فينالدا بەكنۇر جانىبەك ۇلى جانە ءالينۇر حامزين بىردەي 30,5 پايىز داۋىس جينادى. ەندى تالانتتى ورىنداۋشىلار 19 جەلتوقسان كۇنى پاريجدە وتەتىن حالىقارالىق بايقاۋدا «ەرتەگى الەمى» انىمەن قازاقستاننىڭ اتىنان ونەر كورسەتەدى. بۇل تۋرالى قازاقپارات «حابار» اگەنتتىگىنە سىلتەمە جاساپ حابارلايدى.
ۇلتتىق ىرىكتەۋ جەڭىمپازدارى قازىلار القاسىنىڭ باعالاۋى جانە تەلەكورەرمەندەردىڭ SMS-داۋىس بەرۋ ناتيجەلەرى بويىنشا انىقتالدى.
ۇلتتىق ىرىكتەۋ كونتسەرتىنىڭ تىكەلەي كورسەتىلىمى بۇگىن «حابار» تەلەارناسىنىڭ ەفيرىندە ءوتتى. 10 فيناليست تانىمال قازاقستاندىق كومپوزيتورلاردىڭ ارنايى جازىلعان اۆتورلىق اندەرىمەن ونەر كورسەتتى.
پاريجدە وتەتىن 19-شى Junior Eurovision Song Contest بالالار ءان بايقاۋىنا 19 ەل قاتىسادى. ولار: البانيا, ارمەنيا, ازەربايجان, بولگاريا, فرانتسيا, گرۋزيا, گەرمانيا, يرلانديا, يتاليا, قازاقستان, مالتا, نيدەرلاندى, سولتۇستىك ماكەدونيا, پولشا, پورتۋگاليا, رەسەي, سەربيا, يسپانيا جانە ۋكراينا.
العاش رەت قازاقستان Junior Eurovision بايقاۋىنا 2018 جىلى قاتىستى. بايقاۋعا دانەليا تولەشوۆا «وزىڭە سەن» انىمەن قاتىسىپ, التىنشى ورىنعا يە بولدى. 2019 جىلى ەرجان ماكسيم «ارمانىڭنان قالما» انىمەن ەكىنشى ورىن الدى (قازىلار القاسىنىڭ شەشىمى بويىنشا ءبىرىنشى ورىن).
2020 جىلى پاندەمياعا بايلانىستى بالالار ەۆروۆيدەنيەسى ونلاين-فورماتتا ءوتتى. بايقاۋعا اندەر جازبا نۇسقاسىندا ۇسىنىلدى. قازاقستان نامىسىن قورعاعان قاراقات باشانوۆا «Forever» ءانىن ورىنداپ, قازىلار القاسى مەن كورەرمەندەردىڭ داۋىس بەرۋ قورىتىندىسى بويىنشا 13 قاتىسۋشىنىڭ اراسىندا ەكىنشى ورىنعا يە بولدى.
