كۇزدىڭ العاشقى ايىندا گەرمانيادا پارلامەنتتىك سايلاۋ ءوتىپ, سولشىل باعىتتاعى سوتسيال-دەموكراتيالىق پارتيا (SDP) جەڭىسكە جەتكەنى بەلگىلى. قازىرگە دەيىن بيلىكتە باسىم داۋىسقا يە بولىپ كەلگەن حريستيان-دەموكراتيالىق وداعى (CDU) ەكىنشى ورىنعا تۇراقتادى. وسىلايشا, انگەلا مەركەل كەتكەن سوڭ المانداردا پارلامەنتتى باسقاراتىن پارتيا دا اۋىستى.
جاسىلدار پارتياسى (Grüne) ءۇشىنشى ورىنعا تۇراقتادى. ولاردىڭ ەنشىسىنە بيۋللەتەندەردىڭ 14,8 پايىزى تيەسىلى. بۇعان دەيىنگى سايلاۋعا قاراعاندا, اتالعان پارتيا كوبىرەك داۋىس جيناپ, بۋندەستاگتاعى ماندات سانىن ەكى ەسەگە كوبەيتە الدى. بۇل – نەمىس حالقىنىڭ قورشاعان ورتاعا الاڭداي باستاعانىن كورسەتەدى.
ءسويتىپ, Grüne پارلامەنتتە كواليتسيا قۇرۋدا ۇلكەن ءرول وينايتىن پارتياعا اينالىپ شىعا كەلدى. ويتكەنى بىردە-ءبىر پارتيا ەلۋ پايىزدىق مەجەدەن اسا العان جوق. سوندىقتان باسقا پارتيالارمەن بىرلەسىپ, كواليتسيا قۇرۋى قاجەت.
باستاپقىدا سوتسيال-دەموكراتيالىق پارتيا جاسىلدارمەن تىزە قوسىپ, ەركىن دەموكراتتاردىڭ (FDP) ءتىلىن تاباتىنى بولجانعان ەدى. راسىندا, SDP پارلامەنتتە كواليتسيا قۇرىپ, كانتسلەردىڭ ورىنتاعىنا جايعاسۋ جۇمىسىنا بەلسەنە كىرىستى.
بىراق گلازگودا COP26 كونفەرەنتسياسى ءوتىپ جاتقان كەزەڭدە پارتيالار قورشاعان ورتاعا قاتىستى ماسەلەدە مامىلەگە كەلە الار ەمەس. ماسەلەن, جاسىلدار گەرمانيانىڭ كومىردەن باس تارتۋ مەرزىمىن 2038 جىل دەپ بەلگىلەۋدى ۇسىنادى. سونداي-اق قازبا وتىن جاعاتىن كولىكتەرگە تىيىمدى 2030 جىلعا دەيىن جۇزەگە اسىرۋ كەرەك دەپ ەسەپتەيدى.
بۇدان بولەك, Grüne كليمات جونىندەگى مينيسترلىك اشۋدى جوسپارلاپ وتىر. پارتيانىڭ پايىمداۋىنشا, مۇنداي ۆەدومستۆو ۇكىمەت پەن مەملەكەتتىك مەكەمەلەر قابىلداعان شەشىمنىڭ قانشالىقتى ەكولوگياعا زياندى ەكەنىن باقىلاماق. الدا-جالدا مينيسترلىكتەردىڭ جوسپارى قورشاعان ورتاعا زارداپ كەلتىرسە, وعان ۆەتو قويۋ قۇقىعىنا يە بولۋى ءتيىس.
ەركىن دەموكراتتار پارتياسى مۇنداي ۆەتوعا مۇلدەم قارسى. سونداي-اق اۆتوكولىكتەرگە تىيىم سالۋدى دا دۇرىس كورمەيدى. وعان قوسا, كومىرتەگىنە قويىلاتىن باعا ماسەلەسىندە دە پارتيانىڭ پىكىرى جاسىلداردان وزگەشە.
