«بۇگىنگى تاڭدا, مەملەكەتتىك باق-داعى قازاق تىلىندەگى كونتەنتتىڭ ۇلەسى 78%. ونىڭ ىشىندە تەلەارنالارداعى كونتەنت – 79,2%, باسپا باسىلىمداردا 84,50% جانە ينتەرنەت-رەسۋرستاردا – 59,81%. وسىدان 10 جىل بۇرىن مەملەكەتتىك تىلدە اقپارات تاراتاتىن 6 سايت قانا بولسا, بۇگىندە جاعداي مۇلدەم بولەك (2009 جىلدىڭ كورسەتكىشى: abai.kz, egemen.kz, jasqazaq.kz, qazaquni.kz, turkystan.kz, zamandas.kz.). قازىرگى تاڭدا وتاندىق ينتەرنەت مەديانىڭ شامامەن 14% ۇلەسىن قازاقتىلدى سايتتار قۇرايدى. جىلدان جىلعا قازاق ءتىلدى ينتەرنەت پورتالداردىڭ سانى دا, وقىرماندار قاتارى دا ارتىپ كەلەدى. سوڭعى 2 جىل ىشىندە جاڭادان 46 سايت اشىلدى», دەدى ايدا بالاەۆا.
سونداي-اق مينيستر وتاندىق مەديادا قازاق تىلىندە كونتەنت جاساۋ – اقپاراتتىق ساياساتتاعى باسىم باعىتتاردىڭ ءبىرى ەكەندىگىن ايتتى. بۇل سالاداعى اتقارىلعان جۇمىستىڭ كولەمى دە, ساپاسى دا جىلدان جىلعا ارتىپ كەلەدى.
«ارينە, مەملەكەتتىك تىلدەگى مەديانىڭ بەلسەندى دامۋى – ءبىرىنشى كەزەكتە قازاق ءتىلدى اۋديتوريانىڭ وسۋىنە بايلانىستى. سەبەبى بۇل قوعام تالابى. سۇرانىس ارقاشاندا ۇسىنىستى تۋدىراتىنى بەلگىلى. دەگەمەن سان بار جەردە ساپا ماسەلەسىن دە ۇمىتپاۋىمىز كەرەك. وكىنىشكە وراي, قازىر ارزان مالىمەت تاراتۋعا اۋەس «سارى باسىلىم» دەڭگەيىنەن وزگەرگىسى كەلمەيتىن ونلاين مەديالار جەتەرلىك. قىسقا ۋاقىتتا مول قارالىم جيناۋدى باستى ماقسات ەتەتىن سايتتار اق-قاراسىن اجىراتپاي جالعان اقپارات بەرۋگە, ءبىر-بىرىنەن كوشىرىپ باساتىن ساپاسى تومەن اۋدارمالار مەن بۇكىل كونتەنتى تەك قىلمىس حرونيكاسىنان تۇراتىن «جاعا ۇستاتار جاڭالىقتارعا» عانا اۋەس. ارينە, ءداستۇرلى باسىلىمدارداعى جازۋ ءتىلى مەن ينتەرنەتتەگى جازۋ ستيلىندە ايىرماشىلىق بار. كوپتەگەن اقپارات سايتتارى مالىمەتتى قىسقا ءارى جەڭىل جازۋدى تاڭدايدى. سوندىقتان بۇگىندە «ينتيل» («Intil») جازۋ فورماسى ۇعىمى پايدا بولدى. دەسە دە جىلدام اقپارات تاراتۋدى عانا ويلايتىن سايتتاردا كوپ جاعدايدا ءتىل تازالىعى بولمايدى. مۇنىڭ ءوزى, ءبىرىنشى كەزەكتە قازاق ءتىلىن ينتەرنەت ارقىلى وقىپ ۇيرەنەتىن وسكەلەڭ ۇرپاققا كەرى اسەر ەتەتىنى انىق», دەدى مينيستر.
ايدا بالاەۆانىڭ ايتۋىنشا, قازىر ينتەرنەت سايتتار – امبەباپ حابار تاراتۋ قۇرالىنا اينالعان. بۇگىندە ءبىر سايتتىڭ ىشىنەن جازبا اقپاراتتى دا, اۋديو حابارلامانى دا, بەينە-باعدارلامالاردى دا تابۋعا بولادى. مىسالى مەملەكەتتىك قولداۋعا يە ە-history.kz, اdebiportal.kz, el.kz, inform.kz, baq.kz سياقتى سايتتاردا قازاق تىلىندەگى ماتەريالدار زاماناۋي فورماتتاعى بەينە جازبالار, اۋديوپودكاستتار وقىرماندارعا قولجەتىمدى. بۇگىندە جاستار اراسىنداعى ەڭ سۇرانىسقا يە قوسىمشالاردىڭ ءبىرى – «TikTok» الەۋمەتتىك جەلىسى. بۇل رەتتە, ە-history.kz پورتالى «تيكتوكەر تاريحشى» پاراقشاسىن اشىپ, جاستارعا جەڭىل ءارى قىسقا تۇردە ەلىمىزدىڭ تاريحىن تۇسىندىرەتىن اقپارات بەرەدى.
