باعا شارىقتامايدى

قالالىق اكىمدىك وكىلدەرى باعا تۇراقتىلىعىن بايقاۋ ماقساتىندا سەمەيدىڭ ساۋدا ورىندارىن ارالاپ كوردى. اسىرەسە, الەۋمەتتىك قاجەتتىلىك بولىپ تابىلاتىن ءبىرىنشى كەزەكتەگى نان ونىمدەرىنىڭ باعاسى باستى نازاردا تۇر. وسىعان وراي قالا اكىمىنىڭ ورىنباسارى جاعىپاربەك ەلۋباەۆ, كاسىپكەرلىك بولىمىنەن ءامينا سىزدىقوۆالار جانار-جاعارماي قۇيۋ بەكەتى, ءدارىحانا جانە سۋپەرماركەتتەردە بولدى. جانار-جاعارماي كولىك جۇرگىزۋشىلەر ءۇشىن تۇراقتى باعادا, اي-92 بەنزينى بۇرىنعىداي 115 تەڭگەدە ەكەن. مۇدان سوڭ قالا دۇكەندەرىنە باس سۇققان جۇمىس توبى ونداعى الەۋمەتتىك باعالارعا نازار اۋداردى. مۇندا كارتوپ, ءسابىز – 61 تەڭگە, قانت – 155 تەڭگە, ءبىرىنشى سورت نان – 48 تەڭگە, سول سياقتى باسقا دا ونىمدەرىنىڭ شارىقتاپ كەتكەنى بايقالمادى. دۇكەن ساتۋشىسى ميرا اليمجانوۆانىڭ ايتۋىنشا, رەسەيلىك تاۋار جەتكىزۋشىلەر باعانى كوتەرۋى مۇمكىن. ەرتەڭنەن باستاپ, بارلىق رەسەيلىك ونىمدەرگە 20 پايىز باعا كوتەرىلەدى دەگەن ەسكەرتپە الدىق. ارينە, شەتەلدىك تاۋارعا باعا قىمباتتاسا دا دۇكەن يەلەرى دە اسا قىمبات ۇستەمە قوسپايتىن بولادى. دۇكەندەردە باعا تۇراقتى ەكەن, بۇل ءبىزدى قۋانتادى, دەدى اكىم ورىنباسارى جاعىپاربەك ەلۋباەۆ, ەگەر باعا كوتەرىلىپ كەتسە, قاراپايىم حالىققا, ءبىر جالاقىمەن عانا, نە زەينەتاقىمەن وتىرعاندارعا اسا قيىن. ەگەر شەتەلدىك ءونىم قىمباتتاپ كەلسە دە, سىزدەر ەكى ەسە باعاسىن ءوسىرىپ جىبەرمەيمىز دەگەندەرىڭىز دۇرىس. ءار نارسەگە سابىرمەن قاراعان ءجون. بۇدان سوڭ اكىمدىك وكىلدەرى باعا ساياساتىنا وراي بريفينگ وتكىزدى. وعان اۋىلشارۋاشىلىق ءبولىمىنىڭ باستىعى ا. سۋيچينوۆ, «شىعىس-سامعاۋ» تۇراقتاندىرۋ قورىنىڭ باستىعى ت. مۇراتوۆتار قاتىستى. 2014 جىلدىڭ 11 اقپانىنان باس­تاپ باعا تۇراقتىلىعى جانە مونيتورينگ جۇرگىزۋگە وراي جۇمىس توبى قۇرىلعان. جەكە ساۋدا نۇكتەلەرىمەن مەموراندۋمعا قول قويىلعان. وندا ۇستەمە باعا 10 پايىزدان اسپايتىن بولادى. كادىمگى نان باعاسى 50 تەڭگەدەن اسپاۋى ءتيىس. وسىعان وراي 189 مەموراندۋم بەكىتىلدى. «سەمنان» جانە «شىعىس نان ونىمدەرى» جشس باعانى نانعا 45-50 تەڭگەدەن ۇستايتىن بولادى. قالاداعى 30 دۇكەندە تۇراقتاندىرۋ قورىنىڭ ونىمدەرى ساتىلادى. وندا ورامجاپىراق, قىزىلشا سياقتى اۋىلشارۋاشىلىق ونىمدەرى 61 تەڭگەدەن جوعارى كوتەرىلمەيتىن بولادى. راۋشان نۇعمانبەكوۆا. سەمەي.