتەرىندەگى گازدىڭ ورتاشا باعاسى 110-130 تەڭگە ارالىعىندا.