مىسالى, Grüne ەۋروپالىق وداقتىڭ CO2 شىعارىلىمىن ساۋدالاۋ جۇيەسىنە مۇقيات قاراپ وتىر. تاياۋدا پارتيا جەتەكشىسى اننالەنا باەربوك كومىرتەگى شىعارىلىمىن ازايتۋعا ءبىر عانا پارتيا مۇددەلى بولماۋىن, بارشاسى بۇعان كوڭىل اۋدارۋى قاجەت ەكەنىن مالىمدەدى. ونىڭ ايتۋىنشا, 1990 جىلدان بەرى اۋاعا زياندى گازدار ءبولۋ كولەمى وزگەرگەن ەمەس.
ء«دال قازىر 1,5 گرادۋستىق ماقساتىمىزعا باراتىن جولدى تاڭدادىق دەپ ايتا المايمىز», دەدى اننالەنا حانىم.
جاسىلداردىڭ بۇلقان-تالقان بولۋىنىڭ سەبەبى بار. بۇعان دەيىن ءۇش پارتيا 6 جەلتوقسانعا دەيىن, ياعني اۋليە نيكولاي كۇنىنە شەيىن جاڭا ۇكىمەتتى جاساقتاپ, بۋندەستاگتا داۋىس بەرۋگە كەلىسكەن ەدى. بىراق مەجەلى مەرزىم جاقىنداپ كەلەدى. مينيسترلەر كابينەتىن ماقۇلداۋ بىلاي تۇرسىن, كەي ماسەلەدە پارتيالار ورتاق مامىلەگە كەلە الماي وتىر.
وعان قوسا, جاسىلدار پارتياسىنىڭ ۇكىمەتتىك ەمەس ۇيىمدارعا جىبەرگەن حاتى دا شيەلەنىستى ۋشىقتىرا ءتۇستى. گلازگوداعى COP26 ءسامميتى قارساڭىندا Grüne ەكولوگيا ماسەلەسىمەن اينالىساتىن بىرنەشە ۇيىمعا ساۋىن ايتىپ, باسقا پارتيالاردى قورشاعان ورتا ماسەلەسىنە نازار اۋدارتۋعا كۇش سالۋعا شاقىرعان. حات العاندار قاتارىندا الەمگە تانىمال «گرينپيس» پەن Deutsche Umwelthilfe ۇيىمدارى بار.
«ەندى-ەندى باستالعان كواليتسيا جونىندەگى كەلىسسوزدەردە, اسىرەسە كليمات پەن بيوارتۇرلىلىكتى قورعاۋ سالالارىندا ءالى دە كوپ نارسەگە قول جەتكىزۋىمىز كەرەك. SPD مەن FDP پارتيالارىن جاڭاشا ۇسىنىس جاساۋعا يتەرمەلەسەڭىزدەر, بۇل وتە پايدالى بولار ەدى. ەگەر مۇنى ءوزىمىز عانا جالعاستىرساق, كەلىسسوزدەر ۇزاققا سوزىلىپ, وعان قول جەتكىزۋ قيىنعا تۇسەدى», دەلىنگەن حاتتا.
ا.باەربوك باستاعان ساياساتكەرلەردىڭ مۇنداي حات جولداۋى باسقا پارتيالارعا ۇناعان جوق. سوتسيال-دەموكراتتار مەن ەركىن دەموكراتتاردىڭ كەيبىر وكىلى بۇعان نارازىلىعىن ءبىلدىردى.
قورىتا ايتقاندا, گەرمانيادا جاڭا ۇكىمەتتى جاساقتاۋ قيىنعا سوعىپ تۇر. ساراپشىلار ءۇش پارتيا «اققۋ, شورتان ءھام شاياننىڭ» كەرىن كەلتىرمەي مە دەپ الاڭدايدى.
