رەسەيدىڭ استراحان, ۆولگوگراد, ساراتوۆ, سامارا جانە ورىنبور وبلىستارىمەن شەكتەسەتىن باتىس قازاقستان وبلىسى اۋماعىندا رەسەيلىك ءنومىرلى اۆتوكولىكتەر ءورىپ ءجۇر. قازاقستاندىق تىركەۋدەگى كولىكتەرمەن سالىستىرعاندا ارزان ءارى جاڭالاۋ بولعاندىقتان, حالىق ءجيى تاڭدايدى. باتىس قازاقستان وبلىستىق پوليتسيا باسقارماسىنىڭ دەرەگىنە قاراعاندا, سوڭعى 5 جىل ىشىندە وڭىردە اۆتوكولىك سانى ەكى ەسە كوبەيگەن. وبلىس جولدارىنا تۇسەتىن سالماق تا ارتقان: 2016 جىلى 1 ملن 391 مىڭ اۆتوكولىك جۇرسە, بيىل تەك 10 اي ىشىندە 3 ملن 200 مىڭ اۆتوكولىك جولعا شىققان.
«باتىس قازاقستان وبلىسى اۋماعىمەن وتەتىن حالىقارالىق جانە رەسپۋبليكالىق ماڭىزى بار اۆتوجولداردا اۋىر سالماقتى جۇك كولىكتەرىنىڭ دە سوڭعى ءبىر جىل ىشىندە ءۇش ەسە كوبەيگەنى بايقالدى. ال بۇل جولدار تەحنيكالىق جاعىنان ەنى 7 مەتردەن اسپايتىن 3 دارەجەلى جولدار سانالادى. جوعارىدا ايتىلعان اۋىر جۇك كولىكتەرىنىڭ جىلدامدىعى قازاقستاندىق جول ەرەجەسى بويىنشا ساعاتىنا 70 كم-دەن اسپاۋى ءتيىس. جەڭىل كولىكتەر ولاردى باسىپ وزۋى ءۇشىن جولدىڭ قارسى بەتىنە شىعۋىنا تۋرا كەلەدى. ال بىرنەشە جۇك كولىگى تىركەسىپ, اۆتوكولوننا بولىپ كەلە جاتقان تۇستا مۇنداي مانەۆر جاساۋ وڭاي ەمەس. جول بويىنداعى اپاتتى جاعداي كوبىنە وسىنداي ساتتەردە تۋىندايدى» دەيدى جول ساقشىلارى.
8-17 قاراشا ارالىعىندا باتىس قازاقستان وبلىسى اۋماعىندا «قاۋىپسىز جول» اتتى جەدەل-پروفيلاكتيكالىق ءىس-شاراسى باستالدى. مالىمەتتەرگە قاراعاندا, وڭىردە سوڭعى اپتانىڭ ىشىندە 5 جول-كولىك وقيعاسى بولىپ, 5 ادام جاراقات العان ەكەن. ال سوڭعى 10 اي ىشىندە بولعان 243 جول اپاتىنان 84 ادام قازا تاپقان! 357 ادام ءتۇرلى دەنە جاراقاتىن العان.
جوعارىدا ايتقانىمىزداي, شەت مەملەكەتتە تىركەلگەن, بىراق باتىس قازاقستان وبلىسى اۋماعىندا جۇرگەن اۆتوكولىكتەرگە قاتىستى ماسەلە كۇن وتكەن سايىن ۋشىعىپ بارادى. ماسەلەن, بقو-دا جىل باسىنان بەرى شەتەلدىك تىركەۋدەگى اۆتوكولىكتەردىڭ قاتىسۋىمەن 89 اپات بولسا, وسى وقيعالار كەزىندە 32 ادام ومىردەن ءوتىپ, 122 ادام جاراقات العان.
«قازاقستان ىشكى ىستەر مينيسترلىگى رەسەي فەدەراتسياسى ىشكى ىستەر مينيسترلىگىمەن بىرگە ساراپتاما جۇرگىزىپ, قازاقستان اۋماعىندا رەسەيلىك تىركەۋمەن جۇرگەن اۆتوكولىكتەردىڭ ساقتاندىرۋ قۇجاتىن تەكسەرگەن بولاتىن. ناتيجەسىندە 88 مىڭ اۆتوكولىكتىڭ رەسەي فەدەراتسياسى ءىىم ەسەبىندە جوق ەكەندىگى انىقتالعان! ياعني بۇل كولىكتەر تارتىپكە ساي تىركەلمەگەن نەمەسە ونى ساتقان رەسەيلىك ازاماتتار جەركىلىكتى تىركەۋدەن الىپ تاستاعان. ال ءبىزدىڭ قازاقستان رەسپۋبليكاسىنىڭ زاڭدارى بويىنشا, تارتىپكە ساي تىركەلمەگەن اۆتوكولىكتەردىڭ جول قوزعالىسىنا قاتىسۋىنا تيىم سالىنادى» دەگەن بولاتىن بقو پوليتسيا باسقارماسى جەرگىلىكتى پوليتسيا قىزمەتى باستىعىنىڭ ورىنباسارى ساكەن شايحيەۆ.
بۇل تىعىرىقتان شىعۋدىڭ جالعىز جولى – رەسەيلىك ءنومىرلى اۆتوكولىكتەردى ساتىپ الاردا جەرگىلىكتى پوليتسيا بولىمدەرىنە حابارلاسىپ, كولىكتىڭ تاريحىن تەكسەرۋ قاجەت.
رەسەي قۇقىق قورعاۋشىلارىنىڭ مالىمەتىنە قاراعاندا, ول ەلدەن قازاقستان اۋماعىنا وتكەن 606 اۆتوكولىككە ىزدەۋ سالىنعان ەكەن. سونىڭ ىشىندە باتىس قازاقستان وبلىسىندا 48 اۆتوكولىككە قاتىستى قىلمىستىق ىزدەۋ جاريالانعان. قازىرگى تاڭدا سونىڭ 11-ءى تابىلىپ, ايىپ تۇراعىنا قويىلىپتى.
