2021 جىلعى 2 قاراشادا سەمەي قالاسىنىڭ گارنيزوندىق وفيتسەرلەر ۇيىندە باتىر-شەكاراشى رادجان باتىرحانوۆتىڭ اناسىنا سالتاناتتى تۇردە «تمد-عا قاتىسۋشى مەملەكەتتەردىڭ شەكارالارىن نىعايتقانى ءۇشىن» مەدالى تابىستالدى.
باتىر-شەكاراشىنى مەدالمەن ماراپاتتاۋ تۋرالى شەشىمدى تمد مەملەكەتتەرىنىڭ (ازەربايجان, ارمەنيا, بەلارۋس, قازاقستان, قىرعىزستان, مولدوۆا, رەسەي, تاجىكستان, تۇرىكمەنستان, وزبەكستان, ۋكراينا) 11 شەكارا ۆەدومستۆوسىنىڭ شەكارا اسكەرلەرى قولباسشىلارى كەڭەسى قابىلداعان.
ايتا كەتەيىك, باتىرحانوۆ رادجان ارميەۆيچ (1975-1994) ينتەرناتسيوناليست-جاۋىنگەر, باتىر-شەكاراشى. جەكە قازاقستاندىق قۇراما باتالونىنىڭ كۇرشىم ۆزۆودىنىڭ قۇرامىندا قىزمەت اتقارعان. 1994 جىلعى 28 قىركۇيەكتە تاجىك-اۋعان شەكاراسىندا قازا تاپقان. قيان-كەسكى ايقاستى ءبىرىنشى قابىلداپ, ءوز اسكەري قىزمەتتەستەرىن قۇتقارىپ, ۇرىستا جەڭىسكە جەتۋگە جول اشتى.
