ءاليا مولداعۇلوۆا اتىنداعى اقتوبە حالىقارالىق اۋەجايىن جەكەشەلەندىرۋ جانە باعالاۋ ساراپتاماسىنىڭ قورىتىندىسى وڭىرلىك كوممۋنيكاتسيالار قىزمەتىندە ايتىلدى.
وبلىس اكىمىنىڭ ءبىرىنشى ورىنباسارى رۋسلان حامباروۆتىڭ مالىمەتىنە سۇيەنسەك, اۋەجاي قۇنىن باعالاۋ كەزىندە ەشقانداي قاتەلىك كەتپەگەن.
«جەكەشەلەندىرۋدىڭ 2021-2025 جىلدارعا ارنالعان كەشەندى جوسپارىنا سايكەس بيىل اۋەجايدى سەنىمگەرلىك باسقارۋعا بەرۋدى جوسپارلاپ وتىرمىز. تاۋەلسىز باعالاۋشىلار جۇمىس جۇرگىزدى. العاشقى كەلىسىمشارت بيىل ناۋرىز ايىندا جاسالىپ, اۋەجاي قۇنى 7,3 ملرد تەڭگە دەپ باعالاندى. ستراتەگيالىق نىسان ەكەنىن بىلەمىز. سوندىقتان اكىمدىكپەن قاتار اۋەجاي دا باعالاۋ جۇرگىزدى. ەكىنشى باعالاۋدا 6,8 ملرد تەڭگەگە ەسەپتەلدى. ءسويتىپ 7,3 ملرد تەڭگە بولىپ بەكىتىلىپ, ءۇش جىلعا سەنىمگەرلىك باسقارۋعا بەرۋ تۋرالى شەشىمدى كوميسسيا قابىلدادى. وسى ۋاقىت ارالىعىندا ينۆەستوردىڭ جۇمىسى باعامدالادى. ەگەر جۇمىستى جۇرگىزە الماسا, كەرى قايتارىپ الۋ قاراستىرىلعان», دەدى وبلىس اكىمىنىڭ ءبىرىنشى ورىنباسارى رۋسلان حامباروۆ.
ايتىپ وتەيىك, اقتوبە اۋەجايىنىڭ قۇنىنا كۇمان كەلتىرگەن دەپۋتاتتار قر پرەمەر-ءمينيسترىنىڭ ءبىرىنشى ورىنباسارى ءاليحان سمايىلوۆتان اۋەجايدى باعالاۋ قۇنىن قايتا تەكسەرۋدى سۇرادى. ءسويتىپ باعالاۋ قورىتىندىسىنا ساراپتاما جۇرگىزىلدى. 27-قىركۇيەك كۇنى جۇمىس باستالىپ, 21-قازاندا قورىندىندى شىعارىلدى. باعالاۋ قۇنىندا ەشقانداي قاتەلىك كەتپەگەن.
«ەندى ارنايى كوميسسيا وتىرىسى ءوتىپ, كەيىن عانا تەندەر جاريالانادى. قازىر ساتۋ ەمەس, ءۇش جىلعا سەنىمگەرلىك باسقارۋعا بەرۋ ماڭىزدى. قازىر «ساتىپ الامىن» دەگەن ناقتى ينۆەستور جوق. بارلىق ينۆەستوردى وسى ساتىلىمعا قاتىسۋعا شاقىرامىن. كەلەسى اپتادا رەسمي حابارلاندىرۋ بەرىلمەك», دەدى ر.حامباروۆ.
ونىڭ ايتۋىنشا, باعالاۋشىنىڭ ءوزى كەلمەسە دە وكىلى اۋەجايدى فوتو, ۆيدەوعا ءتۇسىرىپ العان. بۇل زاڭ تالاپتارىنا قايشى ءىس ەمەس. ءارى سەنىمگەرلىك باسقارۋعا الاتىن كومپانياعا بىرقاتار تالاپ قويىلادى. رۋسلان حامباروۆ قاراپايى ادامدار ءۇشىن بيلەت باعاسى كوتەرىلمەيدى دەگەن سەنىمدە.
ايتا كەتەيىك, بيىل اقتوبەدە 12 نىساندى جەكەشەلەندىرۋ جوسپارلانعان. كوبى جىلۋ, سۋعا جاۋاپتى كوممۋنالدىق مەكەمە.
