مەملەكەت باسشىسى قاسىم-جومارت توقاەۆ رەفورمالار جونىندەگى جوعارى كەڭەستىڭ ءۇشىنشى وتىرىسىندا ۇلتتىق ساناقتى ۇيىمداستىرۋ ماسەلەسىن ايتىپ, حالىق ساناعى تۇرعىنداردىڭ ناقتى سانىن, ونىڭ جاس جانە گەندەرلىك قۇرامىن, ۋربانيزاتسيا دەڭگەيىن, تابىس كولەمى مەن باسقا دا ماڭىزدى تالداۋ دەرەكتەرىن انىقتاپ, تەكسەرىلگەن ءارى دايەكتى باسقارۋشىلىق شەشىمدەر قابىلداۋعا ءمۇمكىندىك بەرەتىنىن اتاپ وتكەن بولاتىن.
پرەزيدەنت تاپسىرماسىنا ساي وتكەن ۇلتتىق حالىق ساناعى تاراز قالاسىندا قارقىندى تۇردە جۇرگىزىءلدى دەۋگە بولادى. ناۋقان بارىسىندا ساۋالناما الۋشىلار تەك وبلىس ورتالىعىنداعى تۇرعىن ۇيلەردى ارالاپ قانا قويماي, ساۋدا ورىندارى, كوپشىلىك جەرلەر, ساياباقتارعا دا بارىپ, تۇرعىندارعا ءتۇسىندىرۋ جۇمىستارىن جۇرگىزىپ, ساناقتان وتكىسى كەلەتىن ازاماتتارعا دا جاردەمدەءستى. سونىمەن قاتار, قوعامدىق كولىكتەردە, ايالادامالاردا, ادامدار كوپ جينالاتىن ورىندارعا, قالا ىشىندە ورنالاسقان LED ەكراندارعا باننەر مەن بيلبوردتار ءىلىنىپ, حالىق ساناعى جايلى جان-جاقتى اقپارات كورسەتىلگەن. ۇلتتىق ساناقتىڭ ماڭىزدىلىعىن ءتۇسىنىپ, وعان بارىنشا اتسالىسىپ جۇرگەن ەرىكتى جاستاردىڭ دا قاراسى قالىڭ بولدى. وسىنداي جۇيەلى جۇمىستاردىڭ ناتيجەسىندە الدىن الا مالىمەتتەر بويىنشا, بۇگىندە اۋليەاتالىقتار ساناققا بەلسەندى قاتىسىپ, الدىن الا مالىمەت بويىنشا شاھار تۇرعىندارىنىڭ سانى قازىردىڭ وزىندە 410 مىڭنان اسۋدا.
«حالىق ساناعى باستالدى دەگەندى ەستىگەن ساتتە-اق ونلاين تۇردە ناۋقانعا قاتىستىم. قازىر تەحنولوگيانىڭ دامىعان زامانى. سوندىقتان دا ساناقتىڭ ساۋالدارىنا جاۋاپ بەرۋ ەش قيىندىق تۋدىرعان جوق. ونىڭ ۇستىنە سۇراقتار دا كوڭىلگە قونىمدى ءارى جەڭىل. بۇل ناۋقان تەك تۇرعىنداردىڭ سانىن ءبىلۋ ءۇشىن عانا ەمەس, حالىقتىڭ تۇرمىس جاعدايىن زەرتتەپ, قاجەتتى باعدارلامالاردى ازىرلەۋ ءۇشىن دە اسا ماڭىزدى دەپ ويلايمىن», دەيدى قالا تۇرعىنى رىسكۇل قاسىموۆا. ال, زەينەتكەر ءراتاي ەسەنباەۆا ساناقتان وففلاين فورماتتا وتكەن.
«ساۋالناما الۋشىلار ەڭ ءبىرىنشى كەلگەندە ۇيدە ەشكىم بولمادى. ءبىز جوق بولعاندىقتان ەسىككە بايلانىس نومىرلەرىن جازىپ, قىستىرىپ كەتكەن ەكەن. سول بويىنشا حابارلاسىپ ەدىك, قازاقتىڭ ورىمدەي ۇلى مەن قىزى كەلىپ, حالىق ساناعى بويىنشا ءبىراز ماعلۇماتتار بەرىپ, ساۋالناما الدى. ولاردىڭ ادامدارمەن قارىم-قاتىناسى, ءتىل تابىسۋى ءسۇيسىندىرەرلىك. وتباسىمىزدىڭ بارلىق مۇشەسى ساناق سۇراقتارىنا جاۋاپ بەردى. وتىز جىلعا ەندى قادام باسقان جاس مەملەكەتىمىزدەگى ءاربىر ادام زور ماڭىزعا يە. حالقىمىزدىڭ سانى كوبەيسە عانا ىرگەمىز بەكىپ, الپاۋىتتاردىڭ كوشىنە ىلەسە الامىز. وسىنى جەتە تۇسىنگەندەر حالىق ساناعىنا بەلسەنە اتسالىسۋى كەرەك», دەيدى تۇرعىن.
جامبىل وبلىسى
