تاراپتار ەكى ەل اراسىندا جوعارى دەڭگەيدە سەنىمدى ديالوگ ورناعانىن جانە ونى قازاقستان مەن پولشا پارلامەنتتەرىنىڭ بايلانىستارى بويىنشا قولداۋ مەن ىلگەرىلەتۋ دە ماڭىزدى ەكەنىن اتاپ ءوتتى.
«قازاقستان سەناتى پولشا سەناتىمەن پارلامەنتارالىق ىنتىماقتاستىقتى تەرەڭدەتۋگە مۇددەلى بولىپ وتىر. قازاقستان پارلامەنتىنىڭ ەكى پالاتاسىندا پولشامەن ىنتىماقتاستىق جونىندەگى توپتار جۇمىس ىستەيدى. پولشا پارلامەنتىندە قازاقستانمەن دوستىق توبى قىزمەت ەتۋدە. ءبىز الداعى كەزەڭدە ءتۇرلى سيپاتتاعى بىرلەسكەن ءىس-شارالار ۇيىمداستىرا الامىز. بۇل ءبىزدىڭ ءوزارا ەكىجاقتى ءىس-قيمىلىمىزعا جاڭا سەرپىن بەرەتىنىنە سەنىمدىمىن», دەدى ماۋلەن اشىمباەۆ.
پالاتا توراعاسى اڭگىمە بارىسىندا قازاقستان پارلامەنتى سەناتىنىڭ قازىرگى قىزمەتى, اتاپ ايتقاندا, مەملەكەت باسشىسىنىڭ ساياسي رەفورمالارىن ىسكە اسىرۋعا باعىتتالعان زاڭ شىعارۋ جۇمىستارى تۋرالى دا ايتتى.
ء«بىزدىڭ پالاتا قازاقستان پرەزيدەنتى قاسىم-جومارت توقاەۆتىڭ جاڭعىرتۋ جونىندەگى كۇن ءتارتىبىن ساپالى زاڭدارمەن قامتاماسىز ەتۋگە باسىمدىق بەرىپ وتىر. وندا ەڭ الدىمەن, ساياسي جۇيەنى ودان ءارى دەموكراتيالاندىرۋ, ونىڭ اشىقتىعىن قامتاماسىز ەتۋ, ساياسي باسەكەلەستىكتى ارتتىرۋ, ازاماتتاردىڭ قۇقىقتارىن ىسكە اسىرۋ ءۇشىن قاجەتتى جاعدايلار جاساۋ تۋرالى ايتىلىپ وتىر. ءبىز بۇل باعىتتا زاڭداردىڭ اۋقىمدى توپتاماسىن قابىلدادىق», دەدى ماۋلەن اشىمباەۆ.
جۇزدەسۋشىلەر ساۋدا-ەكونوميكالىق ىنتىماقتاستىقتى, سونداي-اق اگروونەركاسىپ كەشەنى, كولىك, لوگيستيكا, فارماتسەۆتيكا, قۇرىلىس, ماشينا جاساۋ, تۋريزم جانە باسقا دا كەلەشەگى زور سالالارداعى ەكىجاقتى قاتىناستاردى نىعايتۋداعى پارلامەنتشىلەر جاردەمىنىڭ ماڭىزدىلىعىن اتاپ ءوتتى.
