«مال شارۋاشىلىعىندا مەتان شىعارىندىلارىن ازايتۋ ءۇشىن كوڭ مەن قۇس ساڭعىرىعىن وڭدەيتىن جابدىققا 25% ينۆەستيتسيالىق سۋبسيديالاۋ تولەنە باستادى. وسىمدىك شارۋاشىلىعىندا كۇرىش, ماقتا سياقتى سۋدى كوپ قاجەت ەتەتىن داقىلداردىڭ القابىن ازايتۋ ءۇشىن ەگىس قۇرىلىمىن ءارتاراپتاندىرۋ جالعاسادى», دەدى ايداربەك ساپاروۆ ۇكىمەتتىڭ بۇگىنگى وتىرىسىندا.
ونىڭ ايتۋىنشا, زاماناۋي تسيفرلىق تەحنولوگيالاردى ەنگىزۋ, عارىشتىق مونيتورينگ پەن جەردى قاشىقتان زوندتاۋ ناتيجەلەرىن پايدالانۋ تەحنولوگيالارى سالاعا ەنىپ كەلەدى.
«اگروتەحنولوگيالاردى ساقتاۋ ءۇشىن قازىرگى زامانعى تۇقىم سورتتارى مەن تىڭايتقىشتار, وسىمدىك قورعاۋعا ارنالعان بيولوگيالىق قۇرالدار ساتىپ الۋعا دا قولداۋ كورسەتىلەدى. بۇل رەتتە, اوك دامىتۋ تۇجىرىمداماسى شەڭبەرىندە ورگانيكالىق تىڭايتقىشتاردى ساتىپ الۋ كەزىندە اۋىل شارۋاشىلىعى تاۋارىن وندىرۋشىلەردىڭ شىعىندارىن وتەۋ كوزدەلمەك. سالانى تەحنيكالىق تۇرعىدا جاراقتاندىرۋ ءۇشىن اۋىل شارۋاشىلىعى تەحنيكاسىن ساتىپ الۋدى, جەڭىلدەتىلگەن ليزينگتى سۋبسيديالاۋ, وتاندىق اۋىل شارۋاشىلىعى ماشيناسىن جاساۋدى دامىتۋ باعدارلامالارىن اۋقىمدى ىسكە اسىرۋ جالعاسادى», دەدى ۆيتسە-مينيستر.
سونداي-اق, سۋ ۇنەمدەۋ تەحنولوگيالارىن ەنگىزۋ, گيدرومەليوراتيۆتىك قىزمەتتىڭ ماتەريالدىق-تەحنيكالىق بازاسىن جاقسارتۋ جانە ولاردىڭ قىزمەت ايماعىن كەڭەيتۋ ارقىلى سۋارمالى ەگىنشىلىكتى دامىتۋ بويىنشا شارالار قابىلدانۋدا. بۇل رەتتە, زاماناۋي سۋارۋ جۇيەلەرىن ساتىپ الۋ قۇنىنىڭ 50%-عا دەيىن ينۆەستيتسيالىق سۋبسيديالاۋ قاراستىرىلعان.
