جالعان اقپارات تاراتقاندار انىقتالدى

كەشە باس پروكۋراتۋرادا بريفينگ وتكىزىلىپ, وندا بۇدان بۇرىن حابارلانعانداي, قۇقىق قورعاۋ ورگاندارى تسەنتر كرەديت بانك, كاسپي بانك جانە اليانس بانكتىڭ بانكروت الدىنداعى جاعدايى جونىندە جالعان اقپارات تاراتقان ادامداردى انىقتاۋ بويىنشا جەدەل-ىزدەستىرۋدىڭ كەشەندى شارالارى جۇرگىزىلىپ جاتقاندىعى تۋرالى رەسمي وكىل نۇرداۋلەت سۇيىندىكوۆ ايتىپ بەردى. مۇنداي جالعان اقپاراتتىڭ اتالعان قارجى ۇيىمدارىنا ايتارلىقتاي زيان كەلتىرىپ, قوعامدا الەۋمەتتىك شيەلەنىستىڭ ورشۋىنە اكەپ سوققانى بەلگىلى, دەدى رەسمي وكىل. بۇگىنگى كۇنگە دەيىن بانكتەردىڭ قارجىلىق احۋالى جونىندە جالعان اقپاراتتىڭ العاش تاراتىلۋىنا قاتىسى بار بىرنەشە ادام انىقتالىپ, ۇستالدى. ولار كىنالارىن مويىنداپ, ءتيىستى تۇردە جاۋاپ بەرۋدە جانە مۇنداي ارەكەتتەرگە بارۋلارىنىڭ جاي-جاپسارىن ەگجەي-تەگجەيلى بايانداپ بەردى. ۇستالعانداردىڭ اراسىندا الماتىلىق زاڭ كومپانيالارى ءبىرىنىڭ قىزمەتكەرى جانە بانك زاڭگەرى بار. ولاردىڭ جاۋاپتارى باسقا انىقتالعان جانە ۇستالعان ادامداردىڭ تۇسىنىكتەمەلەرى سياقتى مۇقيات تەكسەرىلۋدە. جالپى العاندا, قۇقىق قورعاۋ ورگاندارى انىقتاعان كورىنەۋ جالعان اقپاراتتى دايىنداۋ جانە تاراتۋعا كىنالى بارلىق ادامداردى اشكەرەلەۋ جانە جاۋاپكەرشىلىككە تارتۋ جونىندە شارالار قابىلداۋدا. ءىستىڭ ناقتى ءمان-جايلارىنا قاراي اكىمشىلىك جانە قىلمىستىق جاۋاپكەرشىلىك تۋرالى ماسەلە شەشىلەتىن بولادى. زارداپ شەككەن بانكتەر ماتەريالدىق زياندى وتەۋ تۋرالى تالاپ-ارىزدار بەرۋدى باستادى. سونىمەن قاتار, ءبىز پارلامەنتكە ەلەۋلى زيان جانە اۋىر سالدارلارعا اكەلۋى مۇمكىن كورىنەۋ جالعان اقپاراتتى تاراتۋ ءۇشىن قىلمىستىق جاۋاپكەرشىلىكتى كۇشەيتۋ جونىندە ۇسىنىستار ەنگىزدىك. وسىعان بايلانىستى باس پروكۋراتۋرا ازاماتتارعا, باق وكىلدەرىنە شىندىققا سايكەس كەلمەيتىن اقپاراتتى تاراتۋدان باس تارتا وتىرىپ, وسى ماسەلەلەرگە نەعۇرلىم جاۋاپكەرشىلىكپەن قاراۋ تۋرالى ءوتىنىش جاسايدى. جۇرگىزىلىپ جاتقان جۇمىستىڭ بارىسى مەن ناتيجەلەرى تۋرالى قوسىمشا حابارلاناتىن بولادى, دەدى باس پروكۋراتۋرانىڭ رەسمي وكىلى. الەكساندر تاسبولاتوۆ, «ەگەمەن قازاقستان».